އީރާނުގެ ސަރުކާރުން މެޓާގެ މެސެޖިން އެޕްލިކޭޝަން ވަޓްސްއެޕާއި ގޫގުލް ޕްލޭ ބޭނުންކުރަން ހުއްދަ ދީފިއެވެ.
މިއީ އިންޓަނެޓް ބޭނުންކުރުމުގެ ހަނިކުރުންތައް މަދުކުރުމަށް އަޅާ ފުރަތަމަ ފިޔަވަޅުކަމަށް އީރާނުގެ ސަރުކާރުގެ މީޑިއާއިން އަންގާރަ ދުވަހު ބުނެފައިވެއެވެ.
އީރާނުގެ ރަސްމީ ނޫސް އެޖެންސީ އައިއާރްއެންއޭއިން ބުނެފައިވާ ގޮތުގައި، ރައީސް މަސްއޫދު ޕެޒެޝްކިއަން އިސްކޮށް ހުންނަވައިގެން ބޭއްވި ބައްދަލުވުމެއްގައި ވަޓްސްއެޕާއި ގޫގުލް ޕްލޭ ފަދަ ބޭރުގެ މަޝްހޫރު ޕްލެޓްފޯމްތަކަށް އެކްސެސް ކުރުމުގެ ހުއްދަ ދިނުމަށް އަޣުލަބިއްޔަތުން ވޯޓު ދީފައިވެއެވެ.
އީރާނުގެ އިންފޮމޭޝަން އެންޑް ކޮމިއުނިކޭޝަންސް ޓެކްނޮލޮޖީ ވަޒީރު ސައްތާރު ހާޝިމީ ވިދާޅުވެފައިވަނީ މިއަދު އިންޓަނެޓް ބޭނުންކުރުމުގެ ހަނިކުރުންތައް ނައްތާލުމަށް ފުރަތަމަ ފިޔަވަޅު އަޅައިފައިވާ ކަމަށެވެ.
އީރާނަކީ ދުނިޔޭގައި އިންޓަނެޓް ބޭނުންކުރުމުގައި އެންމެ ހަރުކަށި ގަވާއިދުތައް އޮންނަ ޤައުމުތަކުގެ ތެރެއިން އެއް ޤައުމެވެ. ފޭސްބުކާއި އެކްސް އަދި ޔޫޓިއުބް ފަދަ އެމެރިކާގެ ސޯޝަލް މީޑިއާ ޕްލެޓްފޯމްތަކަށް އެކްސެސް ކުރުން މަނާކޮށްފައި އޮތް ނަމަވެސް، ޓެކްނޮލޮޖީއަށް އަހުލުވެރި އީރާނުގެ ރައްޔިތުން ވާޗުއަލް ޕްރައިވެޓް ނެޓްވާކްތައް (ވީޕީއެން) ބޭނުންކޮށްގެން މި ޕްލެޓްފޯމްތަކަށް އެކްސެސްކުރަމުން ގެންދެއެވެ.
ފާއިތުވި ސެޕްޓެމްބަރު މަހު އެމެރިކާއިން ބޮޑެތި ޓެކްނޮލޮޖީ ކުންފުނިތަކަށް ގޮވާލާފައިވަނީ އީރާނު ފަދަ އިންޓަނެޓް ބޭނުންކުރުން ހަނިކުރާ ޤައުމުތަކުގައި އޮންލައިން ސެންސާޝިޕް އުވާލަން އެހީތެރިވުމަށެވެ.
އީރާނުގައި ސަރުކާރާ ދެކޮޅަށް ކުރި މުޒާހަރާތަކުގައި ފުޅާ ދާއިރާއެއްގައި ސޯޝަލް މީޑިއާ ޕްލެޓްފޯމްތައް ބޭނުންކޮށްފައިވެއެވެ.