ޓެކްސީ ޑްރައިވަރުންގެ އެއްވެސް ކަންބޮޑުވުމަކަށް މިހާތަނަށް ހައްލެއް ނުލިބޭ ކަމަށް ޑްރައިވަރުންގެ އެސޯސިއޭޝަނުން މިއަދު ބުނެފިއެވެ.
ޓެކްސީ ޑްރައިވަރުންގެ ކަންބޮޑުވުންތައް 'ސަން'އަށް ކިޔައިދެމުން އެންމެ ބޮޑު ކަންބޮޑުވުމަކަށް އެ ޖަމިއްޔާއިން ފާހަގަކުރީ ސަރުކާރު ކުންފުންޏަކާ ހަވާލުކޮށްގެން ސަރުކާރުން ޓެކްސީ ފްލީޓެއް ތައާރަފު ކުރަން އުޅުމެވެ.
އެކަން ކުރުމުން ޓެކްސީ ޑްރައިވަރުންނާއި ސެންޓަރުތަކަށް ވެސް އެކި ވަރުގެ ގެއްލުންތަކާ ކުރިމަތިވާނެ ކަމަށް އެ ޖަމިއްޔާއިން ބުނެފައިވެއެވެ.
ޓެކްސީތަކެއް ކިޔޫ ޖެހިގެން: ޓެކްސީ ޑްރައިވަރުންގެ ގިނަ ކަންބޮޑުވުންތަކެއް ހުރިއިރު، އެކަންކަމަށް ސަރުކާރުގެ ބަހެއް ނުލިބޭ ކަމަށް ޑްރައިވަރުން ބުނޭ --- ސަން ފޮޓޯ/ ފަޔާޒު މޫސާ
މި ކަމާ ގުޅިގެން މައުލޫމާތު ހޯދަން އެ ޖަމިއްޔާއިން ވަނީ ޓްރާސްޕޯޓް މިނިސްޓްރީއަށް އާރްޓީއައިއެއް ވެސް ހުށަހަޅާފައެވެ. ނަމަވެސް، އޭގެ ޖަވާބު އަދި ވެސް ނުލިބޭ ކަމަށް އެ ޖަމިއްޔާއިން ބުނެފައިވެއެވެ.
ދެވަނަ ކަންބޮޑުވުމަކަށް އެ ޖަމިއްޔާއިން ފާހަގަކުރީ، ޓެކްސީ ނަފާ ލޯނުގެ ދަށުން ދޫކުރި ޓެކްސީތައް ރަޖިސްޓްރީ ނުކުރެވުމެވެ.
"ލޯނު އެޕްރޫވްކުރީ މިދިޔަ ސަރުކާރުގައި، ލޯނު ދޫކުރީ މި ސަރުކާރުގައި. އޭތީގައި [ކާރު] ލިބުނު ކުދިންނަށް މިހާރު ވަނީ ކާރުތައް ލިބިފައި. އެ ޓެކްސީ ނަފާ ލޯނަކީ އެ [ކާރު] ގެނެސް ރަޖިސްޓްރީ ކުރުމާ ހަމައަށް ޕްލޭންކޮށްފައި ދޫކުރި ލޯނެއް އެއީ. އެ ކާރުތައް ގެނެސް ހަމަ ބަހައްޓާފައި ހުރީ. ރަޖިސްޓްރީ ކުރެވޭނެ ގޮތެއް ނެތް،" އެ ޖަމިއްޔާގެ އޮފިޝަލަކު ބުންޏެވެ.
މީގެއިތުރުން، އަށް އަހަރު ކުރިން ކުރަމުން އައި ވޭން ދަތުރުތަކުގެ އަގުތަކަށް ސަރުކާރުން ގެނައި ބަދަލުން 40 ޕަސެންޓު އުނިވުމަކީ ޑްރައިވަރުން ކަންބޮޑުވާ ކަމެއް ކަމަށް ޑްރަވައިރުންގެ ޖަމިއްޔާއިން ބުނެފައިވެއެވެ.
އެ ބަދަލާ ގުޅިގެން ވޭން ދުއްވާ ޑްރައިވަރުންނަށް ''ވަރަށް ބޮޑެތި'' ގެއްލުންތަކެއް ލިބެމުން އަންނާތީ އަގުތައް އަލުން ރިވިއު ކުރަން ސަރުކާރުގައި އެދެމުން އަންނަ ކަމަށް އެ ޖަމިއްޔާއިން ބުންޏެވެ.
