މިދިޔަ ބުދަ ދުވަހުގެ ރޭ ހުޅުމާލޭގައި ޓެކްސީ ޑްރައިވަރުން ކުރި އިހުތިޖާޖުގެ ތެރެއިން ހައްޔަރުކޮށް، ބަންދަށް ފަސް ދުވަސް ޖެހި ދެ ޑްރައިވަރުން ޝަރުތުތަކާ އެއްކޮށް ހުޅުމާލޭ މެޖިސްޓްރޭޓް ކޯޓުން މިއަދު ދޫކޮށްލައިފިއެވެ.
ކޯޓުން ދޫކޮށްލި ޑްރައިވަރުންނަކީ 39 އަހަރުގެ މއ. ވިރާހު، މުޙައްމަދު ޝާމިންއާއި އުރުމުން 33 އަހަރުގެ ލ. ދަނބިދޫ ސަންރޭ، އަހުމަދު ޝަބީންއެވެ.
އެ ޑްރައިވަރުން ހުޅުމާލޭ މެޖިސްޓްރޭޓް ކޯޓުން ޝަރުތުތަކާ އެއްކޮށް، މިއަދު ދޫކޮށްލިކަން އެމްޑީޕީގެ ގާނޫނީ ވަކީލުންގެ ޓީމުގައި ހިމެނޭ އަދި، ޝާމިންގެ ވަކީލު އައިކު އަހުމަދު އީސާ 'ސަން' އަށް ވަނީ ކަށަވަރުކޮށްދެއްވާފައެވެ.
ހުޅުމާލޭގައި ޓެކްސީ ޑްރައިވަރުން ކުރި އިހުތިޖާޖުގެ ތެރެއިން ---- ސަން ފޮޓޯ/ ނާއިޝް ނާހިދު
ޝަބީންއާ ޝާމީންގެ މައްޗަށް ކުރި ޝަރުތުތަކަކީ:
- ގާނޫނާ އެއްގޮތަށް އުޅުން
- ތަހުގީގަށް އެއްބާރުލުން ދިނުމަށް
- ރަށުން ބޭރަށް ނުފުރުން
- މުޒާހަރާ ފަދަ ކަންކަމުގައި ބައިވެރިނުވުމަށް
- ހެއްކަށް ބާރު ނުފޯރުވާން
އެ ދެ ޑްރައިވަރުން ބަންދުން ދޫކޮށްލީ، ބަންދުގެ މައްސަލަ އިސްތިއުނާފު ކުރުމަށް ހައިކޯޓަށް ހުށަހަޅާފައި ވަނިކޮށެވެ.
އެ މައްސަލާގައި ޝާމިން އާއި ޝަބީންގެ އިތުރުން ދެ މީހަކު ހައްޔަރުކުރިއެވެ.
އެއީ ނުއުމާން އަހުމަދު، 36އ، ހޮލިޑޭވިލެޖް، ހދ. ކުމުންދޫއާއި މއ. ނަހީދީ މަންޒިލް، މިސްބާރު ޝަރީފު (31އ) އެވެ. ނަމަވެސް، ނުއުމާން ވަނީ ޝަރުތުތަކާއެކު ދޫކޮށްލައިފައެވެ.
ބުދަ ދުވަހުގެ އިރުއޮއްސުނު ވަގުތުން ފެށިގެން ޓެކްސީ ޑްރައިވަރުން ވަނީ ހުޅުމާލޭގައި އިހުތިޖާޖުކޮށްފައެވެ. އެއީ ސަރުކާރަށް އަހަރުވީއިރު، އެ މީހުންގެ ކަންބޮޑުވުންތަކަށް އެއްވެސް ހައްލެއް ގެނެސްދީފައިނުވާ ކަމަށް ބުނެއެވެ.
އިހުތިޖާޖު ހޫނުވީ، އެ ޑްރައިވަރުންގެ ޑިމާންޑުތަކަށް ޖަވާބެއް ލިބުމެއް ނެތި ގިނައިރުވެ، ހުޅުމާލެއިން ހައިވޭއަށް އެރެން އޮންނަ މަގު ޑްރައިވަރުން ބަންދުކުރުމުންނެވެ. އެއާއެކު ޓްރެފިކް ބްލޮކްވެ، މުޅި ސަރަހައްދު ތޮއްޖެހުނެވެ.
ފުލުހުން އެ ސަރަހައްދުގައި ހަރަކާތްތެރިވެ އިހުތިޖާޖު ރޫޅާލައި މަގު ހުޅުވޭތޯ މަސައްކަތްކުރިއެވެ. އަދި އިހުތިޖާޖުގައި ބޭނުންކުރި 22 އުޅަނދެއް ފުލުހުން ވަނީ ޓޯކޮށްފައެވެ.
ފުލުހުން ދަނީ މި މައްސަލަ އިތުރަށް ތަހުގީގުކުރަމުންނެވެ.