ގުގުރުމާއެކު ބޯކޮށް ވާރޭވެހި، ފެންބޮޑުވާނެ ކަމަށް ލަފާކޮށް މެޓު އޮފީހުން ނެރުނު އޮރެންޖު އެލާޓު މިރޭ 23:00އާ ހަމައަށް ދިގުދަންމާލައިފިއެވެ.
މެޓުން ބުނީ އެކި ހިސާބަށް ވިއްސާރަކުރާނެ ކަމަށާއި އަދި ބައެއް ރަށްތަކަށް ބޯކޮށް ވާރޭވެހި ގުގުރުން ވެސް އެކަށީގެންވާ ކަމަށެވެ.
އިރުއުތުރާއި އިރުން ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ލަފާކުރާއިރު، ގަޑިއަކު 45 މޭލަށް ވައިގަދަވުން އެކަށީގެންވާ ކަމަށް މެޓުން ބުނެއެވެ.
މިހާރު ރާއްޖެއަށް ކުރަމުން މި ދާ ވިއްސާރައިގައި ކަނޑުތައް ގަދަވާނެ ކަމަށް ބުނެފައިވާއިރު، ރާޅުގެ އުސްމިން ހުންނާނެ ކަމަށް އަންދާޒާކޮށްފައިވަނީ ފަސް ފޫޓާއި އަށް ފޫޓާ ދެމެދުގައެވެ.
އަދި ދިޔަވަަރު ބޮޑުވާ ގަޑިތަކުގައި ބައެއް ރަށްތަކަށް އުދައިގެ އަސަރު ކުރުން އެކަށީގެންވާތީ، ހުރިހާ ފަރާތްތަކުން ވެސް މޫސުމަށް ސަމާލުވުމަށް މެޓުން ވަނީ އެދިފައެވެ.
މިހާރު ކުރަމުންދާ ވިއްސާރައިގައި މުޅި މާލެ އޮތީ ފެނު އަޑީގައެވެ. ބައެއް ގެތަކުގެ އިތުރުން ފިހާރަތަކަށް ފެންވަދެ އެކި ވަރުގެ ގެއްލުންތައް ދަނީ ލިބެމުންނެވެ.
މަގުތަކުން ފެން ހިންދުމުގެ މަސައްކަތަށް އެމްއެންޑީއެފްގެ ފަޔަ އެންޑް ރެސްކިއު ސާވިސްއިންވަނީ މާލޭގެ ތިން ސަރަހައްދެއްގައި 11 ޕަމްޕެއް ބަހައްޓައިގެން މަސައްކަތް ފަށައިފައެވެ. އަދި މާލެ ސިޓީ ކައުންސިލާ ގުޅިގެން، ފެންބޮޑުވާ ސަރަހައްދުތަކުގައި ވެލިބަސްތާ ޖެހުމުގެ މަސައްކަތް ވެސް އެމްއެންޑީއެފުން ކުރަމުން އެބަދައެވެ.
މި ވިއްސާރައިގައި މާލޭގެ އިތުރުން އަތޮޅު ތެރޭގެ ބައެއް ރަށްތަކަށް ވެސް ފެންބޮޑުވެ، އަދި އުދައެރުމުގެ ސަބަބުން އެކިވަރުގެ ގެއްލުންތައް ވަމުންދާތީ، އެމްއެންޑީއެފުން އެ ރަށްތަކުގައި ވެސް ހަރަކާތްތެރިވަމުން އެބަދެއެވެ.