އަންނަ ހަފުތާއިން ފެށިގެން މާލޭގެ މަގުމަތީގައި ދިރިއުޅޭ ބުޅާތައް ނަގައި، ސަރުކާރުން ގާއިމްކުރި ޕެޓް ކެއާ ފެސިލިޓީ، "އޮޅު ހިޔާ" އަށް ގެންދިޔުމުގެ މަސައްކަތް ފަށާނެ ކަމަށް މާލެ ސިޓީ ކައުންސިލުން މިއަދު ބުނެފިއެވެ.
ސިޓީ ކައުންސިލުން އެކްސްގައި ކުރި ޕޯސްޓެއްގައި ބުނީ، އެ ފެސިލިޓީއަށް ބުޅާތައް ގެންދަން ފެށުމުގެ އެންމެ ފަހުގެ މަޝްވަރާތައް އެންޖީއޯތަކާއެކު މިހާރު ކުރިއަށްދާ ކަމަށެވެ. އަދި ކައުންސިލުން މަސައްކަތް ކުރަމުން ދަނީ އަންނަ ހަފުތާ، މާލެތެރޭ އުޅޭ ބުޅާތައް މަގުމަތިން ނަގަން ފަށަން ކަމަށް އެ ކައުންސިލުން ބުންޏެވެ.
މަގުމަތީގައި ދިރިއުޅޭ ބުޅާތަކަށް 24ގަޑިއިރުގެ ޚިދުމަތާއެކު ޚާއްސަކޮށްފައިވާ ޕެޓް ކެއާ ފެސިލިޓީ، "އޮޅު ހިޔާ" ރައީސް ޑރ. މުހައްމަދު މުއިއްޒު ހުޅުވައިދެއްވީ ނޮވެމްބަރު ދެވަނަ ދުވަހުއެވެ.
އޮޅު ހިޔާގެ އެތެރޭގެ ފޮޓޮއެއް -- ފޮޓޯ/ މާލެ ސިޓީ ކައުންސިލް
މީގެ ކުރިން މިތަނާ ގުޅޭގޮތުން ވާހަކަ ދައްކަވަމުން މާލޭ ސިޓީ ކައުންސިލްގެ މޭޔަރު އާދަމް އާޒިމް ވިދާޅުވީ، ކައުންސިލުން ވިސްނަނީ އެތަނަށް ގެންދާ ބުޅާތައް އެއް ތަނެެއްގައި ބަހައްޓައިގެން މޮނިޓާ ކުރުމަށް ކަމަށެވެ.
ބުޅާ ފެސިލިޓީ އެޅުމުގެ އަމަލީ މަސައްކަތް ފަށާފައި ވަނީ މާޗު މަހުގެ 19ވަނަ ދުވަހެވެ.
މާލޭގައި ބުޅާ ގިނަވެފައިވާއިރު، އޭގެ ސަބަބުން ސިއްހީ އެތައް މައްސަލަތަކެއް ވެސް ކުރިމަތިވެއެވެ. މޭޔަރު މީގެ ކުރިން ވިދާޅުވީ މާލޭގައި ބުޅަލުގެ އާބާދީ 3،000އަށް އަރާނެ ކަމަށް ލަފާކުރެވޭ ކަމަށެވެ.
ހުޅުމާލޭ ފޭސް ދޭއްގައި ކެޓް ޝެލްޓަރު ގާއިމުކުރަނީ 5،000 އަކަފޫޓުގެ ބިމެއްގައެވެ. މި ތަނުގައި ކެޓް ޝެލްޓަރު ގާއިމު ކުރުމުން މާލޭގައި އުޅޭ ބުޅާތައް ގެންގޮސް، ފަރުވާ ދިނުމުގެ އިންތިޒާމު ގާއިމުކުރާނެއެވެ. މި ފެސިލިޓީއަކީ 24 ގަޑިއިރު ޚިދުމަތް ދޭނެ ފެސިލިޓީއެކެވެ.