މިމަހުގެ 12ވަނަ ދުވަހު ގްރީން ބިލްޑިންގްގައި ހިނގި އަލިފާނުގެ ހާދިސާގައި ލިބުނު ގެއްލުމުގެ ސަބަބުން މާލޭ ސިޓީ ކައުންސިލް މަގުމަތިވި ކަމަށާއި، ވަންނާނެ ތަނެއް ދެއްކުމަށް އެދި ސަރުކާރުގައި އާދޭސްކުރި ކަމަށް މާލޭ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.
އަލިފާން ރޯވި އިމާރާތުގައި ހައުސިން މިނިސްޓްރީ، އެންވަޔަރަމަންޓު މިނިސްޓްރީ އަދި އިންފްރާންސްޓްރަކްޗާ މިނިސްޓްރީގެ އިތުރުން މަލޭ ސިޓީ ކައުންސިލުގެ ތިން ސެކްޝަނެއް ހިންގައެވެ. އެއީ ސިޓީ ކައުންސިލުގެ ވައިޓަލް ސެކްޝަނާއި ލޭންޑް ސެކްޝަނުގެ އިތުރުން ބިލްޑިން ސެކްޝަނެވެ.
އެސްއެސްޓީވީގެ "އެޑިޓަރުގެ ސުވާލު" ޕްރޮގްރާމުގައި ވާހަކަ ދައްކަވަމުން އާޒިމް ވިދާޅުވީ، އަލިފާނުގެ ސަބަބުން ދިމާވި އެންމެ ބޮޑު ދަތިކަމަކީ ސިޓީ ކައުންސިލުން ވަންނާނެ ތަނެއް ނެތުންކަމަށެވެ. އެހެންކަމުން އިމާރާތުން ނެރުނު ކައުންސިލުގެ ލިޔެކިޔުންތައް ވެއްދީ ކައުންސިލުގެ ބެލުމުގެ ދަށުގައި ހުންނަ ތިން ސްކޫލަކަށްކަން އާޒިމް ފާހަގަކުރެއްވިއެވެ.
"ވަރަށް ކުދިކުދި ހޯލު އެއީ އެހެންވީމަ މިހާ ގިނަ ޑޮކިއުމަންޓް މިހާ ގިނަ މީހުންނަށް، އަދި ޑޮކިއުމަންޓުތައް މަސްހުނިވެފައި ހުރީމައާ އެއްކޮށް ތަރުތީބު ކުރެވޭނީ ބޮޑު ތަނެއް ލިބިގެން. ސަރުކާރުން ވެސް އަޅުގަނޑުމެން ވަންނާކަށް ތަނެއް ނުދައްކަ އޭރަކުއެއް. އެބޭފުޅުން ސަރުކާރުގެ ތިން މިނިސްޓްރީގެ ސެޓްއަޕް ދަރުބާރުގޭގައި ހެދިއިރު އަޅުގަނޑުމެންނަކަށް އެއްވެސް ތަނެއް ވެސް ނުދެއްކި،" އޭނާ ވިދާޅުވިއެވެ.
ސިޓީ ކައުންސިލުން ބަލަހައްޓަނީ ރައްޔިތުންނާ ގުޅޭ ވަރަށް ގިނަ މުހިންމު ލިޔެކިޔުންތަކެއްކަން ފާހަގަކުރައްވާ އާޒިމް ވިދާޅުވީ، ކައުންސިލުގެ ލިޔެކިޔުންތައް ވައްދާނެ ތަނެއް ހޯދައިދިނުމަކީ ސަރުކާރުން ކުރަންޖެހޭނެ ކަމެއް ކަމަށެވެ. އަދި މިކަން ސަރުކާރުން ނުކޮށްދިނުމުން، ސިޓީ ކައުންސިލް ވަންނާނެ ތަނެއް ނޯންނާނެކަން ވެސް ސަރުކާރަށް ވެސް އެނގެންޖެހޭ ކަމަށް އާޒިމް ވިދާޅުވިއެވެ.
"އަޅުގަނޑު މިނިސްޓަރު އާދަމް ޝަރީފަށް ގުޅިން. އެލްޖީއޭގެ ސީއީއޯ ނިމާލަށް ގުޅިން. އެއީ ކައުންސިލްތަކުގެ ބެލެނިވެރި ފަރާތަކީ. އަޅުގަނޑު ދެންނެވިން އަޅުގަނޑުމެން ވަންނާނެ ތަނެއް ނެތޭ ތަނެއް ހޯއްދަވައިދެއްވާށޭ އަވަހަށް، އަޅުގަނޑު މި ހުރިހާ ބޭފުޅުން ކައިރީ އާދޭސް ދެންނެވިން" އާޒިމް ވިދާޅުވިއެވެ.
އޭނާ ވިދާޅުވީ، ރައްޔިތުންނަށް އަވަހަށް ޚިދުމަތް ދިނުމަށް ރަނގަޅު އިމާރާތެއްގެ މުހިންމުކަން ފާހަގަކުރައްވާ ސަރުކާރުގެ ބޭބޭފުޅުންނަށް ސިޓީ ވެސް ފޮނުއްވާފައިވާނެ ކަމަށެވެ. އޭގެތެރޭގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި، ފިނޭންސް މިނިސްޓްރީ އާއި ލޯކަލް ގަވަމަންޓް މިނިސްޓްރީ ހިމެނޭކަން އޭނާ ފާހަގަކުރެއްވިއެވެ.
ހުޅުމާލޭގެ އުމަރު ޒާހިރު ބިލްޑިންގައި ހުސް ބައެއް ހުރިކަމަށް މައުލޫމާތު ލިބުމުން ސިޓީކައުންސިލަށް އެތަން ވަގުތީގޮތުން ދިނުމަށް ވެސް ކަމާގުޅުންހުރި އިދާރާތަކުގައި އެދުނުކަން ފާހަގަކުރައްވައި އާޒިމް ވިދާޅުވީ އެ ކަމަށް ވެސް އެދެވޭ ޖަވާބެއް ނުލިބުނު ކަމަށެވެ.
މިހާތަނަށް ކުރެވުނު މަސައްކަތުން މިހާރު ތާޖުއްދީން ސްކޫލުގެ ހޯލު ލިބިފައިވާކަމަށް އާޒިމް ވިދާޅުވިއެވެ.
އަލިފާނުގެ ހާދިސާގެ ސަބަބުން މާލޭގެ ވައިޓަލް ޚިދުމަތްތައް ހުޅުމާލެއަށް ބަދަލުކުރިއެވެ. އާޒިމް ވިދާޅުވީ މިއަދުން ފެށިގެން އެ ޚިދުމަތްތައް މާލެއިން ވެސް ފޯރުކޮށްދޭން ފެށޭނެކަމަށެވެ.
އަދި އަލިފާނުގެ ހާދިސާގައި ގެއްލުން ލިބުނު ލިޔެކިޔުންތަކުގެ ތެރެއިން 99 ޕަސެންޓް ލިޔެކިޔުން ސަލާމަތްކުރެވޭނެ ކަމުގެ އުންމީދު އެބައޮތް ކަމަށް ވެސް އޭނާ ވިދާޅުވިއެވެ.