ދެ ކްރޫޒްލައިނާއާއެކު ގިނަ އަދަދެއްގެ ޓޫރިސްޓުން މާލެއަށް

މާލެ ބޭރުގައި ބަނދަރު ކުރި ދެ ކުރޫޒުލައިނާއިން ގިނަ އަދަދެއްގެ ޓޫރިސްޓުން މާލެ ފައިބައިފިއެވެ.

އިއްޔެ އާއި މިއަދު އައި ދެ ކުރޫޒުލައިނާއާއެކު މި ސީޒަންގައި ރާއްޖެއަށް ވަނީ ތިން ޝިޕް ބަނދަރުކޮށްފައެވެ.

ސީޒަންގެ ދެވަނަ ކްރޫޒްލައިނާ، "އެމްއެސް ނޯވީޖިއަން ސްކައި" މާލެ އައިސްފައި ވަނީ އިއްޔެ ހެނދުނުގެ ވަގުތެއްގައެވެ. މި ކްރޫޒްލައިނާއިން 1872 ފަސިންޖަރުން އައިސްފައިވެއެވެ.

އެކްސްގައި ކުރި ޕޯސްޓެއްގައި މޯލްޑިވްސް އެސޯސިއޭޝަން ފޯ ޔޮޓް އެޖެންޓްސް (މާޔާ)އިން ބުނީ އެ ކްރޫޒްލައިން ރާއްޖޭގައި ދެ ދުވަސް ހޭދަކުރާނެ ކަމަށެވެ.

ސީޒަންގެ ތިން ވަނަ ކުރޫޒުލައިނާ ކަމަށްވާ, "އެމްއެސް ރިވިއޭރާ" ދެހާހެއްހާ ފަސިންޖަރުންނާއެކު މާލެ ބަނދަރު ކޮށްފައިވަނީ މިއަދު ހެނދުނެވެ.

އެ ދެ ކުރޫޒުލައިނާއިން ގިނަ އަދަދެއްގެ ޓޫރިސްޓުން އަންނަނީ މާލެ ފައިބަމުންނެވެ.

ސީޒަންގެ ފުރަތަމަ ކްރޫޒްލައިނާ، "އެމްއެސް އައިޑާ ސްޓެލާ" މާލެ އައިސްފައި ވަނީ މި މަހުގެ އަށް ވަނަ ދުވަހުއެވެ. މި ކްރޫޒްލައިނާއިން 2،140 ފަސިންޖަރުންނާއި 639 ފަޅުވެރިން ވަނީ އައިސްފައިވެއެވެ.

މާޔާގެ ރައީސް މުހައްމަދު ނަޝީދު މީގެ ކުރިން ބުނެފައި ވަނީ ސީޒަންގައި ގާތްގަނޑަކަށް 14 ނުވަތަ 15 ކްރޫޒްލައިނާ ރާއްޖެ އަންނާނެ ކަމަށް ލަފާކުރެވޭ ކަމަށެވެ. މި ސީޒަން ނިމޭނީ އަންނަ އަހަރުގެ މާޗު މަހަށް ކަމަށް ފާހަގަކުރައްވައި ނަޝީދު ވިދާޅުވީ މިއަހަރު ރާއްޖެ އަންނަ ކްރޫޒްލައިނާގެ އަދަދަކީ މާޔާއިން އުންމީދުކުރާ ވަރަށް ވުރެ ދަށް އަދަދެއް ކަމަށެވެ.

ކުރޫޒު ލައިނާތަކެއް ރާއްޖެ އަންނަން ފަށާފައިވާއިރު މި އަހަރު ރާއްޖެއަށް ޓޫރިސްޓުން ގެންނަން ކަނޑައެޅި އަމާޒު ކަމަށްވާ, ދެ މިލިއަން ވަނަ ފަތުރުވެރިޔާ ވަރަށް ފަހުން ވަނީ ރާއްޖެ ޒިޔާރަތް ކޮށްފައެވެ.