ނ. ހޮޅުދޫގައި މިދިޔަ ބުރާސްފަތި ދުވަހު ހިނގި މާރާމާރީއެއްގައި، އެރަށުން މަރުވެފައި އޮއްވާ ފެނުން ޒަކިއްޔާ މޫސާގެ ދޮށީ ދަރިފުޅު ނިއުލައިފް، މޫސާ ރިމްޒީ (30) މިއަދު ހައްޔަރުކޮށްފިއެވެ.
މިކަމާ ގުޅިގެން ފުލުހުން މީޑިއާތަކާ ހިއްސާކުރި މެސެޖެއްގައި ވަނީ، ބުރާސްފަތި ދުވަހު ހޮޅުދޫގައި ހިންގި މާރާމާރީގެ މައުލޫމާތު ފުލުހުންނަށް ރިޕޯޓުކުރީ ޖެހިގެން އައި ހުކުރު ދުވަހު ކަމަށެވެ.
އެއާއެކު ކޯޓު އަމުރެއްގެ ދަށުން ރިމްޒީ ހައްޔަރުކުރީ މިއަދެވެ.
ފުލުހުން ބުނީ މި މާރާމާރީ ހިނގާފައި ވަނީ އުފެދުނު ހަމަނުޖެހުމެއްގެ ތެރެއިން ކަމަށެވެ. މައުލޫމާތު ލިބިފައިވާ ގޮތުގައި ހަމަނުޖެހުން ހިނގީ ޒަކިއްޔާގެ މަރުގެ މައްސަލައިގައި ދެކެވުނު ވާހަކައެއްގެ ސަބަބުންނެވެ.
މި މައްސަލަ ފުލުހުން ދަނީ ތަހުގީގު ކުރަމުންނެވެ.
އުމުރުން 50 އަހަރުގެ ޒަކިއްޔާ ބޮޑެތި ޒަޚަމްތަކަކާއެކު މަރުވެފައި އޮއްވައި ފެނުނީ މިދިޔަ ސެޕްޓެމްބަރު މަހުގެ 10ވަނަ ދުވަހުގެ ހެނދުނެވެ. މި މައްސަލާގައި އޭނާ މަރާލި ކަމަށާއި އެކަމުގައި އިންސާފު އަވަސްކޮށްދިނުމަށް އެދި ހޮޅުދޫގައި އެއްވުންތައް ވެސް ވަނީ ބާއްވާފައިވެއެވެ.
ނަމަވެސް، މިމަހުގެ ތިން ވަނަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމެއްގައި ޗީފް އިންސްޕެކްޓާ އޮފް ޕޮލިސް މުހައްމަދު ސާމިހު ވިދާޅުވީ ޒަކިއްޔާ މަރާލިކަމުގެ އެއްވެސް ހެއްކެއް ތަހުގީގަށް މިހާތަނަށް ފާހަގަކުރެވިފައި ނެތް ކަމަށެވެ.