ސްޓޭޓް ޓްރޭޑިން އޮގަނައިޒޭޝަން (އެސްޓީއޯ)އިން، މި އަހަރަށް ނެރެފައިވާ ޑިޖިޓަލް ކަލަންޑަރު، ސޮފްޓްވެއާ އަޕްޑޭޓަކާއެކު އަންނަ އަހަރު ވެސް ބޭނުންކުރެވޭ ގޮތް ހަދަން ނިންމައިފިއެވެ.
އެސްޓީއޯއިން ބުނީ މި އަހަރަށް އެ ކުންފުނިން ނެރުނު ޑިޖިޓަލް ކަލަންޑަރަކީ، އެ ކުންފުނިން ވިޔަފާރީގައިއާއި އާންމު ހިންގުމުގައި ގެންގުޅޭ ސަސްޓެއިނަބިލިޓީ، އިނޮވޭޝަން، އަދި ޑިޖިޓަލް ޓްރާންސްފޯމަޝަން ވިސްނުމުގައި ކުރިއަށް ދިޔުމަށް އެޅުނު ބިންގަލެއް ކަމަށެވެ.
އެ ބިންގަލާއެކު އެސްޓީއޯއިން ނިންމައިފައިވަނީ، ކުރީ އަހަރުތަކާ ޚިލާފަށް އަންނަ އަހަރަށް އެ ކަލަންޑަރު ސޮފްޓްވެއާ އަޕްޑޭޓަކާއެކު 'ރިޔޫސް' ކުރުމަށް ކަމަށް އެ ކުންފުނިން ބުންޏެވެ. އެ ނިންމުމަކީ އެސްޓީއޯ ހިންގުމުގައި ގެންގުޅޭ ދެމެހެއްޓެނިވި ވިސްނުންތަކާއި އުސޫލުތަކާއެކު، އެސްޓީއޯގެ ޕޭޕަލެސް ޕޮލިސީގެ ދަށުން ތިމާވެއްޓަށް ކުރާ އަސަރު ކުޑަކުރުމަށް ކުރަމުންދާ މަސައްކަތްތަކަށް އިތުރު ބާރުދިނުމަށް ނިންމާފައިވާ ނިންމުމެއް ކަމަށް އެ ކުންފުނިން ބުންޏެވެ.
އަންނަ އަހަރުގެ ސޮފްޓްވެއާ އަޕްޑޭޓާއެކު މިފަހަރުވެސް އެސްޓީއޯ ޑިޖިޓަލް ކަލަންޑަރު ވާނީ އިތުރު ފަސޭހަތަކެއް ލިއްބައިދޭ, މަގުބޫލު ވަސީލަތަކަށް ކަމަށް އެ ކުންފުނިން ބުންޏެވެ.
''ރީޔޫސް، އަޕްޑޭޓް، ޓްރާންސްފޯމް'' ޝިއާރުގެ ދަށުން އެސްޓީއޯއިން އަޅައިފައިވާ ފިޔަވަޅުތަކާއި އޭގެ ފައިދާ
- އެސްޓީއޯއިން ކަރުދާހަށް ކުރާ ހޭދަ ކުޑަކުރުމުގެ ސިޔާސަތުގެ ދަށުން ކުންފުނީގެ ހިންގުމުގައި ކަރުދާސް ބޭނުންކުރާ މިންވަރު ވަނީ ވަރަށް ބޮޑުތަނުން ދަށްކުރެވިފައި
- ޕްރިންޓްކުރެވޭ ކަލަންޑަރުތައް އުފެއްދުމާއި އުފުލުމުގައި ކާބަން ބޭރުވާ މިންވަރު ހީވެސް ނުކުރާހާ މަތި. މީގެ ކުރިން އެސްޓީއޯއިން އައީ އަހަރެއްގެ މައްޗަށް އާންމުކޮށް އަށެއްކަހާސް ކަލަންޑަރު ޕްރިންޓު ކުރަމުން. ޑިޖިޓަލް ކަލަންޑަރުގެ ސަބަބުން އަލުން ޕްރިންޓްކުރަން ނުޖެހި، ކުނި އުފެދުމާއި ތިމާވެއްޓަށް ދެވޭ ގެއްލުން ވަރަށް ބޮޑަށް ކުޑަކުރެވޭ.
