ދުނިޔޭގައި އެންމެ ގިނަ މީހުން ބޭނުންކުރާ މެސެޖިންގ އެޕްކަމަށްވާ ވަޓްސްއެޕްއިން ފޯނު ބޭނުންކުރާ ފަރާތްތަކަށް އިތުރު ފަސޭހަތަކެއް ފޯރުކޮށްދިނުމުގެ ގޮތުން ޑޮކިއުމަންޓް ސްކޭން ކުރުމުގެ އައު ފީޗާއެއް ތަޢާރަފުކޮށްފިއެވެ.
މެޓާގެ ދަށުން ހިންގާ މި އެޕްގައި މިހާރު ތަޢާރަފުކޮށްފައިވާ "ސްކޭން ޑޮކިއުމަންޓް" ފީޗާއާއެކު، އެއްވެސް ލިޔެކިޔުމެއް ފޮނުވަން ބޭނުންވާ ފަރާތްތަކަށް އެ ލިޔުމެއް ސީދާ ވަޓްސްއެޕް މެދުވެރިކޮށް ސްކޭންކުރެވޭނެ އެވެ. މި ފީޗާއާއެކު ޑޮކިއުމަންޓް އަޕްލޯޑް ކުރުމަށް ނުވަތަ ސިލެކްޓް ކުރުމަށް އޮންނަ އޮޕްޝަންގައި "ސްކޭން ޑޮކިއުމަންޓް" މި ނަމުގައި އިތުރު އޮޕްޝަނެއް ފެންނަން ހުންނާނެއެވެ.
މީގެ ކުރިން ޑޮކިއުމަންޓެއް ފޮނުވަން ބޭނުންވާ ފަރާތްތަކުން އެ ޑޮކިއުމަންޓެއްގެ ފޮޓޯ ނަގަން ޖެހުނެވެ. ނުވަތަ ފޯނުގައި އެފަދަ ފީޗަރެއް ސަޕޯޓްކުރާނަމަ ފޯނުގެ ކެމެރާ މެދުވެރިކޮށް ސްކޭންކުރަން ޖެހުނެވެ. އަދި ބައެއް ފަހަރު ތާޑް ޕާޓީ އެޕްތައް މެދުވެރިކޮށް ސްކޭންކުރަން ޖެހުނެވެ. މި އައު ފީޗާއާއެކު އެފަދަ އުނދަގުލަކާ ކުރިމަތިލާކަށް ނުޖެހޭނެއެވެ.
ވަޓްސްއެޕްގެ މައުލޫމާތު ފޯރުކޮށްދޭ ވާބިޓާ އިންފޯގެ މަޢުލޫމާތު ދައްކާ ގޮތުގައި މި ފީޗާ ތަޢާރަފުކޮށްފައިވަނީ ވަޓްސްއެޕް ފޯ އައިއޯއެސް 24.25.89 ވާޝަން އާއެކުއެވެ. އައިފޯނު ބޭނުންކުރާ ފަރާތްތަކުން މި ފީޗާ ބޭނުންކުރަން ފަށައިފާވާއިރު އެންޑްރޮއިޑް ބޭނުންކުރާ ފަރާތްތަކަށް އަދި މި ފީޗާ ތަޢާރަފުކޮށްފައެއް ނުވެއެވެ. އަދި ވަޓްސްއެޕް ބިޒްނަސް ބޭނުންކުރާ ފަރާތްތަކަށް ވެސް އަދި މި ފީޗާ ތަޢާރަފުކޮށްފައެއް ނުވެއެވެ.
މި އައު ފީޗާގެ ބޭނުން ހިފައިގެން ސްކޭންކުރާ ޑޮކިއުމަންޓްތައް އިތުރަށް ސާފުވެ، އޭގައިވާ ލިޔުންތަކާއި ސޮއިތައް ރަނގަޅަށް ފެންނާނެއެވެ. މީގެ ކުރިން ޑޮކިއުމަންޓްތަކުގެ ފޮޓޯ ނަގާއިރު ބައެއް ފަހަރު އެކަށީގެންވާ ވަރަށް އަލިކަން ނުލިބި ނުވަތަ އަލިކަން ބޮޑުވެ އޭގައިވާ ލިޔުންތައް ރަނގަޅަށް ނުފެންނަ މައްސަލަ ދިމާވިއެވެ.
މެސެޖިން އެޕްތަކުގެ މެދުގައި އޮންނަ ވާދަވެރިކަން އިތުރުވެ، އެއް އެޕަކުން އަނެއް އެޕަށް ފީޗާތައް ކޮޕީކުރަމުންދާ މި ދުވަސްވަރު، މިފަދަ ފީޗާއެއް ތަޢާރަފުކުރުމަކީ ވަޓްސްއެޕްގެ ބޭނުންކުރާ ފަރާތްތަކަށް ލިބޭ ވަރަށް ބޮޑު ފަސޭހައެއް ކަމަށް ފާހަގަކުރެވެއެވެ.