ޓެކްސީ ޑްރައިވަރުންގެ އިހުތިޖާޖުގައި ހައިވޭގެ ޓްރެފިކު ބްލޮކްކޮށްފައި -- ސަން ފޮޓޯ/ ނާއިޝް ނާހިދު
ޑްރައިވަރުންގެ ކަންބޮޑުވުންތަކާ ގުޅިގެން ސިލްސިލާ އިހުތިޖާޖުތަކެއް ކުރަމުން އަންނައިރު، އެއްވެސް ކަންބޮޑުވަމަކަށް މިހާތަނަށް ހައްލެއް ލިބިފައިނުވާ ކަމަށް ބުނެ، އެ ކަން ވެސް ޑްރައިވަރުންގެ ޖަމިއްޔާއިން ފާހަގަކޮށްފައިވެއެވެ.
އަދި ހަމަ އެއްވެސް ބަހެއް ނުލިބޭ ސަރުކާރުގެ ފަރާތަކުންނެއް އަޅުގަނޑުމެންނަކަށް. އެއްވެސް ކަހަލަ ޚަބަރެއް ނުވޭ އަދިއެއްޑްރައިވަރުންގެ އެސޯސިއޭޝަންގެ އޮފިޝަލެއް
މިދިޔަ ބުދަ ދުވަހުގެ ރޭ ހުޅުމާލޭގައި ޓެކްސީ ޑްރައިވަރުން އިހުތިޖާޖެއް ކުރިއިރު، އެކަން ހޫނުވީ ކަންބޮޑުވުންތަކަށް ޖަވާބެއް ނުލިބި ލަސްވާތީ، ހުޅުމާލޭން ހައިވޭއަށް އެރެން އޮތް މަގު ޑްރައިވަރުން ބަންދު ކުރުމުންނެވެ.
އެ އިހުތިޖާޖުގައި ބޭނުންކުރި 22 އުޅަނދެއް ފުލުހުން ވަނީ ޓޯކޮށްފައެވެ.
ޓެކްސީ ޓޯކުރި މައްސަލައިގައި ހައްޔަރުކޮށް ދޫކޮށްލި ތިން ޑްރައިވަރުން: އޭގެތެރެއިން ނުއުމާންގެ ޝަރީއަތް ކޯޓުގައި އަންނަނީ ކުރިއަށް ގެންދަމުން --
އެ މައްސަލައިގައި ހަތަރު ޑްރައިވަރުން ހައްޔަރު ކުރިއެވެ. އެއީ، 39 އަހަރުގެ މއ. ވިރާހު، މުޙައްމަދު ޝާމިންއާއި އުމުރުން 33 އަހަރުގެ ލ. ދަނބިދޫ ސަންރޭ، އަހުމަދު ޝަބީންއާއި ހދ.ކުމުންދޫ ހޮލިޑޭވިލެޖް (36އ) ނުޢުމާން އަހުމަދުގެ އިތުރުން މއ. ނަހީދީ މަންޒިލް، މިސްބާރު ޝަރީފު (31އ)އެވެ.
ނަމަވެސް، އޭގެ ތެރެއިން ޝާމިންއާއި ޝަބީންގެ އިތުރުން ނުޢުމާން ކޯޓުން ވަނީ ޝަރުތުތަކާ އެއްކޮށް ދޫކޮށްލާފައެވެ. އެހެންވެ، މިހާރު ބަންދުގައި ހުރީ ހަމައެކަނި މިސްބާރެވެ.
އެކަމާ ގުޅުވައި އެ ޖަމިއްޔާއިން ބުނީ، ނުޢުމާން ދޫކޮށްލި ކަމަށް ވިޔަސް އޭނާގެ ޝަރީއަތް ކޯޓުގައި ކުރިއަށްދާ ކަމަށެވެ. އަދި، ޓޯކުރި ޓެކްސީތަކާއި ޑްރައިވަރުން ދޫކޮށްލައި، ކަންބޮޑުވުންތަކަށް ހައްލު ލިބެންދެން ޝުއޫރު ފާޅުކުރުމުގެ ހިމޭން އިހުތިޖާޖެއް ކޮންމެ ރެއަކު ހުޅުމާލޭ ރުއްގަނޑު ޕާކުގައި ކުރިއަށް ގެންދަން ޑްރައިވަރުންގެ ޖަމިއްޔާއިން ވަނީ ނިންމާފައެވެ.