މާލޭގެ މަގެއް މަތިން ސައިކަލެއްގައި ދިޔަ އަންހެނެއްގެ އަތުން ފޭރެން މަސައްކަތްކުރި ފިރިހެން މީހާ، ފުލުހުން ހައްޔަރުކޮށްފިއެވެ.
ސޯޝަލް މީޑިއާގައި އާއްމުވެފައިވާ ވީޑިއޯއަކުން ފެންނަ ގޮތުގައި ސައިކަލުގައި ދިޔަ އަންހެން މީހާއާ އަރާ ހަމަކުރި އެހެން ސައިކަލެއްގައި އިން ފިރިހެނަކު ވަނީ އެ އަންހެން މީހާގެ ކަރުގައި އޮތް ފަށް ފޭރުމަށް މަސައްކަތްކޮށްފައެވެ. އެކަން އޭނާއަށް ނުވުމުން, ސައިކަލުން ފައިބައި އަންހެން މީހާގެ އަތްދަބަސް ފޭރެން މަސައްކަތް ކުރެއެވެ.
ނަމަވެސް އަންހެން މީހާ މަގުގެ އެއްފަރާތު ގޯޅިތެރެއަށް ދުވެފައިދާ މަންޒަރު ވީޑިއޯއިން ފެނެއެވެ.
އެއާއެކު ފިރިހެން މީހާ ވަނީ ސައިކަލަށް އަރައި، އެ ތަނުން ފިލާފައެވެ. އޭނާ ލައިގެން ހުރީ ރަތް ކުލައިގެ ގޮޅި ޖެހި ގަމީހެކެވެ. އަދި އޭނާ އެވަގުތު ހުރީ ހުދު ކުލައިގެ ހެލްމެޓެއް ވެސް އަޅައިގެންނެވެ.
މި ހާދިސާއާ ގުޅިގެން ފުލުހުން ބުނީ ފޭރެން މަސައްކަތްކުރި ފިރިހެން މީހާ މިހާރު ހައްޔަރުކޮށްފައިވާ ކަމަށެވެ. އަދި އޭނާ ދުއްވި ސައިކަލު ވެސް ފުލުހުންގެ ބެލުމުގެ ދަށަށް ގެނެސްފައިވާ ކަމަށް ފުލުހުން މައުލޫމާތުދިނެވެ.
މި ހާދިސާ ހިނގި ވަގުތު މަގުމަތީގައި ވެސް މީހުން ހަރަކާތްތެރިވެ އުޅުނެވެ. ފާހަގަކޮށްލެވޭ ގޮތުގައި އެ ފިރިހެން މީހާ ސައިކަލުގައި ފިލާފައި ވަނީ ފަހަތުން އެހެން ދެ ސައިކަލެއް އައިސް މަޑުކުރި ވަގުތުގައެވެ.
ފޭރުމުގެ މިފަދަ މައްސަލަތައް އަބަދުވެސް ހިނގައެވެ. ޚާއްސަކޮށް މީހުންނަށް ބިރުދައްކައިގެން ފައިސާ އަތުލުމާއި، ފޭރުމުގެ މައްސަލަތައް މާލޭގައި ވެސް އިތުރެވެ.