ސިނަމާލެ ބުރިޖު މަތީގައި އަނެއްކާވެސް މިރޭ އެކްސިޑެންޓެއް ހިނގައިފިއެވެ.
ފުލުހުން "ސަން"އަށް ބުނީ، އެ އެކްސިޑެންޓް ހިނގާފައި ވަނީ މާލެއިން ހުޅުމާލެއަށް ދާ ފަޅި, ބުރިޖު ނިމޭ ހިސާބުގައި ކަމަށެވެ. މި އެކްސިޑެންޓު ހިނގާފައި ވަނީ ކާރެއް އެއާޕޯޓު މަގަށް އަޅަން އުޅުމުގެ ތެރޭގައި ހުޅުމާލެއާ ވީކޮޅަށް ދިޔަ ސައިކަލެއްގައި ޖެހިގެން ކަމަށް ފުލުހުން ބުންޏެވެ.
ކާރަކާއި ސައިކަލެއް ޖެހި ހިނގައިދިޔަ އެ އެކްސިޑެންޓާ ގުޅިގެން ފުލުހުން އެ ސަރަހައްދުގައި ހަރަކާތްތެރިވަމުންދާ ކަމަށް ފުލުހުން ބުންޏެވެ.
މި އެކްސިޑެންޓުގައި އެއްވެސް މީހަކަށް ބޮޑު އަނިޔާއެއް ވެފައި ނުވާ ކަމަށް ވެސް ފުލުހުން މައުލޫމާތުދިނެވެ.
ފާހަގަކޮށްލެވޭ ގޮތުގައި ބުރިޖު ހައިވޭފައި މާލެއިން ހުޅުމާލެއަށް ދަތުރުކުރި ތިން ސައިކަލު އެކްސިޑެންޓުވެ، ފަސް މީހަކަށް ރޭ ވެސް އަނިޔާވެފައިވެއެވެ. މި ހާދިސާގައި އަނިޔާވި ފަސް މީހުންގެ ތެރެއިން ހަތަރު މީހަކަށް ފަރުވާ ދިނުމަށް ފަހު ހޮސްޕިޓަލުން ދޫކޮށްލާފައިވާއިރު އަނެއް މީހާއަށް ޓްރީޓޮޕް ހޮސްޕިޓަލުގައި އަންނަނީ ފަރުވާދެމުންނެވެ.
މި ދުވަސްކޮޅަކީ އައު އަހަރާ ދިމާކޮށް، ގިނަ ބަޔަކު މާލެއަށް ޒިޔާރާތްކުރާ ދުވަސްކޮޅެކެވެ. އެއާއެކު މާލޭގެ ޓްރެފިކް އިންތިހާއަށް ބާރުބޮޑުކަން ފާހަގަކުރެވެއެވެ.
ސިނަމާލެ ބުރިޖު މަތީގައި ވެސް ދަތުރުތައް އިތުރުވެފައިވާއިރު، ބުރިޖުގެ ޓްރެފިކް ލައިޓް ކައިރީގައި މީގެ ކުރިން ވެސް ނުރައްކާތެރި އެެކްސިޑެންޓުތައް ހިނގާފައި އެބަހުއްޓެވެ.