މިދިޔަ އެމްޑީޕީ ސަރުކާރުގައި ފްލެޓުތައް ބަލައިލީ މޫކައި ހޮޓެލްގައި ތިބެގެން ކަމަށް ވިދާޅުވެ، 19ވަނަ މަޖިލީހުގެ ބޮޑު ބައެއްގައި އެމްޑީޕީ ތަމްސީލުކުރެއްވި ކުރީގެ މެންބަރު މުހައްމަދު ނިހާދު ކުރީ ސަރުކާރަށް ބޮޑު ތުހުމަތެެއް ކުރައްވައިފިއެވެ.
ޕީއެންސީން މިރޭ ބޭއްވި ހަރުގެ ޖަލްސާގައި ވާހަކަ ދައްކަވަމުން ނިހާދު ވިދާޅުވީ އެމްޑީޕީ ސަރުކާރުގައި ފްލެޓުތަކާއި ބިންތައް ވެސް ބަހައިލީ ކަމަށާއި، އެކަން އެންމެ ރަނގަޅަށް އެނގޭ އެކަކީ އޭނާ ކަމަށެވެ.
ނިހާދަކީ އެމްޑީޕީގެ ޓިކެޓުގައި 19ވަނަ މަޖިލީހަށް ހޮވިވަޑައިގެން، އައްޑޫ ސިޓީ ފޭދޫ ދާއިރާ ތަމްސީލު ކުރެއްވި މެންބަރެކެވެ. ނަމަވެސް މި ސަރުކާރު ވެރިކަމަށް އައުމުން އޭނާ ޕީއެންސީއަށް ސޮއި ކުރެއްވިއެވެ.
އޭނާ ތުހުމަތު ކުރެއްވި ގޮތުގައި އެމްޑީޕީ ސަރުކާރުގައި ފްލެޓުތަކާއި ބިންތައް ވެސް ބަހައިލީ، "އެލީޓް ގްރޫޕު"ގައި ހިމެނޭ މަޖިލިސް މެންބަރުންތަކަކާ އެކު، މޫކައި ހޮޓެލް ތެރޭގައެވެ. ސީދާ ނަން ވިދާޅުނުވި ނަމަވެސް، ނިހާދު ތުހުމަތު ކުރެއްވި ގޮތުގައި، އެ ކަމުގައި އިސްކޮށް ހުންނެވީ އޭރު އިކޮނޮމިކް މިނިސްޓަރުކަމުގައި ހުންނެވި އެމްޑީޕީގެ ޗެއާޕާސަން ފައްޔާޒު އިސްމާއީލެވެ. އެ ސަރުކާރުގައި ހައްގުނުވާ އެތައް ބަޔަކަށް ފްލެޓު ދީފައިވާ ކަމަށް ނިހާދު ވިދާޅުވިއެވެ.
"...ރައްޔިތުންގެ މަޖިލީހުގެ، އެ ބްރޯ އުފައްދާފައި އޮންނަ އެލީޓު ގްރޫޕުގެ މީހުން އެ ތަނަށް ގެންގޮސްގެން، އެ މީހުން މެދުވެރިކޮށް ފްލެޓު ބެހީ. ހައްގުނުވާ އެތައް ބަޔަކަށް ދީފައި އޮންނާނެ. މިހާރު އެ ފެންނަ ލިސްޓުތަކުން ވެސް އެ އޮތީ އެ ކަން ފެންނަން" ނިހާދު ވިދާޅުވިއެވެ.
ނިހާދު ވިދާޅުވީ، މިދިޔަ ސަރުކާރުގައި ކުންފުނިތަކުގެ ބޯޑުގައި ތިބި ބޭފުޅުންނަށް ވެސް ނުހައްގުން ފްލެޓު ދީފައިވާ ކަމަށެވެ. އަމިއްލަ ނަމުގައި ފްލެޓެއް ނުވަތަ ބިމެއް ނުވަތަ އިމާރާތެއް އޮތް ފަރާތްތަކަށް ވެސް ފްލެޓު ދިންކަމަށް އޭނާ ތުހުމަތު ކުރެއްވިއެވެ.
"ހިޔާގައި ފްލެޓު ހުރި މީހާއަށް ވިނަރެސްއިން ފްލެޓު ލިބިފައި އެބަހުރި. ވިނަރެސްގެ ފްލެޓު ލިބިފައިހުރި މީހާއަށް ހުޅުމާލެއިން ދޫކުރި އަގުބޮޑު ބާރަ ވިހި މިލިއަން ރުފިޔާގެ ބިން ދީފައި އެބަހުރި..." ނިހާދު ވިދާޅުވިއެވެ.
އެމްޑީޕީ ސަރުކާރުގައި ރައްޔިތުންގެ ބޯހިޔާވަހިކަމަށް ޚިޔާނާތްތެރިވެ، އަމިއްލަ މަންފާއަށް މަސައްކަތްކޮށްފައިވާ ކަމުގެ ތުހުމަތު ނިހާދު ކުރެއްވީ، ކުރީ ސަރުކާރުގެ "ބިންވެރިޔާ ސްކީމް"ގެ ދަށުން ނުހައްގުން ގޯތިތަކެއް ދިން މައްސަލައެއް ބަލަމުންދަނިކޮށެވެ. މި މައްސަލައިގައި އެންމެ ބޮޑު ތުހުމަތެއް ކުރަނީ އެޗްޑީސީގެ މެނޭޖިން ޑިރެކްޓަރަކަށް ހުންނެވި އިބްރާހީމް ފަޒުލް ރަޝީދަށެވެ.
މި މައްސަލަތައް ފެންމަތިވެފައި ވަނިކޮށް، ފްލެޓު އެޅުމުގެ ނަމުގައި ސީލައިފް ގްލޯބަލްއިން ހިންގި ސްކޭމްގައި ގެއްލުންވި މީހުންނަށް ވިނަރެސް ފުލެޓުތަކެއް ދޭން އެންގުމުން، ސީލައިފަށް ފައިސާ ދެއްކި ކަމުގެ ފޭކު ލިޔުންތަކެއް ހަދައިގެން ވިނަރެސް ފުލެޓުތަކެއް ދީފައިވާކަން ވެސް ވަނީ ހާމަވެފައެވެ.
މި މައްސަލަތައް ފެންމަތިވުމާ އެކު، ތަހުގީގަށް ފުރުސަތު ދިނުމަށް ކަމަށް ބުނެ ފަޒުލް ވަނީ އިސްތިއުފާ ދެއްވާފައެވެ.