ކުރީ ސަރުކާރުން ކުރިއަށްގެންދިޔަ ބޯހިޔާވަހިކަމުގެ ދެ މަޝްރޫއާ ގުޅޭ ގޮތުން ފުލުހުން ކުރިއަށްގެންދާ ތަހުގީގާ ގުޅިގެން ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)އިން 15 މުވައްޒަފުން ވަކިކޮށްފިއެވެ.
"ސަން"އަށް މައުލޫމާތު ލިބިފައިވާ ގޮތުގައި، ވަޒީފާއިން ވަކިކުރި 15 މުވައްޒަފުންގެ ތެރޭގައި މި މައްސަލައިގައި އެންމެ ފުރަތަމަ ސަސްޕެންޑުކުރި މުވައްޒަފުންތަކެއް ވެސް ހިމެނެއެވެ. އެގޮތުން، ކުރިން ސަސްޕެންޑުކޮށްފައިވާ ޗީފް ފައިނޭންޝަލް އޮފިސަރު އަބްދުﷲ ފާއިދާއި ޗީފް ބިޒްނަސް އޮފިސަރު އަދި މީޑިއާ ޑިޕާޓްމެންޓްގެ ހެޑް އަހުމަދު ޔާމީން ވަކިކޮށްފައިވާ ކަމަށް މައުލޫމާތު ލިބިފައިވެއެވެ.
ބިންވެރިޔާ ސްކީމުން ނުހައްގުން ގޯތިތަކެއް ދިން ކަމަށް ތުހުމަތުތައް ފެންމަތިވިއިރު އެޗްޑީސީގެ މެނޭޖިން ޑިރެކްޓަރުގެ މަގާމުގައި ހުންނެވި އިބްރާހީމް ފަޒުލް ރަޝީދު ވަނީ އިއްޔެ މަގާމުން އިސްތިއުފާ ދެއްވައިފައެވެ. އޭނާގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދުގެ ޝަރުތު ހަމަނުވި ނަމަވެސް އޭނާއަށް ގޯއްޗެއް ދީފައިވާ ކަމަށް، ސޯޝަލް މީޑިއާގައި އާންމުވެފައިވާ ލިޔެކިޔުންތަކުން ދައްކައެވެ.
އެ މައްސަލައާ ގުޅިގެން އެމްޑަބްލިޔުއެސްސީގެ ބޯޑުން ވަނީ ފަޒީލް ސަސްޕެންޑުކޮށްފައެވެ.
އެޗްޑީސީގެ އާ މެނޭޖިން ޑިރެކްޓަރަކަށް މުޙައްމަދު މައުރޫފް ޖަމީލު މިއަދު ވަނީ އައްޔަންކޮށްފައެވެ.
މީގެ ކުރިން ޕީސީބީން ވަނީ އެޗްޑީސީގެ ޗެއާމަން އަހުމަދު ނާސިފް ފިޔަވައި ޑިރެކްޓަރުންގެ ބޯޑުގެ ހުރިހާ މެންބަރުން ވެސް ވަނީ މުއްދަތެއް ނެތް ގޮތަށް ސަސްޕެންޑުކޮށްފައެވެ. އެ ކުންފުނީގެ އިސް މުވައްޒަފުންތަކެއް ވެސް ސަސްޕެންޑުކޮށްފައިވާއިރު އޭގެ ތެރޭގައި އައިޓީ ކޮންސަލްޓެންޓް އަބްދުﷲ ޝުހޫދާއި ރެއަލް އެސްޓޭޓް މެނޭޖްމެންޓް ޑެޕިއުޓީ ޑިރެކްޓަރު އަހުމަދު އައިމަން ހިމެނެއެވެ.
ފުލުހުން އެ މައްސަލައިގެ ޖިނާއީ ތަހުގީގެއް ހިންގަމުން އަންނައިރު ޕްރޮސެކިއުޓާ ޖެނެރަލް އައްބާސް ޝަރީފް ވަނީ ތަހުގީގު އަވަސް ކުރުމަށާއި ކޮންމެ ހަފުތާއަކު އެއް ފަހަރު އެކަމާ ބެހޭ މައުލޫމާތު ހިއްސާކުރުމަށް ފުލުހަށާއި އެންޓި ކޮރަޕްޝަން ކޮމިޝަނަށް އަންގަވައިފައެވެ.
ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުގެ ބިންވެރިޔާ ސްކީމްގެ ފުރަތަމަ ފިޔަވަހީގެ ދަށުން، 18،955 މީހުން ގޯއްޗަށް ޝަރުތު ހަމަވާއިރު، ޖުމުލަ 9،003 ގޯތި ދޫކުރަން ނިންމައިފައިވެއެވެ. އެ ގޯތިތައް ދޫކޮށްފައިވަނީ ހުޅުމާލެއާއި ގުޅީފަޅާއި ގިރާވަރުފަޅުންނެވެ.
ގެދޮރުވެރިޔާ ސްކީމުން ފުލެޓަށް އެދި ހުށަހެޅި މީހުންގެ ތެރެއިން ޝަރުތު ހަމަވި 15،000 އަށްވުރެ ގިނަ މީހުނަށް ފުލެޓު ދިނުމަށް އެމްޑީޕީ ސަރުކާރުން އޮތީ ނިންމައިފައެވެ. އޭގެ ތެރެއިން ފުރަތަމަ 4،000 ފުލެޓް ލިބޭ މީހުންގެ ލިސްޓެއް އެމްޑީޕީ ސަރުކާރުގައި ނެރުނު ނަމަވެސް، އެ ލިސްޓުން މައްސަލަތަކެއް ފާހަގަވެ، އޭސީސީން މައްސަލަ ބަލާތީ ފުލެޓު ދިނުން ލަސްވިއެވެ.
އެ މައްސަލަތަކާ ގުޅޭ ގޮތުން ގޮތް ނިންމަން ހައުސިން މިނިސްޓްރީއާ ހަވާލުކުރުމުން، ފުލެޓު ލިސްޓު މުރާޖާ ކުރަން ކޮމިޓީއެއް އެކުލަވައިލީއެވެ. އެ ކޮމިޓީން ބަލައި، ލިސްޓު އާންމުކުރަން އެންމެ ފަހުން ދިން ތާރީޚަކީ މިދިޔަ މަހުގެ 16 ކަމަށްވާއިރު، އެ ތާރީޚަށް ވެސް މަސައްކަތްތައް ނުނިމި މިހާރު ފުލެޓު ލިބޭ ފަރާތްތައް ކަށަވަރު ވާނެ ދުވަހެއް އޮތީ ނޭނގިފައެވެ.