ހަވީރީ ހިނގުމުގައި ހުންނަ "ލެޓްސް ކޮފީ މޯލްޑިވްސް"އަށް ބަޔަކު ވަދެ, ތޫނު ހަތިޔާރު ބޭނުންކޮށްގެން އެތަނުގެ މުވައްޒަފުންނަށް ބިރު ދައްކައި، މުދަލަށް ގެއްލުން ދިން މައްސަލައިގައި ދިވެހި ދެ ފިރިހެނުން ހައްޔަރުކޮށް، ބަންދުގެ މުއްދަތު ޖަހައިފިއެވެ.
މި ހާދިސާ ހިނގާފައި ވަނީ މިދިޔަ ބުރާސްފަތި ދުވަހުގެ މެންދުރު 12:40 ހާއިރެވެ.
އެ މައްސަލައާ ގުޅިގެން ފުލުހުން ވަނީ އުމުރުން 31 އަހަރުގެ އަހުމަދު ތައުފީގު، ވައިލެޓްމާގެ، ގއ. ދެއްވަދޫ އަދި އުމުރުން 44 އަހަރުގެ އަސަދުﷲ ޚާތިމް، މީޒާން، ބ. ތުޅާދޫ ހައްޔަރުކޮށްފައެވެ.
ފުލުހުން ބުނި ގޮތުގައި އެ ދެ މީހުން ހައްޔަރުކޮށްފައި ވަނީ ކޯޓު އަމުރެއްގެ ދަށުން ހޯމަ ދުވަހެވެ.
އެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ފަސް ދުވަހަށް ބަންދުގައި ބޭތިއްބުމަށް ކޯޓުން އަމުރުކޮށްފައިވާ ކަމަށް ފުލުހުން ބުންޏެވެ.
އަދި އެ މައްސަލަ ފުލުހުން ތަހުގީގުކުރަމުން ގެންދާ ކަމަށް ފުލުހުން ވަނީ މައުލޫމާތުދީފައެވެ.
"ސަން"އަށް މައުލޫމާތު ލިބިފައިވާ ގޮތުގައި، ކެފޭގެ ތެރެއަށް ބަޔަކު، އެ ވަގުތު އެތަނުގައި ތިބި ދެ އަންހެން މުވައްޒަފަކަށް އިންޒާރުދީ، އެތަނުގައި ހުރި ބައެއް ތަކެއްޗަށް ގެއްލުން ދީފައިވެއެވެ. ނަމަވެސް، ހާދިސާ ހިނގަން މެދުވެރިވި ސަބަބެއް މިހާތަނަށް ސާފުވެފައެއް ނުވެއެވެ.
އެ ހާދިސާއާ ގުޅުން ހުރި ވީޑިއޯއެއް ދައުރުވެފައިވާއިރު، އެ ވީޑިއޯއިން މީހަކު އެތަނުގައި ހުންނަ ބައެއް ތަކެއްޗަށް ގެއްލުން ދޭ މަންޒަރު ފެނެއެވެ. އަދި، އެ މަންޒަރު ވީޑިއޯ ކުރަން އިން މީހަކަށް އިންޒާރު ދޭ މަންޒަރު ވެސް ވީޑިއޯއިން ފެނެއެވެ.