އާޓިފިޝަލް ބީޗުގައި ރޭ މާރާމާރީ ހިންގި މައްސަލައެއްގައި ފުލުހުންގެ ބެލުމުގެ ދަށަށް ގެންދިޔަ ތިން ބިދޭސީން އިމިގްރޭޝަނާ ހަވާލުކޮށް، ޑީޕޯޓުކުރުމުގެ މިއަދު މަސައްކަތް ފަށައިފިއެވެ.
ފުލުހުން ރޭ ބުނީ، އާޓިފިޝަލް ބީޗުގައި ބިދޭސީންތަކެއްގެ މެދުގައި މާރާމާރީއެއް ހިންގި މައްސަލައެއް ރޭ 20:30 ހާއިރު ރިޕޯޓުކުރި ކަަމަށެވެ.
މި މާރާމާރީގެ މަންޒަރު ރެކޯޑު ކުރި ދިވެއްސަކާ މެދުގައި ވެސް އެ ބިދޭސީން މާރާމާރީ ހިންގާފައިވާ ކަަމަށް ފުލުހުން މައުލޫމާތު ދިނެވެ.
މި މައްސަލައިގައި އިންޑިއާއަށް ނިސްބަތްވާ ތިން ބިދޭސީ ފިރިހެނުން ފުލުހުންގެ ބެލުމުގެ ދަށަށް ގެންދިޔައިރު މިހާރު އެ މީހުންވަނީ އިމިގްރޭޝަނާ ހަވަލުކޮށްފައެވެ.
މި މައްސަލައާ ގުޅިގެން އިމިގްރޭޝަން ކޮންޓްރޯލަރު މުޙައްމަދު ޝަމްއާން ވަހީދު އެކްސްގައި ކުރެއްވި ޕޯސްޓެއްގައި ވިދާޅުވީ، މި އެންމެން ވެސް ޑީޕޯޓުކުރުމުގެ މަސައްކަތް މިހާރު ކުރަމުން އަންނަކަމަށް އޭނާ ވިދާޅުވިއެވެ.
މީގެ އިތުރުން އެ ފަދަ ނުރައްކާތެރި ކަންކަން ކުރާ ބިދޭސީންނަށް ދެވަނަ ފުުރުސަތެއް ނުދޭނެކަމަށް ވެސް އޭނާ ވިދާޅުވިއެވެ.
"އާންމު މަސްލަހަތަށް ނުރައްކާވާ ގޮތަށް، މިފަދަ އަމަލުތައް ހިންގާ ބިދޭސީންނަށް އިތުރު ފުރުސަތެއް އަޅުގަނޑުމެން ނުދޭނަން،" ޝަމްއާން ވިދާޅުވިއެވެ.
ފުލުހުން އަންނަނީ މައްސަލަ އިތުރަށް ތަހުގީގު ކުރަމުންނެވެ.
މިކަމާ ގުޅުން ހުރި ވީޑިއޯއެއް ސޯޝަލްމީޑިއާގައި ދައުރުވެފައިވާއިރު، އެވަގުތު އާޓިފިޝަލް ބީޗުގައި ގިނަ ބަޔަކު ހަރަކާތްތެރިވާ މަންޒަރު ފެނެއެވެ. އަދި، ފުލުހުން އެ ސަރަހައްދުގައި ހަރަކާތްތެރިވާ މަންޒަރު ފެންނައިރު، މީހަކު ފުލުސް ކާރަށް އަރުވާ ތަން ވެސް ފެނެއެވެ.