ރޭ އިރުއޮއްސުނީންސުރެ ވެހެމުންދާ ވާރޭގައި ފ. ނިލަންދޫގެ 80 ޕަސެންޓު ފެނު އަޑިއަށް ގޮސްފައިވާ ކަމަށް އެ ރަށު ކައުންސިލުން ބުނެފިއެވެ.
"ސަން" އާ ވާހަކަދައްކަވަމުން ނިލަންދޫ ކައުންސިލްގެ މެންބަރު ސަމީރާ އިބްރާހީމް ވިދާޅުވީ އެ ރަށުގައި ފެންބޮޑުވެ 80 ޕަސެންޓު ގެތަކަށް ފެން ވަދެފައިވާ ކަމަށެވެ. އަދި ރަށުގެ ނަރުދަމާ ފެއިލްވެ، ޖަންކްޝަންތަކުން މުޅި މަގުތައް މައްޗަށް ނަޖިސް އަރަމުންދާ ކަމަށް ވެސް އޭނާ ވިދާޅުވިއެވެ.
އަދި ފެން ހިންދުމުގެ މަސައްކަތް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އާއި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ކުރަމުންދާ ކަމަށް ސަމީރާ ވިދާޅުވިއެވެ. އެގޮތުން ގޭގޭގައި ވެލި ބަސްތާ ޖެހުމާއި މަގުމަތީގައި ބޮޑުވެފައިވާ ފެން ހިންދުމުގެ މަސައްކަތް ކައުންސިލާއި ރަށުގެ އާންމުންނާ ގުޅިގެން ކުރަމުންދާ ކަމަށް ވެސް އޭނާ މައުލޫމާތުދެއްވިއެވެ.
އެ މަސައްކަތް މިއަދުގެ ހަވީރު 16:30ން ފެށިގެން ކުރަމުންދާ ކަމަށް ވެސް އޭނާ ވިދާޅުވިއެވެ.
މިވަގުތު އެއްވެސް ގެއަކުން ވަގުތީ ބޯހިޔާވަހިކަމަށް އެދިފައި ނުވި ނަމަވެސް އެކަން ކުރަންޖެހިއްޖެ ހާލަތެއްގައި އެކަން ކޮށްދެވޭނެ ކަމަށް ވެސް ސަމީރާ ވިދާޅުވިއެވެ. އެގޮތުން އެ ރަށުގެ ސްކޫލާއި ހޮސްޕިޓަލްގެ ހޯލު ފަދަ ތަންތަނުން އާންމުންނަށް ރައްކާތެރިކަން ފޯރުކޮށްދެވޭނެ ކަމަށް ވެސް އޭނާ ވިދާޅުވިއެވެ.
މިހާރު މުޅި ރާއްޖެއަށް ކުރަމުންދާ ވިއްސާރައިގައި މުޅި މާލެ ވެސް އޮތީ ފެނު އަޑީގައެވެ. އެހެންކަމުން ބޯކޮށް ވާރޭވެހި، ފެންބޮޑުވާނެ ކަމަށް ލަފާކޮށް މެޓު އޮފީހުން ނެރުނު އޮރެންޖު އެލާޓު މިރޭ 23:00އާ ހަމައަށް ދިގުދަންމާލައިފިއެވެ.
މި ވިއްސާރައިގައި މާލޭގެ އިތުރުން އަތޮޅު ތެރޭގެ ބައެއް ރަށްތަކުގައި ވެސް ފެންބޮޑުވެ، އަދި އުދައެރުމުގެ ސަބަބުން އެކިވަރުގެ ގެއްލުންތައް ވަމުންދާތީ، އެމްއެންޑީއެފުން އެ ރަށްތަކުގައި ވެސް ހަރަކާތްތެރިވަމުން އެބަދެއެވެ.
މި ވިއްސާރައިގައި ދުރާލާ ގޭބީސީތަކުން ފެނުން ރައްކާތެރިވުމަށް ފިޔަވަޅު އެޅުމާއި މޫސުމަށް ސަމާލުވެ ތިބުމަކީ މުހިންމު ކަމެކެވެ.