ގާނޫނަށް ގެނައި އިސްލާހުތަކާއެކު ފަތުރުވެރިކަމުގެ ދާއިރާއާ ގުޅުން ހުރި ޓެކްސްތައް ބޮޑުކޮށް، ފަތުރުވެރިންނަށް ޚިދުމަތްދޭ ތަންތަނުން ދިވެހި ބޭންކުތަކަށް ޑޮލަރު މާރުކުރުން މަޖުބޫރުކުރުމާއެކު ފަތުރުވެރިކަމަށް ދެން ކުރާނެ އަސަރުތައް ދެނެގަތުމަށް މަސައްކަތްކުރާ ކަމަށް ޓޫރިޒަމް މިނިސްޓަރު އިބްރާހީމް ފައިސަލް މިއަދު ވިދާޅުވެއްޖެއެވެ.
މިއަދު ވަނީ ރާއްޖޭގެ ފަތުރުވެރިކަމުގެ ތާރީޚުގައި ފުރަތަމަ ފަހަރަށް އެއް އަހަރު ތެރޭ ދެ މިލިއަން ފަތުރުވެރިން ޒިޔާރަތްކޮށްފައެވެ. ދެ މިލިއަންވަނަ ފަތުރުވެރިޔާއަށް މަރުޙަބާ ކިޔަން ވެލާނާ އިންޓަނޭޝަނަލް އެއާޕޯޓުގައި މިއަދު ވަނީ ޚާއްސަ ރަސްމިއްޔާތެއް ވެސް ބާއްވާފައެވެ.
އެ ރަސްމިއްޔާތަށް ފަހު މީޑިއާތަކާ ވާހަކަދައްކަވަމުން ފައިސަލް ވިދާޅުވީ މިހާރު ޓޫރިޒަމް މިނިސްޓްރީއާއި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ)އިން އަންނަނީ އަލަށް ގެނައި އިސްލާހުތަކާއެކު ފަތުރުވެރިކަމަށް ހުރި ގޮންޖެހުންތައް ދެނެގަތުމުގެ މަސައްކަތްކުރަމުން ކަމަށެވެ.
މިއަންނަ އަހަރު މާކެޓިން ޕްލޭން އެކުލަވާލުމުގައި ވެސް އެމްއެމްޕީއާރްސީން ވަރަށް ބޮޑަށް މި އަލަށް ހެދުނު ގަވާއިދުތަކާއި އޭގެ ސަބަބުން ދިވެހިރާއްޖެއަށް އަންނަ ފަތުރުވެރިންނަށް ކުރާނީ ކޮން އަސަރުތަކެއްތޯ [ބަލަމުން ދަނީ]. އެހެންވީމަ ކޮން ގޮތަކަށްތޯ އަޅުގަނޑުމެން މަސައްކަތްކުރާނީ [ބަލަމުން ދަނީ]، ޓޫރިޒަމް މިނިސްޓަރު އިބްރާހީމް ފައިސަލް
ފައިސަލް ވިދާޅުވީ ކޮންމެ ކަމެއް ވެސް 'ޕޮޒިޓިވް'ކޮށް ވިސްނައި ޓީމެއްގެ ގޮތުގައި ކުރިއަށްދާން ޖެހޭ ކަމަށެވެ. އަދި މިހާރު ގާނޫނަށް ގެނައި އިސްލާހުތަކަކީ ދައުލަތަށް ދަތިވުމުން ކޮންމެހެން އަޅަންޖެހިފައިވާ ފިޔަވަޅުތަކެއް ކަމަށް އޭނާ ވިދާޅުވިއެވެ.
ކުރިއަށް އޮތް ތަނުގައި ފަތުރުވެރިކަމުގެ ދާއިރާއަށް ގިނަ އިންވެސްޓްމަންޓްތަކެއް ގެނެވި ފަތުރުވެރިކަން އިތުރަށް ކުރިއެރުވޭނެ ގޮތަކަށް އަންނަ އަހަރު ކަންކަން ބައްޓަންކުރައްވާނެ ކަމަށް ވެސް ފައިސަލް ވިދާޅުވިއެވެ.
މި ސަރުކާރުން އެއާޕޯޓު ޓެކްސް އާއި ފީ ނެގުމުގެ ގާނޫނަށް އިސްލާހު ގެނެސް، އެއާޕޯޓް ޑިވެލޮޕްމަންޓް ފީ (އޭޑީއެފް)އާއި ޑިޕާޗާ ޓެކްސް ނަގާ މިންވަރު ވަނީ މިމަހުގެ އެކެއްގައި އިތުރުކޮށްފައެވެ.
