އިނގިރޭސި ޕްރިމިއާ ލީގުގެ އެއްވަނައިގައި އޮތް ލިވަޕޫލުން ލެސްޓާ ސިޓީ ބަލިކޮށް، ލީޑު ފުޅާކޮށްފިއެވެ.
ލިވަޕޫލްގެ ދަނޑުގައި ކުޅުނު މި މެޗު އެ ޓީމުން ކާމިޔާބުކޮށްފައިވަނީ ފަހަތުން އަރައި 3-1 އިންނެވެ.
މެޗުގެ ހަވަނަ މިނެޓުގައި އުފެއްދި ހަމަލާއެއްގައި ލެސްޓާއިން ވަނީ ލީޑު ނަގައި ލިވަޕޫލް ސިއްސުވާލައިފައެވެ. މި ލަނޑު ކާމިޔާބުކޮށްދިނީ ޖޯޑަން އާޔޫއެވެ. ލެސްޓާއިން ވަނީ މެޗުގައި ލިވަޕޫލަށް ލަނޑެއް ޖެހުނަނުދީ ފުރަތަމަ ހާފުގެ އިތުރު ވަގުތާ ހަމައަށް ހިފަހައްޓާލައިފައެވެ.
އެކަމަކު، ފުރަތަމަ ހާފުގެ އިތުރު ވަގުތުގައި ކޯޑީ ގަކްޕޯ ވަނީ ލިވަޕޫލަށް ލަނޑެއް ޖަހައިދީ، ނަތީޖާ ހަމަހަމަކޮށްފައެވެ.
ދެވަނަ ހާފު ފެއްޓި ގޮތަށް ލިވަޕޫލުން ވަނީ މެޗު އެ ޓީމު ކޮޅަށް އަނބުރާލައިފައެވެ. ދެވަނަ ހާފުގެ ހަތަރުވަނަ މިނެޓުގައި އެ ލަނޑު ކާމިޔާބުކޮށްދިނީ ކާޓިސް ޖޯންސެވެ. ފަހު ލަނޑު މެޗުގެ 82 ވަނަ މިނެޓުގައި ކާމިޔާބުކޮށްދިނީ މުހައްމަދު ސަލާހެވެ. މިއީ ސަލާހް މި ސީޒަންގައި ޕްރިމިއާ ލީގުގައި ކާމިޔާބުކުރި 16 ވަނަ ލަނޑެވެ.
މި ކާމިޔާބީއާ އެކު ލިވަޕޫލް މިހާރު އޮތީ ކުޅުނު 17 މެޗުން ލިބިފައިވާ 42 ޕޮއިންޓާ އެކު އެއްވަނައިގައެވެ. ދެވަނައިގައި އޮތް ޗެލްސީއާ ދެމެދުގައި ހަތް ޕޮއިންޓު އެބައޮތެވެ. އެއް މެޗު މަދުން ކުޅެފައި އޮތުމުން އެ ފަރަގު އިތުރަށް ފުޅާކުރަން ލިވަޕޫލަށް ފުރުސަތު ލިބޭނެއެވެ.
މެޗުން ބަލިވުމުން ލެސްޓާ އޮތީ 14 ޕޮއިންޓާ އެކު 18 ވަނައިގައެވެ.
މުބާރާތުގައި ބޯންމޯތާއި ކްރިސްޓަލް ޕެލަސް ބައްދަލުކުރި މެޗު ލަނޑެއް ނުޖެހި ނިމުނީ އެއްވަރުވެގެންނެވެ. މިއާއެކު ބޯންމޯތު ހަވަނައިގައި 29 ޕޮއިންޓާ އެކު އޮތްއިރު ޕެލަސް އޮތީ 17 ޕޮއިންޓާ އެކު 16 ވަނައިގައެވެ.