ފަތުރުވެރިކަމުން ބޮޑުކުރި ޓެކްސްތަކާ އެކު މި އަހަރު ލޯ ސީޒަން ކުރިއަށް ވުރެ ގޮންޖެހުން ބޮޑުވެދާނެ ކަމަށް ވަރަށް ގިނަ ފަރާތްތަކުން ބުނާ ކަމަށާއި އެ ކަމަށް މިހާރު ވެސް ތައްޔާރުވަމުން އަންނަ ކަމަށް ފަތުރުވެރިކަން އިޝްތިހާރުކުރާ އެމްއެމްޕީއާރުސީގެ ޗެއާޕާސަން އަދި މަޓާޓޯގެ ރައީސް އަބްދުﷲ ގިޔާސް ވިދާޅުވެއްޖެއެވެ.
ފަތުރުވެރިން އަތުން ނަގައި ތިން ޓެކުހެއް ބޮޑުކުރަން ސަރުކާރުން ވަނީ ނިންމައިފައެވެ. އެއީ، ޑިޕާޗާ ޓެކުހާއި ޓީޖީއެސްޓީ އަދި އެއާޕޯޓް ޑިވޮލޮޕްމަންޓް ފީއެވެ.
ބޮޑުކުރި ޓެކްސްތަކާ އެކު އަދި ޚާއްސަކޮށް ރާއްޖެއާ ވާދަވެރި ގައުމުތަކުން ކުރާ މަސައްކަތްތަކާ އެކު މި އަހަރު ފަތުރުވެރިކަމަށް ހުރި ގޮންޖެހުންތަކާ ގުޅޭ ގޮތުން ކުރި ސުވާލަކަށް ޖަވާބުދެއްވަމުން ސަންގެ 'އެޑިޓަރުގެ ސުވާލު' ޕްރޮގްރާމްގައި އަބްދުﷲ ވިދާޅުވީ، މި އަހަރުގެ ލޯ ސީޒަންގައި ރާއްޖެއަށް ގޮންޖެހުން ބޮޑުވާނެ ކަމަށް ގިނަ ބަޔަކު ބުނާ ކަމަށެވެ.
"އަޅުގަނޑުމެން ވެސް މި ދަނީ ނަމްބާސް ޖަހަމުން. އެއާލައިން ފޯކާސްޓްތަކެއް ވެސް އެބަ ހެދޭ ކިހިނެއްތޯ މި އަހަރު ވާނީ،" އޭނާ ވިދާޅުވިއެވެ.
އޭނާ ވިދާޅުވީ، ޓެކްސް ބޮޑުކުރި ދަނޑިވަޅުގެ ފައިދާ ވާދަވެރި ފަރާތްތަކުން ނެގި ކަމަށެވެ. އެކަމަކު، ޓެކްސް ބޮޑުކުރުމަކީ ވެސް ސަރުކާރަށް އިތުރު ގޮތެއް ނެތިގެން ކުރި ކަމެއްގެ ގޮތުގައި އޭނާ ވަނީ ފާހަގަކުރައްވައިފައެވެ. އެއީ، ދުނިޔޭގެ މާލީ އިދާރާތަކުން ވެސް ގޮވާލައި ކަމެއްކަން އޭނާ ފާހަގަކުރެއްވިއެވެ.
"އަޅުގަނޑަށް ހީވަނީ ސަރުކާރުން ވެސް ވަރަށް ޗޮއިސްލެސްހެން މި ވަގުތު. ކޮންމެހެން އަޅުގަނޑު ޑިފެންޑްކުރާކަށް ނޫން... ކަން މި އޮތީވެފައި. ސުވާލަކީ ދެން އަޅުގަނޑުމެން ކުރާނީ ކީއްތޯ؟،" އޭނާ ވިދާޅުވިއެވެ.
އަބްދުﷲ ވިދާޅުވީ، މި އަހަރު ފަތުރުވެރިކަމަށް އޮތް ގޮންޖެހުމަކީ ހަމައެކަނި ބޮޑުކުރި ޓެކްސްތައް ނޫން ކަމަށެވެ. އެ ގޮތުން، ރަޝިއާއާއި ޔޫކްރެއިނާ ދެމެދު ހިނގާ ހަނގުރާމައިގެ ސަބަބުން ވެސް މި ފަހުން ވެސް ފްލައިޓްތަކެއް ކެންސަލްވިކަން ފާހަގަކުރައްވައި އޭނާ ވިދާޅުވީ، މިއީ ދުނިޔޭގެ މަސްރަހަށް ބަލާއިރު ވެސް ވަރަށް ގޮންޖެހުން ބޮޑު ވަގުތެއް ކަމަށެވެ.
