ޗުއްޓީއަށް ރާއްޖެ ވަޑައިގަތް، ޖަޕާނުގެ ގާނޫނު ހަދާ މަޖިލީހުގެ މެންބަރަކު އިއްޔެ ނިޔާވެއްޖެއެވެ.
ޖަޕާނުގެ ނޫހެއްގައިވާ ގޮތުން، ރާއްޖޭގައި ނިޔާވެފައި ވަނީ ވެރިކަން ކުރާ ލިބެރަލް ޑިމޮކްރެޓިކް ޕާޓީގެ ސެނެޓަރެއް ކަމަށްވާ ޓޮޝިޔުކީ އަޑަޗީ، 70އ، އެވެ.
އެލްޑީޕީގެ މަސްދަރުތަކާ ހަވާލާދީ އެ ނޫހުގައިވަނީ، އަޑަޗީ ނިޔާވީ ކަނޑުމަތީގެ ހާދިސާއެއްގައި ކަމަށް އެނގިފައިވާ ކަމަށް ރިޕޯޓުކޮށްފައެވެ.
ޖަޕާނުގެ އެހެން ނޫހެއްގައި ވަނީ، އަޑަޗީ މިމަހުގެ 25އިން އަންނަ މަހުގެ ހަ ވަނަ ދުވަހާ ހަމައަށް ރާއްޖެ ވަޑައިގަންނަވާނެކަން ހައުސް އޮފް ކައުންސިލާސްގެ ސެކްރެޓޭރިއޭޓަށް އަންގަވައިފައިވެއެވެ.
ޖަޕާނުގެ ގާނޫނު ހަދާ މަޖިލީހުގެ މަތީގެ ކަމަށްވާ ހައުސް އޮފް ކައުންސިލާސްއަށް އަޑަޗީ އިންތިޚާބުވީ 2016ގައެވެ. އަދި ނިޔާވިއިރު، ފުރުއްވަމުން ގެންދެވީ އެ މަޖިލީހުގައި ދެވަނަ ދައުރެވެ.
ފުލުހުން ވަނީ، ޅ. އަތޮޅުގައި ހިންގާ ރިސޯޓެއްގައި ޗުއްޓީ ހޭދަކުރަމުން ދިޔަ ޖަޕާނުގެ 70 އަހަރުގެ ފިރިހެން ފަތުރުވެރިޔަކު ސްނޯކްލިންއަށް ގޮސް އުޅެނިކޮށް މޫދުގައި މަރުވެފައި އޮއްވާ ފެނުނު ކަމަށް އިއްޔެ 8:33ހާއިރު ރިޕޯޓުކޮށްފައިވާ ކަމަށް ބުނެފައެވެ.
އެ މައްސަލަ ތަހުގީގު ކުރަމުންދާ ކަމަށް ބުނި ނަމަވެސް، އެ މައްސަލައާ ގުޅޭ އިތުރު ތަފުސީލެއް ފުލުހުން ނުދެއެވެ.
ފަތުރުވެރިންނަށް ޚާއްސަކޮށް ހިންގާ މޫދު ކުޅިވަރުތަކާއި، އެހެނިހެން ހަރަކާތްތަކުގައި ފަތުރުވެރިން މަރުވުމުގެ ހާދިސާތައް ގިނަވާތީ، އެފަދަ ހަރަކާތްތަކުގެ ރައްކާތެރިކަން ކަށަވަރުކުރުމަށް ފިޔަވަޅުތައް އަޅަން މިފަހުން ޓޫރިޒަމް މިނިސްޓްރީން އަންގައިފައިވެއެވެ.