ފުލުހުންގެ ޚާއްސަ އޮޕަރޭޝަނެއްގެ ތެރެއިން ދިވެއްސަކު ތިން ފުޅި ބަނގުރަލާއެކު، ފުލުހުންގެ ބެލުމުގެ ދަށަށް މިރޭ ގެންގޮސްފިއެވެ.
މާލޭ މަޖީދީ މަަގުގެ ދުވާރެއްގެ މައްޗަށް މީހަކު ވައްޓައިލައި، އޭނާ ގިނަ ބަޔަކު އޭނާ ހިފަހައްޓާ ވީޑިއޯއެއް މިރޭ ވަނީ ސޯޝަލް މީޑިއާގައި ދައުރުވެފައެވެ.
އެ ވީޑިއޯއާ ގުޅިގެން ފުލުހުންނާ ސުވާލުކުރުމުން ފުލުހުން ބުނީ، އެއީ މާލޭގައި ބަނގުރަލުގެ ވިޔަފާރި ކުރާކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނެއް ކަމަށެވެ.
އެ އޮޕަރޭޝަނުގައި މިރޭ، މަޖީދީ މަގުން މީހަކު ހުއްޓުވައި، ބަލައި ފާސްކޮށް ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން ބުންޏެވެ.
ފުލުހުން ބުނީ، މައްސަލައާ ގުޅިގެން ފުލުހުންގެ ބެލުމުގެ ދަށަށް ގެނައީ، ގދ. ގައްދޫ، ރެޑްމާގެ، އުމުރުން 33 އަހަރުގެ މުޙައްމަދު އަޒްހަމް ސައީދު ކަމަށެވެ.
އޭނާ ބަލައި ފާސްކުރިއިރު، އޭނާ ދުއްވި ސައިކަލުން ތިން ފުޅި ބަނގުރާ ފެނުނު ކަމަށް ފުލުހުން ބުންޏެވެ.
އަދި މި މައްސަލަަ އިތުރަށް ތަހުގީގުކުރަމުން އަންނަކަމަށް ވެސް ފުލުހުން ބުންޏެވެ.
އާ އަހަރުު ފާހަގަކުރުމުގެ ގޮތުން ދިވެހީންނާއި، ބިދޭސީން ވެސް ބަނގުރާ ބުއިމާއި، އެ ގެންގުޅުމުގެ އިތުރުން އޭގެ ވިޔަފާރިކުރުމުގެ މައްސަލަތައް މީގެ ކުރީ އަހަރުތަކުގައި ވެސް ފެންމަތިވެފައި އެބަހުއްޓެވެ. އަދި ރަށްރަށާއި، މާލޭގައި ވެސް ބަނގުރާ ވިއްކުމުގެ މައްސަލަތައް ފެންމަތިވެފައި ވެއެވެ.
އިއްޔެ ވެސް ތިން ބިދޭސީއަކު ވަނީ ބަނގުރާ ފުޅިތަކަކާއެކު ހައްޔަރުކޮށްފައެވެ.
އައު އަހަރާ ދިމާކޮށް، ބަނގުރާ އަދި މަސްތުވާތަކެތި ބޭނުންކޮށް, ވިއްކާ ވިޔަފާރިކުރުން އިތުރުވެގެން ދާނެކަމަށް ބެލެވޭތީ ފުލުހުންގެ ޚާއްސަ އޮޕަރޭޝަނެއް މިދިޔަ ހަފުތާގައިވަނީ ފަށައިފައެވެ.
މި އޮޕަރޭޝަން ކުރިއަށް ގެންދަނީ އައު އަހަރާ ދިމާކޮށް ބަނގުރާ އަދި މަސްތުވާތަކެތި ބޭނުންކޮށް, ވިއްކާ ވިޔަފާރިކުރުން އިތުރުވެގެން ދާނެކަމަށް ބެލެވޭތީ ކަމަށް ފުލުހުން ވަނީ ބުނެފައެވެ.