މަޓާޓޯގެ ބޭފުޅުން މީގެ ކުރިން މަޖިލީހުގެ ކޮމިޓީއެއްގައި: އަބްދުﷲ ވިދާޅުވީ، މި އަހަރުގެ ލޯ ސީޒަނަށް ތައްޔާރުވާ ކަމަށް -- ފޮޓޯ/ ޕީއެސްއެމް
"މި ހަފުތާގައި ކަންތައްތައް ހުންނަ ގޮތަކަށް ނޫން އަންނަ ހަފުތާގައި ކަންތައްތައް ހުންނަނީ. ވަރަށް އިވޯލްވިން ވަރަށް ޗެލެންޖިން ޓައިމެއްގައި އަޅުގަނޑުމެން މި އުޅެނީ،" އޭނާ ވިދާޅުވިއެވެ.
އަބްދުﷲ ވިދާޅުވީ، އަމާޒަކީ ރާއްޖޭގައި ހުރި 62،000 ބެޑް އެންމެ އެކަށޭނަ އަގުގައި ވިއްކުން ކަމަށެވެ. އެކަން ކުރެވޭނީ ވަރަށް ވިސްނުންތެރިކަމާ އެކު އެންމެން ގުޅިގެން ވަރަށް އިސްތިރާޖީ މަސައްކަތްތަކެއް ކޮށްގެންކަން އޭނާ ފާހަގަކުރެއްވިއެވެ.
އެ ގޮތުން، ލޯ ސީޒަނާ ދިމާކޮށް ވެލާނާ އިންޓަނޭޝަނަލް އެއާޕޯޓު (ވީއައިއޭ)ގައި ވެސް އެއާލައިންތަކަށް ޚާއްސަ އޮފާތަކެއް ހުށަހަޅަންޖެހޭ ކަމަށް އޭނާ ގަބޫލުކުރައްވައެވެ. އެއީ، އެ ދުވަސްވަރު ގިނަ ފްލައިޓްތަކެއް ގެންނަން މަސައްކަތްކުރާށެވެ.
ގޮންޖެހުންތައް ހުރި ނަމަވެސް އެއާޕޯޓުގެ އާ ޓާމިނަލަކީ ލިބޭނެ ފަހި ފުރުސަތެއްގެ ގޮތުގައި އަބްދުﷲ ފާހަގަކުރެއްވިއެވެ.
އޭނާ ވިދާޅުވީ، ވީއައިއޭގެ އާ ޓާމިނަލް ހުޅުވުމަކީ ދިވެހި ފަތުރުވެރިކަމަށް ލިބޭނެ ވަރަށް ބޮޑު ވަރަށް ފަހި ފުރުސަތެއް ކަމަށެވެ. އެހެންވެ، އެ ފަދަ ފުރުސަތުތަކުގެ ފައިދާ ނަގަން ވެސް މި އަހަރު މަސައްކަތްކުރަން ޖެހޭ ކަމަށް އޭނާ ގަބޫލުކުރައްވައެވެ.
ނިމުނު 2024 ވަނަ އަހަރު ވެސް ރާއްޖެއަށް ދެ މިލިއަނަށްވުރެ ގިނަ ފަތުރުވެރިން ޒިޔާރަތްކުރިއެވެ. އެއީ، ރިކޯޑު އަދަދެކެވެ. ސަރުކާރުން ވަނީ މި އަހަރު އެއަށްވުރެ ގިނަ ފަތުރުވެރިން ގެންނަން އަމާޒު ހިފާފައެވެ.
ފަތުރުވެރިން އަތުން ނަގައި ތިން ޓެކުހެއް ގާތްގަނޑަކަށް ދެގުނަ ބޮޑުކުރީއިރު، ރިސޯޓުތަކުން ކޮންމެ ފަތުރުވެރިއެއްގެ ބޮލަކަށް 500 ޑޮލަރު ދިވެހި ބޭންކްތަކަށް މާރުކުރަން މަޖުބޫރުކުރާ ގާނޫނަށް ވެސް މި އަހަރުގެ އެއްވަނަ ދުވަހުން ފެށިގެން ވަނީ އަމަލުކުރަން ފަށާފައެވެ.