ހައުސިން މިނިސްޓްރީ ހިންގާ އިމާރާތުގައި ހިނގި އަލިފާނުގެ ހާދިސާގެ ސަބަބުން މާލޭ ރަށްވެހީންނަށް ޚާއްސަ ބިންވެރިޔާ ސްކީމުން ލިބޭ ގޯތިތައް ހައްގުވެރިންނަށް ހަވާލުކުރުމަށް އެއްވެސް ހުރަހެއް އޮވެގެން ނުވާނެ ކަމަށް މާލޭގެ މޭޔަރު އާދަމް އާޒިމް ވިދާޅުވެއްޖެއެވެ.
ގެދޮރުވެރިޔާ ސްކީމާއި ބިންވެރިޔާއާ ގުޅޭ ލިޔެކިޔުމާއި މައުލޫމާތަކީ ހައުސިން މިނިސްޓްރީގެ ކްލައުޑް ހޯސްޓިންގައި ޑިޖިޓަލްކޮށް ބަލަހައްޓާ މައުލޫމާތުތަކެއް ކަމަށް ހައުސިންއިން ބުންޏެވެ. އެހެންކަމުން އެ މައުލޫމާތުތަކަށް އެއްވެސް އަސަރެއް ނުކުރާނެ ކަމަށް ހައުސިން މިނިސްޓްރީން ވަނީ ބުނެފައެވެ.
އަލިފާނުގެ ހާދިސާއިންވި ގެއްލުމުގެ ވާހަކަ ހިއްސާކުރައްވަމުން "ސަން"ގެ އެޑިޓަރުގެ ސުވާލު ޕްރޮގަރާމްގައި އާޒިމް ވިދާޅުވީ އޭސީސީއިން އާންމު ފަރުދުންނަށް ސިޓީ ދޫކޮށްފައިވާ ކަމަށާއި ދޫކުރި ބިންތަކުގެ ހުރިހާ ޑޮކިއުމެންޓެއް އޭސީސީން ގެންގޮސް އޭގެ ބެކްއަޕް ނަގާފައިވާ ކަމަށެވެ. އަދި ފަހުން އަނެއްކާ ހަވާލުކުރި ކަމަށެވެ.
މީގެ އިތުރުން އާޒިމް ވިދާޅުވީ އެއް އަހަރު ދުވަސްވީ އިރު ރައްޔިތުންނަށް ދޭންޖެހޭ ފުލެޓްތަކާއި ބިންތައް ނުދެވި ހުރީ އަލިފާން ރޯވެގެން ނޫންކަމަށާއި އެއީ އިހުމާލުވުމުގެ ސަބަބުން ކަމަށެވެ.
"މާލޭ ރައްޔިތުންނަށް ގެދޮރުވެރިކަމަކީ އެންމެ މުހިންމު ކަންތަކަށް ވާއިރު އެއް އަހަރު ދުވަސް ދުއްވާލީ ހަމަ މާދަން މާދަމައަށް، ހަފްތާ ފެށުމުގެކުރީ ދުވަހު ކިޔަމުން. އެ ކަހަލަ ކަންތައްތަކަކީ ގަބޫލުކުރެވޭ ކަންތައްތަކެއް ނޫން ރައްޔިތުންނަކަށް ހާއްސަކޮށް މާލޭ ސިޓީ މޭޔަރު ކަމުގެ ހައިސިއްޔަތުން،" އާޒިމް ވިދާޅުވިއެވެ.
އާޒިމް ވިދާޅުވީ ގޯތިގެދޮރު ނިންމަން އުޅޭނަމަށް ރަސްމާލެ ހިއްކަން ނޫޅޭނެކަމަށާއި އެ ފައިސާއިން މިހާރު ހިއްކާފައި ހުރި ތަންތަނަށް ބޭނުންވާ އިންފްރާސްޓްރަކްޗާ ތަރައްގީކޮށް އެތަނަށް މީހުން ގެންދިއުމުގެ މަސައްކަތް ކުރާނެކަމަށެވެ.
ނަމަލޭ ރައްޔިތުންނަށް ބޯހިޔާވަހިކަން ދިނުމަށްް ސަރުކާރުން އިސްކަންދޭތަން ނުފެންނަށް ކަން ވެސް އާޒިމް ވަނީ ފާހަގަކުރައްވައިފައެވެ.