މި މަހުގެ ބާރަވަނަ ދުވަހު ގްރީން ބިލްޑިންގައި ރޯވެ ހިނގި އަލިފާނުގެ ހާދިސާގައި ވަގުތީ ހިޔާތަކަށް ބަދަލުކުރި މީހުން އެ މީހުންގެ އަމިއްލަ ގެތަކަށް ބަދަލުވެފައިވާ ކަމަށް ނެޝެނަލް ޑިޒާސްޓާ މެނޭޖްމެންޓް އޮތޯރެޓީ (އެންޑީއެމްއޭ)އިން ބުނެފިއެވެ.
"ސަން" އަށް މައުލޫމާތު ދެމުން އެންޑީއެމްއޭގެ މީޑިއާ އޮފިޝަލް ވިދާޅުވީ އަލިފާނުގެ ހާދިސާގައި ވަގުތީ ހިޔާއަށް ބަދަލުކުރި މީހުން ހޮނިހިރު ދުވަހު އަމިއްލަ ގެތަކަށް ބަދަލުވެފައިވާ ކަމަށެވެ.
ތިން މިނިސްޓްރީއެއް ހިންގަމުންދިޔަ ދެ އިމާރާތުގައި ރޯވެ ހިނގި އަލިފާނުގެ ހާދިސާއާ ގުޅިގެން އެ ސަރަހައްދުގައި ހުރި ގެތަކުން ނުކުންނަން ޖެހުނު 29 މީހަކަށް އެ އޮތޯރިޓީން ވަނީ ވަގުތީ ބޯހިޔާވަހިކަން ދީފައެވެ.
ރޯވި ދެ އިމާރާތުގައި ހިންގަމުންދިޔައީ ހައުސިން މިނިސްޓްރީއާއި އިންފްރާސްޓްރަކްޗާ މިނިސްޓްރީ އަދި އެންވަޔަރަމެންޓް މިނިސްޓްރީގެ އިތުރުން އެންވަޔަރަމެންޓް ޕްރޮޓެކްޝަން އޭޖެންސީ (އީޕީއޭ) އާއި މާލޭ ސިޓީ ކައުންސިލްގެ އޮފީހެކެވެ.
އޭގެ ތެރެއިން މިނިސްޓްރީތަކާއި އީޕީއޭގެ މަސައްކަތްތައް ދަރުބާރުގޭގައި ފަށައިފައިވާއިރު، ސިޓީ ކައުންސިލްގެ އޮފީހުގެ ޚިދުމަތްތައް ވަނީ ހުޅުމާލޭގައި ހުންނަ ކައުންސިލް އޮފީހަށް ބަދަލުކޮށްފައެވެ.
އެ އަލިފާންގަނޑު ރޯވާން މެދުވެރިވި ވަކި ސަބަބެއް މިހާތަނަށް ހާމަކޮށްފައިނުވާއިރު، ފުލުހުން ގެންދަނީ އިންޑިއާގެ ތަޖުރިބާކާރުންގެ ޚާއްސަ ޓީމަކާ އެކުގައި އެ މައްސަލައިގެ ތަހުގީގުތައް ކުރިއަށް ގެންދަމުންނެވެ.