އއ. ތޮއްޑޫގައި މަސައްކަތް ކުރަމުން އަންނަ ބިދޭސީ އަންހެނަކަށް އަނިޔާކުރިކަމުގެ ތުހުމަތުގައި ފުލުހުން މައްސަލައެއް ބަލަން ފަށައިފިއެވެ.
ފުލުހުން މިއަދު މީޑިއާތަކާ ހިއްސާކުރި މެސެޖެއްގައި ވަނީ ތޮއްޑޫގައި މަސައްކަތްކުރާ ތައިލެންޑްގެ އަންހެނަކަށް އޭނާގެ ސްޕޮންސާ އަނިޔާ ކޮށްފައި ވާކަމަށް ބުނާ މައްސަލައެއް މިދިޔަ ބުރާސްފަތި ދުވަހުގެ 18:50 ހާއިރު ފުލުހުންނަށް ރިޕޯޓްކޮށްފައި ވާކަމަށެވެ.
ނަމަވެސް މި މައްސަލައާ ގުޅޭ އިތުރު މައުލޫމާތެއް ހިއްސާކޮށްފައެއް ނުވެއެވެ.
އެ މައްސަލަ ތަހުގީގު ކުރާ ކަމަށް ފުލުހުން ބުނިއިރު، ތޮއްޑޫގައި ބިދޭސީ އަންހެނަކަށް ޖިންސީ ގޯނާ ކުރިކަމުގެ ތުހުމަތުތަކެއް ސޯޝަލް މީޑިއާގައި ފެންމަތިވެފައިވެއެވެ.
އެކި ކަހަލަ މަސައްކަތްތަކުގައި ބިދޭސީން ރާއްޖެ ގެނެސް އެމީހުންނަށް އިހުމާލުވުމުގެ މައްސަލަތައް މީގެކުރީން ވެސް ފުލުހުންނަށް ރިޕޯޓުކޮށްފައި އެބަހުއްޓެވެ.