އިނގިރޭސި ޕްރިމިއާ ލީގުގައި ލިވަޕޫލާ އެންމެ ގާތުން ވާދަކުރާ ޗެލްސީއަށް ޝޮކެއް ދީ، އިޕްސްވިޗް ޓައުންއިން ތިން ޕޮއިންޓު ދަމައިގެންފިއެވެ.
އިޕްސްވިޗްގެ ދަނޑުގައި ކުޅުނު މި މެޗު އެ ޓީމުން ކާމިޔާބުކޮށްފައިވަނީ ގިނަ ބަޔަކު ހައިރާންކޮށްލުމަށް ފަހު 2-0 އިންނެވެ.
މެޗުގެ ބޮޑުބައި ކޮންޓްރޯލްކޮށްގެން ކުޅުނީ ވެސް ޗެލްސީންނެވެ. ގިނަ ހަމަލާތަކެއް އުފެއްދި ނަމަވެސް އިޕްސްވިޗްގެ ޑިފެންސް ފޫއަޅުވައެއް ނުލެވުނެވެ.
މެޗުގެ 12 ވަނަ މިނެޓުގައި ޗެލްސީގެ ކީޕަރު ފިލިޕް ޔޯގެންސަން ކައިރިން އިޕްސްވިޗްގެ ފޯވަޑް ލިއަމް ޑެލަޕް ސަލާމަތްވާން އުޅުމުގެ ތެރޭގައި ޔޯގެންސެން ކުރި ފައުލަކާ ގުޅިގެން އިޕްސްވިޗަށް ޕެނަލްޓީއެއް ލިބުނެވެ. މި ޕެނަލްޓީ ކާމިޔާބުކޮށް، މެޗުގެ ލީޑު އިޕްސްވިޗަށް ނަގައިދިނީ ޑެލެޕެވެ. ފުރަތަމަ ހާފުގައި ޗެލްސީގެ ޖާއޮ ފީލިކްސް އިޕްސްވިޗްގެ ގޯލަށް ބޯޅަ ވައްދާލި ނަމަވެސް ވީއޭއާރުން ވަރަށް ގިނައިރު ބެލުމަށް ފަހު ނިންމާފައިވަނީ އެއީ އޮފްސައިޑް ލަނޑެއް ކަމަށެވެ.
އިޕްސްވިޗްގެ ދެވަނަ ލަނޑު، 53 ވަނަ މިނެޓުގައި ޗެލްސީގެ އެކްސެލް ޑިސާސީއަށް ހެދުނު ގޯހެއްގެ ފައިދާ ނަގައި ޑެލެޕް ތަނަވަސްކޮށްދިން ފުރުސަތެއްގައި ކާމިޔާބުކޮށްފައިވަނީ އޮމާރީ ހަޗިސަނެވެ.
މި ކާމިޔާބީއާ އެކު އިޕްސްވިޗް މިވަނީ 19 މެޗުން ލިބިފައިވާ 15 ޕޮއިންޓާ އެކު 18 ވަނައަށް ކުރިއަށް ޖެހިލާފައެވެ. އަދި، 17 ވަނައިގައި އޮތް ވުލްވަހެމްޕްޓަން ވޮންޑަރާސްއާ ޕޮއިންޓަކާ ގާތްކޮށްފައެވެ. އެހެންވެ، ރެލިގޭޝަނުން ސަލާމަތްވާން ކުރަމުން އަންނަ މަސައްކަތަށް ވަނީ އުންމީދެއް ލިބިފައެވެ.
މެޗުން ބަލިވުމާ އެކު ޗެލްސީ މިހާރު މިވަނީ ޖެހިޖެހިގެން ދެވަނަ މެޗުން ބަލިވެފައެވެ. މިހާރު އޮތީ 35 ޕޮއިންޓާ އެކު ފަސްވަނައިގައެވެ. އެއްވަނައިގައި އޮތް ލިވަޕޫލާއި ދެމެދުގައި 10 ޕޮއިންޓުގެ ފަރަގެއް މިހާރު އެބައޮތެވެ.