ތިން މިނިސްޓްރީއެއް ހިންގަމުންދިޔަ ދެ އިމާރާތެއްގައި މިދިޔަ ހަފުތާގެ ބުރާސްފަތި ދުވަހު ރޯވި އަލިފާންގަނޑާ ގުޅިގެން އެ ސަރަހައްދުގައި ހުރި ގެތަކުން ނުކުންނަން ޖެހިފައިވާ 29 މީހުން އަދިވެސް ތިބީ ވަގުތީ ހިޔާތަކުގައި ކަމަށް ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ)އިން މިއަދު ބުނެފިއެވެ.
އެންޑީއެމްއޭއިން "ސަން"އަށް މައުލޫމާތު ދިން ގޮތުގައި، ވަގުތީ ހިޔާތަކުގައި ތިބީ ހަތް ގޭބީސީއަކުން ނުކުންނަން ޖެހުނު 15 ފިރިހެނުންނާއި 14 އަންހެނުންނެވެ. އޭގެ ތެރޭގައި ޚާއްސަ އެހީތެރިކަން ބޭނުންވާ މީހަކު ވެސް ހިމެނޭކަން އެ އޮތޯރިޓީން ފާހަގަކުރިއެވެ.
އެންޑީއެމްއޭއިން ބުނީ އަލިފާންގަނޑާ ގުޅިގެން ގެއްލުންވީ މ. ލޯކަށިގެ، މ. ކުދިމާވިލާ، މ. ލޫބިޔާގެ ހަތް ގޭބީސީއަކަށް ކަމަށެވެ. އެގޮތުން އެ މީހުން ދިރިއުޅެމުންދިޔަ އެޕާޓްމެންޓުތަކަށް ގެއްލުންވެފައި ވަނީ އަލިފާން ނިންވުމަށް ފެން ޖެހި ވަގުތު ކަމަށެވެ.
އެންޑީއެމްއޭގެ އެހީއާއެކު، ގެތަކުގެ ވެރިފަރާތްތަކުން މަރާމާތުގެ މަސައްކަތްތައް މިހާރު ކުރަމުން އަންނަ ކަމަށް އެ އޮތޯރިޓީން ބުންޏެވެ.
މީގެ ކުރިން އެންޑީއެމްއޭގެ ޗީފް އެގްޒެކެޓިވް ހިސާން ހަސަން ވިދާޅުވީ ގެތަަކަށް އަލުން މީހުން ދާން ރައްކާތެރިތޯ ބެލުމަށް އެސެސްމެންޓުތައް ހަދައި، އެކަމަށް ސަލާމަތީ ޚިދުމަތްތަކުގެ ކްލިއަރެންސް ވެސް ހޯދާނެ ކަމަށެވެ.
މި އަލިފާނުގެ ހާދިސާއާ ގުޅިގެން ބޭނުން ނުކުރެވޭ ވަރަށް އެނދި އިމާރާތް ހުރި ބިން ސާފުކުރުމުގެ މަސައްކަތް މިނިސްޓްރީ އޮފް ސިޓީސް, ލޯކަލް ގަވަމެންޓް ޕަބްލިކް ވޯކްސް އިން ދަނީ ކުރަމުންއެވެ.
ރޯވި ދެ އިމާރާތުގައި ހިންގަމުންދިޔައީ ހައުސިން، އިންފްރާސްޓްރަކްޗާ އަދި އެންވަޔަރަމެންޓް މިނިސްޓްރީއެވެ. އަދި އެންވަޔަރަމެންޓް ޕްރޮޓެކްޝަން އޭޖެންސީ (އީޕީއޭ) އާއި މާލޭ ސިޓީ ކައުންސިލްގެ އޮފީހެއް ވެސް އެތަނުގައި ހިންގަމުންދިޔައެވެ.
އޭގެ ތެރެއިން މިނިސްޓްރީތަކާއި އީޕީއޭގެ މަސައްކަތްތައް ދަރުބާރުގޭގައި ފަށައިފައިވާއިރު، ސިޓީ ކައުންސިލްގެ އޮފީހުގެ ޚިދުމަތްތައް ވަނީ ހުޅުމާލޭގައި ހުންނަ ކައުންސިލް އޮފީހަށް ބަދަލުކޮށްފައެވެ.
އެ އަލިފާންގަނޑު ރޯވާން މެދުވެރިވި ސަބަބެއް މިހާތަނަށް ހާމަކޮށްފައިނުވާއިރު، ފުލުހުން ވަނީ މައްސަލައިގެ ތަހުގީގަށް ބޭރުގެ އެހީ ހޯދާނެ ކަމަށް ބުނެފައެވެ.