ކޮމިޝަނާ އޮފް ޕޮލިސް އަލީ ޝުޖާއުއާއި ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ)ގެ އާ މެނޭޖިން ޑިރެކްޓަރު މައުރޫފް ޖަމީލް މިއަދު ބައްދަލުކުރައްވައިފިއެވެ.
ފުލުހުން މިރޭ ކޮށްފައިވާ ޕޯސްޓެއްގައި ވަނީ މި ބައްދަލުކުރެއްވުމަކީ އެޗްޑީސީގެ މެނޭޖިން ޑިރެކްޓަރުގެ މަގާމާ މައުރޫފް ހަވާލުވެވަޑައިގަތުމަށްފަހު ތައާރަފު ވުމުގެ ގޮތުން ބޭއްވެވި ބައްދަލުވުމެއް ކަމަށެވެ.
ފުލުހުން ވަނީ މި ބައްދަލުވުމުގައި ގެދޮރުވެރިޔާ އަދި ބިންވެރިޔާ ސްކީމާ ގުޅިގެން މިހާރު ކުރެވެމުންދާ ތަހުގީގުތަކާ ގުޅޭގޮތުން މަޝްވަރާ ކުރައްވާފައި ވާކަމަށް ވިދާޅުވެފައެވެ.
މާލޭގެ ރައްވެހިންނަށް ބޯހިޔާވެހިކަން ދިނުމަށް ކުރިއަށްގެންދާ ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކަށް ގޯތި ލިބުނު ކަމުގެ ވަގު ލިޔުންތަކެއް ތައްޔާރުކޮށް ގޯތިތަކެއް ދިން ކަމަށް ތުހުމަތުކުރެވޭ މައްސަލައެއް މިފަހުން ވަނީ ފެންމަތިވެފައެވެ.
މި މައްސަލައިގައި އެންމެ ބޮޑު ތުހުމަތެއް ކުރަނީ އެ ކުންފުނީގެ މެނޭޖިން ޑިރެކްޓަރަކަށް ހުންނެވި އިބްރާހީމް ފަޒުލް ރަޝީދަށެވެ. މި މައްސަލައިގައި ނުހައްގުން ގޯތި ލިބުން މީހުންގެ ތެރޭގައި ފަޒުލްގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދުފަޒީލް ރަޝީދު ހިމެނެއެވެ.
މި މައްސަލައާ ގުޅިގެން އެޗްޑީސީގެ ގިނަ މުއައްޒަފުންތަކެއް ސަސްޕެންޑް ކޮށްފައި ވާއިރު ފަޒުލް ވަނީ މަގާމުން އިސްތިއުފާ ދެއްވާފައެެވެ. އޭނާ މަގާމުން އިސްތިއުފާ ދެއްވީ ތަހުގީގަށް ފުރުސަތު ދިނުމަށް ކަމަށް ބުނެއެވެ.
އެޗްޑީސީގެ މެނޭޖިން ޑިރެކްޓަރުގެ މަގާމަށް މައުރޫފް ޖަމީލް އައްޔަންކުރެއްވީ އޭގެ ފަހުންނެވެ.
މައުރޫފް ޖަމީލާ ގުޅޭގޮތުން ރައީސް ޑރ، މުހައްމަދު މުއިއްޒު ވިދާޅުވީ އެއީ އެމަނިކުފާނު ފުރިހަމައަށް އިތުބާރު ކުރައްވާ ބޭފުޅެއް ކަމަށެވެ.