ދިވެހިރާއްޖޭގެ މުއްސަނދި ސަގާފަތާއި އާދަކާދަތައް ބައިނަލްއަގުވާމީ ދުނިޔެއަށް ދައްކާލުމުގެ ގޮތުން، މި އަހަރުގެ ޢީދު ފާހަގަކުރަން ވިޒިޓް މޯލްޑިވްސް ކޯޕަރޭޝަން (ވީއެމްސީ)އިން ރ. މީދޫގައި ޚާއްސަ ކެމްޕޭނެއް ފަށަން ނިންމައިފިއެވެ.
"ވިޒިޓް މޯލްޑިވްސް ޓު ޝޯކޭސް ދަ ބެސްޓް އޮފް މޯލްޑިވިއަން ކަލްޗާ ދިސް ޢީދު"ގެ ނަމުގައި ކުރިއަށްގެންދާ މި ހަރަކާތުގެ ދަށުން، ޙައްޖު ދުވަހުން ފެށިގެން މި މަހުގެ 30 ވަނަ ދުވަހުގެ ނިޔަލަށް މީދޫގެ ޢީދު ހަރަކާތްތައް ލައިވްކޮށް ގެނެސްދޭނެއެވެ.
މިއީ ރާއްޖޭގެ މަޝްހޫރު ލަގްޒަރީ ފަތުރުވެރިކަމުގެ އިތުރުން، ދިވެހިންގެ އަސްލު ދިރިއުޅުމާއި ސަގާފީ އާދަކާދަތައް ފަތުރުވެރިންނަށް ތަޖުރިބާކުރުމުގެ ފުރުސަތު ހޯދައިދިނުމަށް ވީއެމްސީން ކުރިއަށްގެންދާ މުހިންމު ހަރަކާތެކެވެ.
މި ފަސް ދުވަހުގެ ކަވަރޭޖުގައި ވިޒިޓް މޯލްޑިވްސްގެ ޓީމުތަކުން މީދޫގައި ހަރަކާތްތެރިވާނެއެވެ. އަދި، އެ ކޯޕަރޭޝަނުގެ ސޯޝަލް މީޑިއާ މަންސަތަކާއި ޑިޖިޓަލް ޗެނަލްތައް މެދުވެރިކޮށް، ޢީދުގެ އުފާވެރި މާހައުލާއި، މުޖުތަމައުގެ އެއްބައިވަންތަކަން ދައްކުވައިދޭ މަންޒަރުތައް ވަގުތުން ގެނެސްދޭނެއެވެ. މީގެ އިތުރުން، ހަރަކާތްތަކުގެ ފަހަތުގައިވާ ތާރީޚީ ވާހަކަތަކާއި، ރަށުގެ ރައްޔިތުން ޢީދަށް ތައްޔާރުވާ ގޮތުގެ ޚާއްސަ ސެގްމަންޓުތައް ވެސް މި ކެމްޕޭނުގެ ތެރެއިން އާންމުންނާ ހަމައަށް ފޯރުކޮށްދިނުމަށް ވަނީ ހަމަޖެހިފައެވެ.
މި ކެމްޕޭނުގެ އަމާޒަކީ ދިވެހި ރަށްފުށުގެ ދިރިއުޅުމުގެ ތަފާތު ސިފަތައް ފާހަގަކުރަމުން، ރާއްޖޭގެ ސަގާފަތާއި ތަރިކައަކީ މަންޒިލްގެ ތަޖުރިބާގެ މައިގަނޑު ބައެއްގެ ގޮތުގައި ދައްކާލުމެވެ.
ރ. މީދޫ ހުޅަނގު އަވަށު ވެދުމާ ދިއުން: މި އަހަރު ވެސް ގިނަ ހަރަކާތްތަކެއް އެބަހުރި -- ފޮޓޯ/ މީދޫ ހުޅަނގު އަވަށު ޢީދު އުފާ
މި ކެމްޕޭނުގައި މީދޫގެ ގިނަ ސަގާފީ ކުޅިވަރުތަކެއް ދައްކާލުމަށް ވަނީ ހަމަޖެހިފައެވެ. އޭގެ ތެރޭގައި އެންމެ ފާހަގަކޮށްލެވެނީ "ވެދުމާ ދިޔުން" މި ހަރަކާތެވެ. މިއީ ޢީދުގެ ކުޅިވަރުތައް ފެށުމުގެ ކުރިން ރަށުގެ އިސްރަށްވެހިންނާއި ވެރިންގެ ކިބައިން ހުއްދަ ހޯދުމަށް ކުރިއަށްގެންދާ ޒަމާންވީ އާދައެކެވެ. މީގެ އިތުރުން، ދިވެހިންގެ ކަނޑުމަތީގެ ދިރިއުޅުމާ ގުޅިފައިވާ "ބޮޑުމަސް" ދުއްވުމުގެ ހަރަކާތް ވެސް މި ކަވަރޭޖުން ފެންނާނެއެވެ. ރުކުގެ ފަނުންނާއި އެހެނިހެން ތަކެތިން ހަދާފައިވާ ބޮޑު މަހެއް ރަށުތެރޭގައި ދުއްވާއިރު، މިއީ ޢީދުގައި އެންމެ ގިނަ ބައެއްގެ ސަމާލުކަން ލިބޭ އެއް ކުޅިވަރެވެ.
