މިދިޔަ މަހު ވެއްޓުނު, ދެކުނު ކޮރެއާގެ މަތިންދާބޯޓުގެ ފްލައިޓް ޑޭޓާ އާއި ކޮކްޕިޓް ވޮއިސް ރެކޯޑަރުތައް ހާދިސާ ހިނގުމުގެ ހަތަރު މިނެޓް ކުރިން ހުއްޓިފައިވާ ކަމަށް އެގައުމުގެ ޓްރާންސްޕޯޓް މިނިސްޓްރީން ބުނެފިއެވެ.
ޖެޖޫ އެއާގެ ފްލައިޓް ވެއްޓުނު ހާދިސާގައި 179 މީހުން މަރުވެފައިވާއިރު، މިއީ ދެކުނު ކޮރެއާގައި ހިނގި އެންމެ ނުރައްކާތެރި ވައިގެ އެކްސިޑެންޓެވެ. އެ ހާދިސާގައި ސަލާމަތްވީ ހަމައެކަނި ދެ ކެބިން ކްރޫއެވެ.
ޓްރާންސްޕޯޓު މިނިސްޓްރީން ބުނީ ބްލެކް ބޮކްސްތަކުގެ ރެކޯޑިން ހުއްޓެން މެދުވެރިވީ ކޮން ސަބަބަކާ ހުރެތޯ ބަލާނެ ކަމަށެވެ. އަދި އޭގެއިން ލިބެން ހުރި މައުލޫމާތު ތަހުގީގުގައި ބޭނުންކުރާނެ ކަމަށް އެ މިނިސްޓްރީން ބުންޏެވެ.
އެ ރެކޯޑަރުތައް އެންމެ ފުރަތަމަ ބަލާފައި ވަނީ ދެކުނު ކޮރެއާގައި ކަމަށް ވެސް އެ މިނިސްޓްރީން ބުންޏެވެ. އެ ޑޭޓާ ގެއްލިފައިވާކަން އެނގުމުން އެމެރިކާއަށް ގެންގޮސް އެމެރިކާގެ ސޭފްޓީ ރެގިއުލޭޓަރުންވެސް ޑޭޓާތައް ބަލާފައިވެއެވެ.
ބެންކޮކުން ފުރައިގެން މުއާން އިންޓަނޭޝަނަލް އެއާޕޯޓަށް ދަތުރުކުރަމުންދިޔަ އެ ބޯޓު ވެއްޓި އަލިފާން ރޯވީ މިދިޔަ އަހަރުގެ ޑިސެމްބަރު މަހުގެ 29 ވަނަ ދުވަހެވެ.
ކޮރެއާގެ ޓްރާންސްޕޯޓް މިނިސްޓްރީގައި އެކްސިޑެންޓް އިންވެސްޓިގޭޓަރެއްގެ ގޮތުގައި މީގެ ކުރިން މަސައްކަތް ކުރި ސިމް ޖައި ޑޮންގް ރޮއިޓާސް ނިއުސް އެޖެންސީއަށް ވިދާޅުވީ އެންމެ މުހިންމު އެއް ވަގުތުކޮޅުގެ ޑޭޓާ ގެއްލުމަކީ ހައިރާންވާންޖެހޭ ކަމެއް ކަމަށެވެ.
އެ އެކްސިޑެންޓު ހިނގަން މެދުވެރިވި ކަމަށް މިހާތަނަށް އޮފިޝަލުން ލަފާކޮށްފައިވާ ސަބަބުތަކުގެ ތެރޭގައި ދޫނިތަކެއް ބޯޓުގައި ޖެހުމާއި މޫސުން ގޯސްވުން ހިމެނެއެވެ.