ތިން މިނިސްޓްރީއެއް ހިންގަމުން ދިޔަ ދެ އިމާރާތެއްގައި މިދިޔަ ބުރާސްފަތި ދުވަހު ރޯވެ ހިނގި އަލިފާނުގެ ހާދިސާއާ ގުޅިގެން މައުލޫމާތު ސާފުކުރުމަށް މިނިސްޓްރީ އޮފް ޑިފެންސް އަދި މޯލްޑިވްސް ޕޮލިސް ސާވިސްގެ ކަމާ ގުޅުންހުރި ބޭފުޅުން ހާޒިރުކުރުމަށް ބުރާސްފަތު ދުވަހު ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ)ގެ ބައްދަލުވުމެއް ބާއްވަން ނިންމައިފިއެވެ.
އަލިފާނުގެ ހާދިސާ ހިނގި ދެ އިމާރާތުގައި ހިންގަމުން ދިޔައީ ހައުސިން މިނިސްޓްރީއާއި އިންފްރާންސްޓްރަކްޗާ މިނިސްޓްރީއާއި އެންވަޔަރަމަންޓް މިނިސްޓްރީގެ އިތުރުން އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ)އަަށެވެ. މި ހާދިސާގައި މާލެ ސިޓީ ކައުންސިލްގެ އޮފީހަށް ވެސް ގެއްލުންތަކެއްވިއެވެ.
ގެއްލުންވި މިނިސްޓްރީތަކުގެ މަސައްކަތްތައް އިއްޔެ ވަނީ ދަރުބާރުގޭގައި ފަށައިފައެވެ.
އަލިފާނުގެ ހާދިސާއާ ގުޅިގެން ގިނަ ބަޔަކު ސުވާލު އުފައްދަމުން ދާއިރު، މިއަދު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ރައްޔިތުންގެ މަޖިލީހުގެ ކުއްލި ޖަލްސާއެއް ބާއްވައިދިނުމަށް އެދޭނެ ކަމަށް އެމްޑީޕީގެ ޕާލިމެންޓްރީ ގްރޫޕުން ވަނީ ބުނެފައެވެ. އަދި އެ ހާދިސާއާ ގުޅިގެން އިތުރަށް ތަހުގީގުކުރުމަށް 241 ކޮމިޓީގައި ވެސް އެ ޕާޓީގެ ޕީޖީ ގްރޫޕުން އެދޭނެ ކަމަށް ބުންޏެވެ.
އެގޮތަށް އެދެން ނިންމާފައި އޮއްވައި، މިއަދު މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަހުމަދު ނާޒިމް ވިދާޅުވީ އަލިފާނުގެ ހާދިސާއާ ގުޅިގެން ޑިފެންސް މިނިސްޓްރީއާއި ފުލުހުންނާ ބައްދަލުކޮށް، މައުލޫމާތު ސާފުކުރެއްވުމަށް މިހަފުތާގެ ބުރާސްފަތި ދުވަހުގެ ހެނދުނު 10:00 ގައި 241 ކޮމިޓީގެ ބައްދަލުވުމެއް ބޭއްވުމަށް އެ ކޮމިޓީގެ މުގައްރިރު އޭދަފުށި ދާއިރާގެ މެންބަރު އަހުމަދު ސަލީމް ނިންމަވާފައިވާ ކަމަށެވެ.
އަލިފާނުގެ ހާދިސާއާ ގުޅިގެން އެމްޑީޕީން ވަނީ ވަރަށް ބޮޑަށް ކަންބޮޑުވުން ފާޅުކޮށްފައެވެ. އަދި އަލިފާން ނިއްވާލުމުގައި އިހުމާލުވެފައިވާ ކަމަށް އެމްޑީޕީން ތުހުމަތުކުރިއެވެ. އަދި އެކަމުގައި ފުލުހަށާއި އިންޓެގްރިޓީ ކޮމިޝަނަށް ތަހުގީގު ހިންގުމަށް ހުށަހެޅުމަށް ވެސް ވަނީ ނިންމާފައެވެ.
އަލިފާނުގެ ހާދިސާގައި ރައްޔިތުންނާ ގުޅުންހުރި މުހިންމު ލިޔެކިޔުންތަކެއް ގެއްލިގެން ދިޔުމާމެދު ބޮޑު ކަންބޮޑުވުމެއް އޮތެވެ.
އެކަމާ ގުޅިގެން ސިޓީ ކައުންސިލުން ބުނީ، އެ ކައުންސިލްގެ ލޭންޑް ޑިޕާޓްމަންޓުގެ 90 އިންސައްތަ ލިޔެކިޔުން ސަލާމަތް ކުރެވުނު ކަމަށެވެ. މިހާރު އެ ކައުންސިލުން ގެންދަނީ ސަލާމަތްކުރެވުނު ލިޔެކިޔުންތައް ތަރުތީބުކޮށް ތްރެޓް އެސެސްމަންޓެއް ހެދުމުގެ މަސައްކަތް ކުރަމުންނެވެ.
ހަމައެއާއެކު ބޯހިޔާވަހިކަމާއި ގެދޮރުވެރިކަމާ ގުޅުންހުރި އެއްވެސް ލިޔެކިޔުމެއް ނުގެއްލޭކަމަށް އިންފްރާންސްޓްރަކްޗާ މިނިސްޓަރު، ޑރ. އަބްދުﷲ މުއްތަލިބު ވަނީ ވިދާޅުވެފައެވެ. ނަމަވެސް ރަށްރަށުގެ ލޭންޑް ޔޫސް ޕްލޭނާ ގުޅުން ހުރި ބައެއް ލިޔެކިޔުންތައް ގެއްލިފައިވާ ކަމަށް ހައުސިން މިނިސްޓަރު ޑރ. އަލީ ހައިދަރު ވިދާޅުވިއެވެ.