މީލާދީ އާ އަހަރުގެ ފެށުމާ ދިމާކޮށް 'މޯލްޑިވްސް ކަލްޗާ އެންޑް ފުޑް ފެސްޓިވަލް' ނަމުގައި ދެ ދުވަހަށް ޚާއްސަ ހަރަކާތެއް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ން ބާއްވަން ނިންމައިފިއެވެ.
މިއަދުން ފެށިގެން މާދަމާ ރޭގެ ނިޔަލަށް މި ހަރަކާތް ކުރިއަށްދާނީ ހުޅުމާލޭ ސެންޓްރަލް ޕާކުގައެވެ.
މިއީ ދިވެހިންނާއި ފަތުރުވެރިންނަށް ވެސް ތަފާތު ތަޖުރިބާއެއް ލިބޭނެ ފެސްޓިވަލެއް ކަމަށާއި ޝައުގުވެރި ހުށަހެޅުންތަކާއި އިންޓަރެކްޓިވް ހަރަކާތްތަކާއި ދިވެހި ކެއުންތަކުގެ ސްޓޯލްތަކުން ފުރިފައިވާ ޕްރޮގްރާމެއް ކަމަށް އެމްއެމްޕީއާރުސީން ބުންޏެވެ.
ފެސްޓިވަލް މިރޭ 20:00 ގައި ފަށަން ވަނީ ނިންމާފައެވެ. މި ހަރަކާތުގައި ދިވެހިރާއްޖެއަށް ފަތުރުވެރިއަކު ޒިޔާރަތް ކުރާ ދަތުރު ދައަކާލުމުގެ ޑްރޯން ޝޯއަކާއި ބޮޑުބެރުގެ ހުށަހެޅުންތަކާއި، ދަފި ނެގުން ފަދަ ޝައުގުވެރި ސަގާފީ ހަރަކާތްތައް އެކުލެވޭނެވެ.
މީގެ އިތުރުން، އާ އަހަރަށް މަރުހަބާ ކިޔަން މިރޭ 11:59 ގައި ހަވާއަރުވަން ވަނީ ނިންމާފައެވެ.
މާދަމާ ހަވީރު 16:00 އިން 22:00 އަށް ވެސް މި ފެސްޓިވަލް ބާއްވަން ހަމަޖެހިފައިވެއެވެ. މާދަމާ ފެސްޓިވަލް އޮންނާނީ އާއިލާތަކަށް ޚާއްސަ ގިނަ ހަރަކާތްތަކާ އެކުއެވެ.
މާދަމާ ވެސް ކާބޯތަކެއްޗާއި ސަގާފީ ސްޓޯލްތައް ދައްކާލާނެ ކަމަށާއި ފުލުހުންނާއި ފަޔާ ޓްރަކް ހުށަހެޅުމަކާއި ކްލައިމްބިން ވޯލް އާއި ބައުންސް ހައުސް އަދި ޓްރާންސްފޯމާސް ޑިސްޕްލޭއެއް ވެސް ހިމެނޭނެ ކަމަށް އެމްއެމްޕީއާރުސީން ބުންނެވެ. ބޮޑުބެރު ހުށަހެޅުންތަކާއި ފޯރިގަދަ ރޮބޯމޭން ޝޯކޭސްއެއް ވެސް އޮންނާނެއެވެ.
"މި އާ އަހަރާ ދިމާކޮށް މޯލްޑިވްސް ކަލްޗާ އެންޑް ފުޑް ފެސްޓިވަލް ބޭއްވުމަކީ އެމްއެމްޕީއާރުސީއިން ފަޚުރުވެރިވާ ކަމެއް،" އެމްއެމްޕީއާރުސީގެ ސީއީއޯ އަދި އެމްޑީ އިބްރާހިމް ޝިއުރީ ވިދާޅުވިއެވެ.
ޝިއުރީ ވިދާޅުވީ، މި ހަރަކާތުގައި މި އަހަރު ދިވެހިރާއްޖޭގެ ކާމިޔާބީތައް ފާހަގަކުރުމާއި، ރާއްޖޭގެ ތަފާތު ސަގާފީ ތަރިކަ ޕްރޮމޯޓްކުރާނެ ކަމަށެވެ. މިއީ ދިވެހިންނާއި ފަތުރުވެރިންނަށް އާ ތަޖުރިބާއެއް ހޯދައިދިނުމަށް ކުރިއަށް ގެންދާ މުހިންމު ހަރަކާތެއް ކަމަށް އޭނާ ވިދާޅުވިއެވެ.
އެމްއެމްޕީއާރުސީން މި ހަރަކާތް ކުރިއަށްގެންދަނީ ޓޫރިޒަމް މިނިސްޓްރީއާއި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އާއި މައި-ހުޅުމާލެ'، ބިޒްނަސް ސެންޓާ ކޯޕަރޭޝަން (ބީސީސީ)އާއި، މާލެ' ސިޓީ ކައުންސިލާއި، ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ)އާއި، މޯލްޑިވްސް ޕޮލިސް ސާވިސާއި، މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)އާއި، ޕަބްލިކް ސާވިސް މީޑިއާ (ޕީއެސްއެމް)އާއި، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)އާއި، ދިރާގާއި، އުރީދޫއާއި، މަންޓާ އެއާއާއި، މޯލްޑިވިއަންއާއި, އޭސް ޓްރެވަލްސް، އަދި ގަލްފް އެއާއާ ގުޅިގެންނެވެ.
އާ އަހަރާ ދިމާކޮށް ކޮންމެ އަހަރަކު ވެސް ކުލަގަދަ ހަރަކާތްތައް ބާއްވައެވެ.