އައިޖީއެމްއެޗުގެ ފަރާތުން ހައުސިން މިނިސްޓްރީއަށް 100 ޑަސްބިން ހަދިޔާކޮށްފިއެވެ.
މިމަހުގެ 12 ވަނަ ދުވަހު މ. ގްރީން ބިލްޑިންގައި ހިނގި އަލިފާނުގެ ހާދިސާގައި ހައުސިން މިނިސްޓްރީއާއި، އިންފްރާސްޓްރަކްޗާ މިނިސްޓްރީ އަދި އެންވަޔަރަމަންޓް މިނިސްޓްރީ ހިންގަމުންދިޔަ އިމާރާތް ވަނީ ވަރަށް ބޮޑަށް ހަލާކުވެ ބޭނުންނުކުރެވޭ ވަރަށް އަނދައިފައެވެ.
އެހެންވެ، އެ މިނިސްޓްރީތަކުގެ މަސައްކަތް ވަގުތީގޮތުން ދަރުބާރުގެއަށް ބަދަލުކޮށް ވަނީ ޚިދުމަތްތައް ދޭން ފަށާފައެވެ.
އެ މަސައްކަތްތަކުގައި އެހީވުމުގެ ގޮތުން މިއަދު އައިޖީއެމްއެޗްގެ ފަރާތުން މިނިސްޓްރީއާ ޑަސްބިންތައް ހަވާލުކޮށްދެއްވީ ސީއީއޯ އިބްރާހީމް އަބްދުއްރައްޒާގު ހަލީމެވެ. މިނިސްޓްރީގެ ފަރާތުން ޑަސްބިންތަކާ ހަވާލުވެވަޑައިގަތީ ހައުސިން މިނިސްޓަރު ޑރ. އަލީ ހައިދަރު އަހުމަދެވެ.
ހައުސިން މިނިސްޓްރީން އެކްސްގައި ކުރި ޕޯސްޓެއްގައި ވަނީ އެ މިނިސްޓްރީގެ ނަމުގައި އައިޖީއެމް ހޮސްޕިޓަލަށް ޝުކުރު އަދާކޮށްފައެވެ.
މީގެ އިތުރުން އައިކެއާ އޮޕްޓިކަލްގެ ފަރާތުން ހައުސިން މިނިސްޓްރީއަށް ވަނީ 100 ނޯޓު ފޮތް ހަދިޔާކޮށްފައެވެ. އެކަމަށްޓަކައި އެ މިނިސްޓްރީން ވަނީ އައިކެއާއަށް ވެސް ޝުކުރު އަދާކޮށްފައެވެ.
ފާހަގަކޮށްލެވޭ ގޮތުގައި މިހާތަނަށް ވެސް އަލިފާނުގެ ހާދިސާ ހިނގަން މެދުވެރިވި ސަބަބެއް ސާފުވެފައެއް ނުވެއެވެ.
ނަމަވެސް އަލިފާނުގެ ހާދިސާއާ ގުޅިގެން ކުރެވެމުންދާ ތަހުގީގުގައި، އިންޑިއާގެ ތަޖުރިބާކާރުންގެ ޚާއްސަ ޓީމެއް މިހާރު ދިވެހި ފުލުހުންނާއެކު ދަނީ ހަރަކާތްތެރިވަމުންނެވެ.
މި ހާދިސާއާ ގުޅިގެން އާންމުންގެ އެންމެ ބޮޑު ކަންބޮޑުވުމަކަށް ވީ ރައްޔިތުންގެ ބޯހިޔާވަހިކަމާ ގުޅުންހުރި ލިޔެކިޔުންތަކަށް ވެދާނެ ގޮތަކާ މެދުގައެވެ. ނަމަވެސް މިނިސްޓަރު ހައިދަރު މީގެ ކުރިން ވިދާޅުވީ ފްލެޓު ލިސްޓާއި ގެދޮރުވެރިޔާ ސްކީމާއި ބިންވެރިޔާ ސްކީމުގެ އިތުރުން މިހާރު ހުޅުވާލެވިފައި އޮތް ލޯނު ސްކީމުގެ ހުރިހާ މައުލޫމާތެއް ރައްކާކުރަމުން ދިޔައީ ކްލައުޑް ސާވާއެއްގައި ކަމަށެވެ. އެހެންވެ، އެ ހާދިސާގައި އެ މައުލޫމާތުތަކަށް އެއްވެސް ގެއްލުމެއް ނުލިބި ރައްކާތެރިކަމާ އެއްކޮށް އެބަ ހުރިކަން މިނިސްޓަރު ފާހަގަކުރެއްވިއެވެ.
މި ހާދިސާގައި މާލޭ ސިޓީ ކައުންސިލްގެ ދެ ޑިޕާޓްމަންޓެއް ހިންގަމުންދިޔަ އިމާރާތަށް ވެސް ބޮޑެތި ގޮންޖެހުންތަކެއް ލިބުނެވެ. އެގޮތުން އެ ކައުންސިލުން ވެސް ގެއްލުން ލިބުނު ލިޔެކިޔުންތައް ތަރުތީބުކޮށް، ރިކަވާ ކުރުމުގެ މަސައްކަތްތައް މިހާރު ގެންދަނީ ކުރަމުންނެވެ.