މާލޭ، އަލިކިލެގެފާނު މަގުން ސައިކަލެއްގައި ދިޔަ އަންހެނެއްގެ އަތުން ފޭރުނު މައްސަލައިގައި ހައްޔަރުކުރި ފިރިހެން މީހާ ކުށަށް އިއުތިރާފުވެ، ގެއްލުން ލިބުނު އަންހެން މީހާއަށް ބަދަލުދޭން އެއްބަސްވެއްޖެއެވެ.
އެ މައްސަލައިގައި ހައްޔަރުކޮށްފައި ވަނީ އުމުރުން 30 އަހަރުގެ ވ. ފިޔަބަރި، މާލެ، ހަސަން އިސާމެވެ.
އެ ހާދިސާ ހިނގީ މި މަހުގެ 19 ވަނަ ދުވަހުއެވެ. އޭނާ ހައްޔަރުކުރީ އޭގެ ޖެހިގެން އައި ދުވަހެވެ. އޭރު އޭނާގެ ބަންދަށް ކްރިމިނަލް ކޯޓުން ވަނީ ހަތް ދުވަސް ޖަހައިފައެވެ. އެ މުއްދަތު ހަމަވުމުން އިއްޔެ ކްރިމިނަލް ކޯޓުން ވަނީ ބަންދުގެ މުއްދަތު އިތުރު ކޮށްފައެވެ.
ކްރިމިނަލް ކޯޓުގެ އަމުރުގައިވާ ގޮތުގައި އޭނާގެ މައްޗަށް ކުރަނީ ފޭރުމުގެ ކުށުގެ ދައުވާއެވެ. އަދި އޭނާއަކީ ގިނަ އަދަދެއްގެ ކުށުގެ ރެކޯޑު އޮތް މީހެއް ކަމަށް އަމުރުގައި ބަޔާންކޮށްފައިވެއެވެ.
އެ ހާދިސާއާ ގުޅިގެން އޭނާގެ މައްޗަށް ތުހުމަތުކުރެވޭ ކުށް އޭނާ ކުރިކަމަށް ކޮންމެވެސް މިންވަރެއްގެ ހެކި ހުށަހަޅާފައިވާ ކަމަށާއި އޭގެތެރޭގައި ސީސީޓީވީ ފުޓޭޖް ސްނެޕްޝޮޓާއި ފުލުހުންގެ ބަޔާންތައް ހުށަހަޅާފައިވާ ކަމަށް ކޯޓު އަމުރުގައިވެއެވެ.
އަންހެނެއްގެ އަތުން ފޭރެން މަސައްކަތްކުރި ފިރިހެން މީހާ ފެންނަ ފޮޓޯއެއް --
ކޯޓު އަމުރުގައި ބުނެފައިވާ ގޮތުގައި އެ ހާދިސާގައި އެ މީހާ އަނިޔާވެރިވެފައިވެއެވެ. އަދި އޭނާ ކުށަށް އިއުތިރާފުވެ، އަންހެން މީހާ އަތުން ރަން ފަށް ފޭރުނު ކަމަށް ވަނީ އެއްބަސްވެފައެވެ. ނަމަވެސް އޭނާގެ އަތުގައި އެ ފަށް ނެތް ކަމަށާއި ގެއްލުން ލިބުނު އަންހެން މީހާއަށް ބަދަލު ދޭން ތައްޔާރަށް ހުރި ކަމަށް ވެސް ބުނެފައިވާ ކަމަށް ކޯޓު އަމުރުގައިވެއެވެ. އަދި އެ މައްސަލައިގައި އިންވެސްޓިގޭޓިވް އޮފިސަރަށް އެއްބާރުލުން ދޭނެ ކަމަށް ވެސް އެ މީހާ ބުނެފައިވެއެވެ.
އޭނާގެ މައްޗަށް ކްރިމިނަލް ކޯޓުން އަމުރުކުރީ އިއްޔެއިން ފެށިގެން އަންނަ ޖެނުއަރީ މަހުގެ 12 ވަނަ ދުވަހުގެ ނިޔަލަށް، 15 ދުވަހުގެ މުއްދަތަށް ކަސްޓޯޑިއަލް ޖަލެއްގައި ބަންދުކުރުމަށެވެ.
އަދި އޭނާ ބަންދުގައި ބަހައްޓަންޖެހޭ ހާލަތެއްގެ ގޮތުގައި ފާހަގަކޮށްފައި ވަނީ ބަންދުން ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކާވެދާނެ ކަމަށް ފެންނާތީ ކަމަށް ވެސް އަމުރުގައި ބުނެފައިވެއެވެ.
އޭނާ ދުއްވި ސައިކަލު ފުލުހުންގެ ބެލުމުގެ ދަށަށް ގެނެސްފައިވާ ކަމަށް ފުލުހުން ބުނެފައިވެއެވެ.
ސޯޝަލް މީޑިއާގައި އާއްމުވެފައިވާ ވީޑިއޯއަކުން ފެންނަނީ، އަންހެނަކު ސައިކަލުގައި ދަނިކޮށް، އެހެން ސައިކަލެއްގައި ފަހަތުން އައި ފިރިހެނަކު އަންހެން މީހާއާ އަރާ ހަމަކޮށް، އޭނާގެ ކަރުގައި އޮތް ފަށް ފޭރެން މަސައްކަތް ކުރާ މަންޒަރެވެ. ފުރަތަމަ އެކަން ކާމިޔާބުނުވުމުން، ސައިކަލުން ފައިބައިގެން ގޮސް ވެސް އަންހެން މީހާ ފަހަތުން ދާ މަންޒަރު ވީޑިއޯއިން ފެނެއެވެ.
އެ އަންހެން މީހާ މަގުގެ އެއްފަރާތު ގޯޅިތެރެއަށް ދުވެފައިދާ މަންޒަރު ވީޑިއޯއިން ފެނެއެވެ.
އެއާއެކު ފިރިހެން މީހާ ސައިކަލަށް އަރައި، އެ ތަނުން ފިލަނީއެވެ.
މި ހާދިސާ ހިނގި ވަގުތު މަގުމަތީގައި ވެސް މީހުން ހަރަކާތްތެރިވެ އުޅުނެވެ. ފާހަގަކޮށްލެވޭ ގޮތުގައި އެ ފިރިހެން މީހާ ސައިކަލުގައި ފިލާފައި ވަނީ ފަހަތުން އެހެން ދެ ސައިކަލެއް އައިސް މަޑުކުރި ވަގުތުގައެވެ.