ދެ ކްރޫޒްލައިނާއަކުން 4،600އަށްވުރެ ގިނަ ފަތުރުވެރިންނަށް އިމިގްރޭޝަނުން ކްލިއަރެންސް ދީފިއެވެ.
އިމިގްރޭޝަނުން ބުނީ، އޭގެ ތެރެއިން އެމްއެސް ނޯވީޖިއަންއިން 1،1870 ޕެސެންޖަރުންނަށާއި، 862 ކްރޫއިންނަށް ކްލިއަރެންސް ދީފައިވާ ކަމަށެވެ. އަދި އެމްއެސް ރިވިއޭރާއިން 1،179 ފަތުރުވެރިންނާއި 747 ކްރޫއިންނަށް ކްލިއަރެންސް ދީފައިވާ ކަމަށެވެ.
އިމިގްރޭޝަނުން ބުނީ ސީޕޯޓް ޑިވިޝަންގެ އޮފިސަރުން ވަނީ ޑިސެމްބަރު 23އިން ފެށިގެން 30އާ ދެމެދު ސީޝެލްސްގެ މަހޭއިން ރޫޓް ކްލިއަރެންސް ޕްރޮސެސް ކާމިޔާބުކަމާއެކު ކުރިއަށް ގެންގޮސްފައި ކަމަށެވެ.
ކްރޫޒްލައިނާއަކުން އައި ފަތުރުވެރިން މާލޭގައި: މި އަހަރު ފުރަތަމަ ފަހަރަށް ރާއްޖެއަށް ވަނީ ދެ މިލިއަން ފަތުރުވެރިން އައިސްފައި -- ސަން ފޮޓޯ/ މުހައްމަދު އަފްވާން
އެމްއެސް ނޯވީޖިއަންއާއި އެމްއެސް ރިވިއޭރާއިން ގިނަ އަދަދެއްގެ ފަތުރުވެރިން މާލެ ފައިބައި، ޚިދުމަތްތައް ހޯދައިފައިވެއެވެ.
މިއީ ފަތުރުވެރިކަމުގެ ސީޒަނެވެ. ރާއްޖެއިން މި އަހަރު ކަނޑައެޅި ދެ މިލިއަން ފަތުރުވެރިންގެ އަމާޒު ހާސިލްވެ، އިތުރަށް 41،000އަށްވުރެ ގިނަ ފަތުރުވެރިން ވަނީ 2024ގައި ރާއްޖެ އައިސްފައެވެ.
ފަތުރުވެރިކަމުގެ ލޯ ސީޒަނުގައި އެވަރެޖުކޮށް ދުވާލެއްގެ މައްޗަށް 4،000 ނުވަތަ 5،000 ފަތުރުވެރިން ރާއްޖެ އަންނައިރު، މިހާރު ބައެއް ދުވަސްދުވަހު 9،000އަށްވުރެ ގިނަ ފަތުރުވެރިން ވެސް ރާއްޖެއަށް އަންނަމުންދެއެވެ.