އަސްކަރީ ގާނޫނު އިއުލާނުކުރުމާ ގުޅިގެން ދެކުނު ކޮރެއާގެ ރައީސް ޔޫން ސުކް ޔޮލް ހައްޔަރުކުރުމުގެ އަމުރެއް ނެރެދިނުމަށް އެ ގައުމުގެ ކޮރަޕްޝަން އިންވެސްޓިގޭޝަން އޮފިސަރުން އެދިއްޖެއެވެ.
ރިޕޯޓްތައް ބުނާ ގޮތުގައި ޖޮއިންޓް އިންވެސްޓިގޭޝަން ޓީމަކުން ކޯޓު އަމުރު ނެރެދިނުމަށް އެދުނީ ސަރުކާރާ ދެކޮޅަށް ބާޣާވަތެއް ގެނަން މަސައްކަތްކުރުމާއި ނަހަމަ ގޮތުގައި ބާރުގެ ބޭނުން ހިފި ކަމަށް ތުހުމަތުވާ ދައުވާގެ މައްސަލައިގައި ޔޫންއާ ސުވާލުކުރަން ހާޒިރުވެވަޑައިގަތުމަށް ފޮނުވި ތިން ޗިޓަކަށް އިޖާބަ ނުދެއްވުމުންނެވެ.
މި މަހުގެ ހަތަރުވަނަ ދުވަހު ޔޫން އަސްކަރީ ގާނޫނު އިއުލާނުކުރެއްވުމާ ގުޅިގެން ދެކުނު ކޮރެއާގައި ވަރަށް ބޮޑު ސިޔާސީ ހަމަނުޖެހުމެއް އުފެދުނެވެ.
ޔޫން މަގާމުން ދުރުކުރުމަށް ގާނޫނު ހަދާ މަޖިލީހުގެ އަޣުލަބިއްޔަތުން ފާސްވުމާ ގުޅިގެން މި މަހުގެ 14 ވަނަ ދުވަހުން ފެށިގެން ޔޫން ހުންނަވަނީ މަގާމުން ދުރުކުރައްވާފައެވެ. ރައީސްގެ ބާރުތަކާއި ޒިންމާތައް ވަނީ އަތުލައިފައެވެ. އެ ޒިންމާތަކާ ހަވާލުވެވަޑައިގަންފައިވަނީ ބޮޑުވަޒީރު ހާން ޑަކް ސޫއެވެ.
ރައީސްގެ އިތުބާރު ނެތްކަމުގެ މައްސަލަ ދެން ފޮނުވާނީ ގައުމުގެ ދުސްތޫރީ ކޯޓަށެވެ. އެ ކޯޓަށް ޔޫން މަގާމުން ދުރުކުރުމާ ގުޅޭ ގޮތުން ގޮތް ނިންމަން 180 ދުވަސް ލިބޭނެއެވެ. ރައީސް މަގާމުން ދުރުކުރަން ކޯޓުން ވެސް ނިމްމައިފި ނަމަ، ޔޫން ވާނީ ދެކުނު ކޮރެއާގެ ތާރީޚުގައި އިތުބާރު ނެތް ކަމުގެ ވޯޓަކުން މަގާމުން ދުރުކުރި ދެވަނަ ރައީސަށެވެ.
މި މަހުގެ ތިންވަނަ ދުވަހު ޔޫން އަސްކަރީ ގާނޫނު އިއުލާނުކުރެއްވީ އިދިކޮޅުން ބަޣާވާތެއް ކުރަން އުޅޭ ކަމަށާއި އުތުރު ކޮރެއާއާ ގުޅިގެން މަސައްކަތް ކުރާ ކަމަށް ތުހުމަތު ކުރައްވައެވެ. ނަމަވެސް، ގާނޫނު ހަދާ މަޖިލީހުން ފާސްނުވުމުން އަސްކަރީ ގާނޫނު ދެތިން ގަޑިއިރުތެރޭގައި ވަނީ އަނބުރާ ގެންދަވާފައެވެ.