ރިސޯޓުތަކާއި ގެސްޓްހައުސްތައް ވެސް ނުފުރެނީ އިތުރުވި ތަންތަނާ އެއްވަރަށް ޑިމާންޑް ނުއުފެއްދުނީމާ ކަމަށް މަޓާޓޯގެ ރައީސް އަދި އެމްއެމްޕީއާރުސީގެ ޗެއާޕާސަން އަބްދުﷲ ގިޔާސް ވިދާޅުވެއްޖެއެވެ.
ފަތުރުވެރިން އަންނަ އަދަދު އިތުރުވި ނަމަވެސް މަތީފަންތީގެ ރިސޯޓުތައް ނުފުރޭކަމުގެ ކަންބޮޑުވުން ވަނީ ބޮޑުވެފައެވެ.
މި ހަފުތާގެ އެޑިޓަރުގެ ސުވާލު ޕްރޮގްރާމްގައި ވާހަކަދައްކަވަމުން އަބްދުﷲ ވިދާޅުވީ، ރިސޯޓުތައް ނުފުރެނީ ކީއްވެތޯ ބަލަން މަޓާޓޯއިން މިދިޔަ އަހަރު ވެސް ދިރާސާއެއް ހަދާފައިވާ ކަމަށެވެ. މާކެޓަށް ސަޕްލައި އިތުރުވާ މިންވަރަށް ޑިމާންޑް ނުއުފެއްދޭނަމަ މި ކަހަލަ ގޮންޖެހުންތަކާ ކުރިމަތިލާން ޖެހޭނެކަން ފާހަގަކުރައްވައި އޭނާ ވިދާޅުވީ، މިއީ ކުރިން ވެސް ފާހަގަކޮށްފައިވާ ކަންބޮޑުވުމެއް ކަމަށެވެ.
"މާކެޓުގައި ސަޕްލައި ގިނަވަންޏާމުން އެ ވަރަށް ޑިމާންޑް ކްރިއޭޓްނުކުރެވެންޏާމުން މި ކަހަލަ ޗެލެންޖަސް ފެންނާނެ. މިއަދު ހަމަ، އަހަރަކަށްވުރެ އަހަރެއް މި ފެންނަނީ އާ ރިސޯޓުތަކެއް މާކެޓަށް އެބަ އާދޭ. އެ ވަރަށް ހަމަ ގެސްޓްހައުސްތައް ވެސް މާކެޓަށް އެބައާދޭ،" އޭނާ ވިދާޅުވިއެވެ.
"އަޅުގަނޑުމެން އަބަދު ވެސް މި ދައްކަނީ، އެ ވަރަށް ދިވެހިރާއްޖޭގައި ޑިމާންޑް ކްރިއޭޓް ނުކުރެވިއްޖެއްޔާ އަޅުގަނޑުމެންނަށް ވަރަށް ބޮޑު ޗެލެންޖަކަށޭ ވާނީ،"
މަޓާޓޯގެ ރައީސް އަބްދުﷲ ގިޔާސް، އެޑިޓަރުގެ ސުވާލު ޕްރޮގްރާމްގައި: އޭނާ ވިދާޅުވީ، ސަޕްލައިއާ އެއްވަރަށް ޑިމާންޑް ނުއުފެއްދޭ ކަމަށް -- ސަން ފޮޓޯ
އަބްދުﷲ ވިދާޅުވީ، މީގެ 20 އަހަރު ކުރިން ރާއްޖޭގެ ފަތުރުވެރިކަން އޮތް ހާލަތާއި މިހާރާ ވަރަށް ތަފާތު ކަމަށެވެ. އޭރު ރާއްޖޭގައި ރިސޯޓުތައް ވެސް މަދުކަން ފާހަގަކުރައްވައި އޭނާ ވިދާޅުވީ، އެ ތަންތަން ވިއްކީ ދިވެހީން ބޭނުން އަގެއްގައި ކަމަށެވެ.
އެކަމަކު، މިހާރު ލޯ ސީޒަނެކޭ އެއްގޮތަށް ސީޒަން ތެރޭގައި ވެސް ވަރަށް ގިނަ ތަންތަނުން އަގުތައް ކުޑަކުރާކަން އޭނާ ފާހަގަކުރެއްވިއެވެ.
މީގެ އިތުރުން، އޭނާ ވިދާޅުވީ ރާއްޖެ އަންނަނީ ވެސް ހަމައެކަނި އަގުބޮޑު ފްލައިޓްތައް ނޫން ކަމަށެވެ. މިހާރު ބަޖެޓު އެއާލައިންތަކާއި ހައިބްރިޑް ފްލައިޓްތައް ވެސް ގިނަކަން އޭނާ ފާހަގަކުރެއްވިއެވެ.
އެހެންވެ، މާކެޓުގައި ރާއްޖެ އޮތީ ކޮން ތަނެއްގައިތޯ ބަލައި، ގައުމީ ފެންވަރެއްގައި މި ކަންކަމަށް ހައްލު ހޯދަންޖެހޭކަން އޭނާ ފާހަގަކުރެއްވިއެވެ.
"އަޅުގަނޑުމެންގެ ބްރޭންޑިންއާއި އަޅުގަނޑުމެންގެ ޕޮޒިޝަނިން މެއިންޓެއިންކުރާނީ ކިހިނެއްތޯ ނެޝަނަލީ އެބަ ވިސްނަންޖެހޭ،" އޭނާ ވިދާޅުވިއެވެ.
މިދިޔަ 2024 ވަނަ އަހަރު ވެސް ރާއްޖެއަށް ދެ މިލިއަނަށްވުރެ ގިނަ ފަތުރުވެރިން ޒިޔާރަތްކުރިއެވެ. މި އަހަރު އެއަށް ވުރެ ގިނަ ފަތުރުވެރިން ގެންނަން ސަރުކާރުން ވަނީ އަމާޒު ކަނޑައަޅާފައެވެ. މިދިޔަ އަހަރު ރިކޯޑު އަދަދަކަށް ފަތުރުވެރިން ޒިޔާރަތްކުރި ނަމަވެސް އާމްދަނީ ދަށްވާކަމުގެ ކަންބޮޑުވުން ވަނީ ބޮޑުވެފައެވެ.
މި އަހަރުގެ ފުރަތަމަ ދުވަހުން ފެށިގެން ރިސޯޓުތަކުން ކޮންމެ ފަތުރުވެރިއެއްގެ ބޮލަށް 500 ޑޮލަރު މާރުކުރަން މަޖުބޫރުވީއިރު، ސަރުކާރުން ވަނީ ޓީޖީއެސްޓީއާއި އެއާޕޯޓު ޑިވޮލޮޕްމަންޓް ފީ އަދި ޑިޕާޗާ ޓެކްސް ބޮޑުކުރަން ނިންމައިފައެވެ.