މީދޫގެ ޢީދު ކުޅިވަރުތަކުގެ ތެރެއިން ދެން އެންމެ ހާއްސަވާނީ "މާލި ނެށުން" އަދި "ކޯޑި ކެނޑުން" މި ދެ ހަރަކާތެވެ. ބޮޑުބެރުގެ ހިތްގައިމު ރިދަމްތަކާ އެކު ކުރިއަށްދާ މާލި ނެށުމުގައި، ބައިވެރިން ފެންނާނީ ފަނާއި ރަށުން ލިބެން ހުންނަ ތަކެތި ބޭނުންކޮށްގެން ތައްޔާރުކޮށްފައިވާ ތަފާތު ކޮސްޓިއުމްތަކުގައެވެ.
މި ހަރަކާތާ ގުޅޭގޮތުން ވިޒިޓް މޯލްޑިވްސް ކޯޕަރޭޝަނުގެ ސީއީއޯ އަދި މެނޭޖިން ޑިރެކްޓަރު އިބްރާހީމް ޝިއުރީ ވިދާޅުވީ، ދިރިހުރި ސަގާފަތްތަކާއި މުޖުތަމައުގެ އުފާފާޅުކުރުންތައް ދައްކާލުމަކީ ރާއްޖޭގެ ފަތުރުވެރިކަމުގެ ވާހަކަތައް އިތުރަށް ވަރުގަދަކުރުމަށް މުހިންމު ކަމެއް ކަމަށެވެ.
"ރާއްޖެ ބައްޓަންވެފައިވަނީ ހަމައެކަނި ގުދުރަތީ ރީތިކަމަކުން ނޫން، އަދި އަޅުގަނޑުމެންގެ ސަގާފީ އައިޑެންޓިޓީ ހިމާޔަތްކުރާ އާދަކާދަތަކާއި، މީހުންނާއި، މުޖުތަމައުތަކުން ވެސް މެ. މި ކެމްޕޭނުގެ ޒަރީއާއިން އަޅުގަނޑުމެން ބޭނުންވަނީ ދިވެހި ރަށެއްގެ ޢީދުގެ ހޫނުކަމާއި، އުފެއްދުންތެރިކަމާއި، ރޫހު އަސްލު އަދި މާނަހުރި ގޮތެއްގައި ބައިނަލްއަގުވާމީ އޯޑިއަންސްތަކަށް ތަޖުރިބާކުރުމުގެ ފުރުސަތު ދިނުން،" ޝިއުރީ ވިދާޅުވިއެވެ.
އޭނާ ވަނީ މި ކެމްޕޭނަށް ރ. މީދޫ ކައުންސިލާއި، އެ ރަށުގެ ހުޅަނގު އަވަށާއި އިރުމަތީ އަވަށުގެ ރައްޔިތުންގެ ފަރާތުން ލިބޭ އެއްބާރުލުން ފާހަގަކުރައްވައި ޝުކުރު އަދާކުރައްވާފައެވެ.
މި ލައިވް ކަވަރޭޖަށް ފަހު ވެސް ވިޒިޓް މޯލްޑިވްސްއިން އަންނަ މަހުން ފެށިގެން އެ ކޯޕަރޭޝަނުގެ ޔޫޓިއުބް ޗެނަލް މެދުވެރިކޮށް މީދޫގެ ޢީދު ހަރަކާތްތަކުގެ ތަފުސީލީ ވީޑިއޯތަކާއި، ރަށުގެ ރައްޔިތުންގެ އިންޓަވިއުތަކާއި، ސަގާފީ ވާހަކަތައް ހިމެނޭ ދިގު ކޮންޓެންޓްތައް އާންމުކުރަން ފަށާނެއެވެ. މިއީ ރާއްޖެއަކީ ހަމައެކަނި މޫދު ރީތި މަންޒިލެއްގެ ބަދަލުގައި، މުއްސަނދި ސަގާފަތެއް އޮތް ގައުމެއްގެ ގޮތުގައި ދުނިޔެއަށް އިޝްތިހާރުކުރުމަށް ވީއެމްސީން ފަށާފައިވާ ދިގު މުއްދަތުގެ ސްޓްރެޓެޖީގެ ދަށުން ކުރިއަށްގެންދާ މަސައްކަތެކެވެ.