- ތިމާވެއްޓަށް ލިބޭ ބައެއް ފައިދާތައް: ގަސްތައް ސަލާމަތްވުން، ކުނިގޮނޑުތަކަށް އުކާލެވޭ ކުނި މަދުވުން، އަދި ކާބަން ފުޓްޕްރިންޓް ކުޑަވުން. ކޮންމެ އަހަރަކު ކަލަންޑަރު ޕްރިންޓްކުރުމަށް ގިނަ އަދަދެއްގެ ކަރުދާހާއި ދެލި ބޭނުން ކުރުމުގެ ސަބަބުން ގަސްކެނޑުމާއި ތިމާވެށި ތަޣައްޔަރުވުމަށް މަގުފަހިވޭ.
- ކޮންމެ އަހަރަކު އައު ކަލަންޑަރެއް ތައާރަފުކުރުމަށް އެތަކެއް ވަގުތާއި ވަސީލަތެއް ހޭދަވޭ. ރިޔޫސް ކުރެވޭ ޑިޖިޓަލް ކަލަންޑަރުގެ ސަބަބުން މިލިއަނުން ސަލާމަތްކުރެވި، އެހެނިހެން ކަންކަމަށް މިވަސީލަތްތައް ރިލޮކޭޓްކުރެވޭ.
އަޕްޑޭޓްކޮށްފައިވާ ޑިޖިޓަލް ކަލަންޑަރުގައި ހިމެނޭނީ:
- 2025 ވަނަ އަހަރުގެ ރަސްމީ ބަންދު ދުވަސްތަކާއި އެސްޓީއޯއަށް ޚާއްސަ އިވެންޓްތަކުގެ މުހިންމު ތާރީޚުތަކާއި ހަރަކާތްތަކުގެ މައުލޫމާތު.
- އާ ތީމްތަކާއި ވިޝުއަލްސްގެ އިތުރުން ކަސްޓަމް ރިމައިންޑާސް، އަދި އެސްޓީއޯގެ ބައެއް ބްރޭންޑްތަކުގެ މައުލޫމާތު.
- 2025 ވަނަ އަހަރުގެ ސޮފްޓްވެއާ އަޕްޑޭޓްކުރަން ފަސޭހަވާނެ. މިކަމުގެ މައުލޫމާތާ އިރުޝާދު އެސްޓީއޯ ވެބްސައިޓާއި ސޯޝަލްމީޑިއާ މެދުވެރިކޮށް ހިއްސާކުރާނެ.
- އައު ސޮފްޓްވެއާގައި އިނޮވޭޝަނާއި ޔޫޒަ އެކްސްޕީރިއަންސަށް އަހައްމިއްޔަތުކަން ދެވިފައިވާނެ.
- ފަސޭހައިން ސޮފްޓްވެއާ އަޕްޑޭޓް ކުރެވުމުގެ އިތުރުން، ޑިޖިޓަލް ޓޫލްތަކާ ގުޅުވުމާއި، ބޭނުންހިފޭ އިތުރު ކަންކަން ހިމެނިގެންދާނެ.
އެސްޓީއޯއިން ވަނީ، މިއީ ކޮންމެ އަހަރަކު އައު ކަލަންޑަރެއް އުފެއްދުމަށް ވަސީލަތްތައް ބޭނުންކުރުމުގެ ބަދަލުގައި އެއްފަހަރަށްވުރެ ގިނަފަހަރު ބޭނުންކުރެވޭ ކަލަންޑަރުތައް އިޚްތިޔާރުކުރުމަށް އެހެން ފަރާތްތަކަށްވެސް ހިތްވަރުދިނުމަށް ކުރާ ކަމެއް ކަމަށެވެ.