ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ)ން ފަސް ލެޕްޓޮޕެއް ވަގަށް ނަގައިފިއެވެ.
މިކަމާ ގުޅިގެން މިރޭ ފުލުހުން މީޑިއާތަކާ ހިއްސާކުރި މެސެޖެއްގައި ވަނީ އެޗްޑީސީން ފަސް ލެޕްޓޮޕެއް ވަގަށް ނެގި މައްސަލައެއް މިއަދު ފުލުހުންނަށް ރިޕޯޓްކޮށްފައި ވާކަމަށެވެ.
ފުލުހުން ބުނީ ލެޕްޓޮޕްތައް ވަގަށް ނަގާފައި ވަނީ ފަރުކޮޅުގައި ހުރި އެޗްޑީސީގެ ޕްރޮޖެކްޓް އޮފީހުން ކަމަށެވެ. އަދި މި މައްސަލައިގައި ތުހުމަތުކުރެވޭ މީހާ މިވަގުތު ހުރީ މަސްތުވާތަކެތީގެ މައްސަލައެއްގައި ހައްޔަރުގައިކަން ވެސް ފުލުހުން ފާހަގަކުރިއެވެ.
ވަގަށް ނެގި ލެޕްޓޮޕްތައް އަދި ހޯދިފައި ނުވާއިރު، އެތަކެތި ހޯދުމުގެ މަސައްކަތް ކުރާކަމަށް ފުލުހުން ބުންޏެވެ.
މި މައްސަލަ ފުލުހުން ދަނީ ތަހުގީގު ކުރަމުންނެވެ.
އެ ކުންފުނީގެ ފައިނޭންސް ޑިޕާޓްމަންޓުން ލެޕްޓޮޕްތަކެއް ގެއްލުންކަމަށް ބުނެ ބައެއް މީޑިއާތަކުން ވަނީ ރިޕޯޓުކޮށްފައެވެ. ނަމަވެސް އެކަން ކުންފުނިން ވަނީ ދޮގު ކޮށްފައެވެ.
އެޗްޑީސީން ލެޕްޓޮޕްތައް ވަގަށް ނަގާފައި ވަނީ މާލޭގެ ރައްވެހިންނަށް ބޯހިޔާވެހިކަން ދިނުމަށް ކުރިއަށްގެންދާ ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކަށް ގޯތި ލިބުނު ކަމުގެ ވަގު ލިޔުންތަކެއް ތައްޔާރުކޮށް ގޯތިތަކެއް ދިން ކަމަށް ތުހުމަތުކުރެވޭ މައްސަލައެއް ފެންމަތިވެފައިވާ ދަނޑިވަޅެއްގައެވެ.
މި މައްސަލައިގައި އެންމެ ބޮޑު ތުހުމަތެއް ކުރަނީ އެ ކުންފުނީގެ މެނޭޖިން ޑިރެކްޓަރަކަށް ހުންނެވި އިބްރާހީމް ފަޒުލް ރަޝީދަށެވެ. މި މައްސަލައިގައި ނުހައްގުން ގޯތި ލިބުން މީހުންގެ ތެރޭގައި ފަޒުލްގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދުފަޒީލް ރަޝީދު ހިމެނެއެވެ.
މި މައްސަލައާ ގުޅިގެން އެޗްޑީސީގެ ގިނަ މުއައްޒަފުންތަކެއް ސަސްޕެންޑް ކޮށްފައި ވާއިރު ފަޒުލް ވަނީ މަގާމުން އިސްތިއުފާ ދެއްވާފައެެވެ. އޭނާ މަގާމުން އިސްތިއުފާ ދެއްވީ ތަހުގީގަށް ފުރުސަތު ދިނުމަށް ކަމަށް ބުނެއެވެ.