ރާއްޖެއިން ފުރާ ފަސިންޖަރުން އަތުން ނަގައި ޓެކްސް ވެސް ބޮޑުކުރަން ފާސްކުރިއެވެ. އެ ބަދަލަކީ؛
- އިކޮނޮމީ ކުލާހުން ފުރާ ބިދޭސީންގެ އަތުން މިހާރު ނަގައި 30 ޑޮލަރު، 50 ޑޮލަރަށް ބޮޑުކުރުން
- ބިޒްނަސް ކުލާހުން ފުރާ ދިވެހިންނާއި ބިދޭސީންގެ އަތުން ނަގައި 60 ޑޮލަރު، 120 ޑޮލަރަށް ބޮޑުކުރުން
- ފަސްޓް ކުލާހުން ފުރާ ދިވެހިންނާއި ބިދޭސީންގެ އަތުން ނަގައި 90 ޑޮލަރު، 240 ޑޮލަރަށް ބޮޑުކުރުން
- ޕްރައިވެޓް ޖެޓްގައި ފުރާ މީހުންގެ އަތުން ނަގައި 120 ޑޮލަރު، 480 ޑޮލަރަށް ބޮޑުކުރުން
މީގެ އިތުރުން ފަތުރުވެރިންނަށް ޚިދުމަތްދޭ ތަންތަނުން ކޮންމެ ފަތުރުވެރިއަކަށް ޑޮލަރު މާރުކުރަން އަންގައި މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން މިދިޔަ އޮކްޓޯބަރު މަހު ގަވައިދެއް އެކުލަވައިލިއެވެ. އޮކްޓޯބަރު މަހުގެ އެކެއްގައި އެ ގަވައިދު ތަންފީޒުކުރަން ފަށައިފައިވާއިރު، އެ ގަވައިދާ ގުޅޭ ގޮތުން ފަތުރުވެރިކަމުގެ ދާއިރާގައި ހަރަކާތްތެރިވާ ގިނަ ބަޔަކު ކަންބޮޑުވުން ފާޅުކުރަމުންދެއެވެ.
އެމްއެމްއޭއިން ތަންފީޒުކުރާ ގަވައިދުގައި އޮންނަނީ، ކޮންމެ ރިސޯޓަކުން ވެސް ފަތުރުވެރިއަކަށް 500 ޑޮލަރު މާރުކުރަން ޖެހޭނެ ކަމަށެވެ. އަދި މީހުން ދިރިއުޅޭ ރަށްރަށުގައި ހިންގާ ހޮޓާތަކާއި ގެސްޓްހައުސްތަކާއި ޓޫރިސްޓު އުޅަނދުތަކުން 25 ޑޮލަރު މާރުކުރަން ޖެހޭނެ ކަމަށެވެ.
އެއަށްފަހު ބޭރު ފައިސާގެ ބިލު އެކުލަވައިލިއިރު ވަނީ ޑޮލަރު މާރުކުރުމުން އިސްތިސްނާވާ ފަރާތްތަކާއި ހާލަތްތަކެއް ހިމަނައިފައެވެ. އޭގެ ތެރޭގައި:
- ގިނަވެގެން 24 ގަޑިއިރު ހޭދަކޮށްފައި ނުވާ ޓޫރިސްޓުން
- އުމުރުން ދެ އަހަރު ފުރިހަމަނުވާ ކުޑަކުދިން
- އެ ޓޫރިޒަމް އެސްޓަބްލިޝްމެންޓްގައި ހިލޭ ނުވަތަ ކޮމްޕްލިމެންޓްރީކޮށް ތިބޭ ފަރާތްތައް
ރައްޔިތުންގެ މަޖިލީހަށް ބިލު ހުށަހެޅިއިރު ވަނީ، ބޮލަކަށް 500 ޑޮލަރުގެ ބަދަލުގައި އާމްދަނީގެ ޕަސެންޓެއް މާރުކުރަން އިޚުތިޔާރު ދީފައެވެ. މީގެ އިތުރުން އިސްތިސްނާގައި ހިމެނޭ އުމުރުފުރާ 10 އަހަރަށް އިތުރުކުރިއެވެ.
އެއަށްފަހު މާލިއްޔަތު ކޮމިޓީން ބިލް ދިރާސަކުރުމަށް ފަހު ގެނައި އިސްލާހުތަކުގެ ތެރޭގައި، ރިސޯޓަކަށް މާލީ ދަތިކަމެއް ވާނަމަ، އާމްދަނީގެ 20 ޕަސެންޓަށްވުރެ މަދުން ދައްކަން އެދުމުގެ އިޚުތިޔާރު ދީފައެވެ. އަދި އިސްތިސްނާވާ އުމުރުފުރާ 12 އަހަރަށް އިތުރުކުރިއެވެ.