ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ)އިން ރޭ ވަގަށް ނެގި ފަސް ލެޕްޓޮޕް މިހާރު ހޯދައިފިއެވެ.
ރޭ ފުލުހުން މީޑިއާތަކާ ހިއްސާކުރި މެސެޖެއްގައި ވަނީ އެޗްޑީސީން ފަސް ލެޕްޓޮޕެއް ވަގަށް ނެގި މައްސަލައެއް ފުލުހުންނަށް ރިޕޯޓްކޮށްފައި ވާކަމަށް ބުނެފައެވެ.
އެއާއެކު މިހާރު ލެޕްޓޮޕްތައް ހޯދައިފައިވާ ކަމަށް ވަނީ ބުނެފައެވެ.
ފުލުހުން ބުނީ ލެޕްޓޮޕްތައް ވަގަށް ނެގީ ފަރުކޮޅުގައި ހުރި އެޗްޑީސީގެ ޕްރޮޖެކްޓް އޮފީހުން ކަމަށެވެ. އަދި މި މައްސަލައިގައި ތުހުމަތުކުރެވޭ މީހާ މިވަގުތު ހުރީ މަސްތުވާތަކެތީގެ މައްސަލައެއްގައި ހައްޔަރުގައިކަމަށް ވެސް ފުލުހުން ފާހަގަކުރިއެވެ.
މި މައްސަލަ ފުލުހުން ދަނީ ތަހުގީގު ކުރަމުންނެވެ.
އެ ކުންފުނީގެ ފައިނޭންސް ޑިޕާޓްމަންޓުން ލެޕްޓޮޕްތަކެއް ގެއްލުންކަމަށް ބުނެ ރޭ ބައެއް މީޑިއާތަކުން ރިޕޯޓުކޮށްފައިވެއެވެ. ނަމަވެސް އެކަން ދޮގުކޮށް އެޗްޑީސީން ބުނީ ލެޕްޓޮޕްތައް ވަގަށް ނަގައިފައިވަނީ އެހެން ޑިޕާޓްމަންޓަކުން ކަމަށެވެ.
ލެޕްޓޮޕްތައް ގެއްލުނީ މާލޭގެ ރަށްވެހިންނަށް ބޯހިޔާވެހިކަން ދިނުމަށް ކުރިއަށްގެންދާ ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކަށް ގޯތި ލިބުނު ކަމުގެ ވަގު ލިޔުންތަކެއް ތައްޔާރުކޮށް ގޯތިތަކެއް ދިން ކަމަށް ތުހުމަތުކުރެވޭ މައްސަލައެއް ފެންމަތިވެފައިވާ ދަނޑިވަޅެއްގައެވެ.
މި މައްސަލައިގައި އެންމެ ބޮޑު ތުހުމަތެއް ކުރަނީ އެ ކުންފުނީގެ މެނޭޖިން ޑިރެކްޓަރަކަށް ހުންނެވި އިބްރާހީމް ފަޒުލް ރަޝީދަށެވެ. މި މައްސަލައިގައި ނުހައްގުން ގޯތި ލިބުން މީހުންގެ ތެރޭގައި ފަޒުލްގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދުފަޒީލް ރަޝީދު ހިމެނެއެވެ.
މި މައްސަލައާ ގުޅިގެން އެޗްޑީސީގެ ގިނަ މުއައްޒަފުންތަކެއް ސަސްޕެންޑްކޮށްފައިވާއިރު ފަޒުލް ވަނީ މަގާމުން އިސްތިއުފާ ދެއްވާފައެެވެ. އޭނާ މަގާމުން އިސްތިއުފާ ދެއްވީ ތުހުމަތުތަކަށް އިންކާރުކޮށް، ތަހުގީގަށް ފުރުސަތު ދިނުމަށް ކަމަށް ބުނެއެވެ.
އެއާއެކު މިހާރު އެޗްޑީސީއަށް ކުރީގެ ކޮންސްޓްރަކްޝަން މިނިސްޓަރު މުޙައްމަދު މައުރޫފް ޖަމީލު ވަނީ އައްޔަންކޮށްފައެވެ.