ރާއްޖޭގައި ވޭޕު ބޭނުންކުރުމާ އޭގެ ވިޔަފާރި ހުއްޓާލަން ނިންމީ ރައްޔިތުން އެކަމަށް އެދޭތީ ކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.
ދުންފަތް ކޮންޓްރޯލް ކުރުމާ ބެހޭ ގާނޫނަށް ގެނައި، އިސްލާހާ އެއްކޮށް، މިއަދުން ފެށިގެން ވޭޕު ބޭނުންކުރުމާއި އޭގެ ވިޔަފާރި ކުރުން މަނާވާނާއެވެ.
މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، އދ. މަހިބަދޫ ރައްޔިތުންނާ ބައްދަލުކުރައްވައި، ރައީސް މުއިއްޒު ވިދާޅުވީ، ކުރިން ވޭޕުގެ ވިޔަފާރި ކުރީ ގާނޫނީ ގޮތުން ހުއްދަ އޮވެގެން ކަމަށާއި އޭރު ވިޔަފާރި ކުރި މީހުންގެ ކުށެއް ނެތް ކަމަށެވެ.
ރައީސް މިއަދު ހެނދުނު މަހިބަދޫއަށް ވަޑައިގަތުން: ވޭޕް މަނާކުރީ ރައްޔިތުން އެކަމަށް އެދޭތީ ކަމަށް ވިދާޅުވި ---- ފޮޓޯ/ ރައީސް އޮފީސް
މި ގައުމަށް ވަރަށް ބޮޑު ގެއްލުމެއް ވަނީ. [ވޭޕްގެ] އެ ވިޔަފާރި ކުރި މީހުންގެ ކުށެއް ނެތް، އެހެންނަމަވެސް، ގައުމުގެ ރައްޔިތުންގެ ހާލުގެ ދުލުން އެދެމުން ދިޔައީ މިކަމުން ތިމަންނަމެންގެ ދަރިން ސަލާމަތް ކޮށްދޭށޭ. އެހެންވީމަ، އަޅުގަނޑުމެން ނިންމީ އެކަން ހުއްޓާލަންރައީސް ޑރ. މުޙައްމަދު މުއިއްޒު
ވޭޕު މިއަދު ފެށިގެން މަނާވެފައިވާއިރު، އެކަމާ ގުޅޭ މުއާމަލާތެއް ކޮށްފިނަމަ ހަރުކަށި އަދަބު ދޭން ވަނީ ނިންމާފައެވެ. އެގޮތުން، ވޭޕު ބޭނުންކޮށްފިނަމަ، 5،000 ރުފިޔާއިން ޖޫރިމަނާކުރާއިރު، ވޭއްޕު ވިއްކާ ކޮންމެ މީހަކު 20،000 ރުފިޔާއިން ޖޫރިމަނާކުރާނެއެވެ. އަދި، ވިއްކާ ކޮންމެ ވޭޕަކަށާއި ހިލޭ ވޭޕެއް ދީފިނަމަ 10،000 ރުފިޔާގެ ޖޫރިމަނާއެއް ދޭން ޖެހޭނެއެވެ.
ދުންފަތުގެ އިސްތިއުމާލުކުރުމުން ސަލާމާތްވާން ބޭނުންވާ މީހުންނަށް ކޮންމެ ރަށެއްގައި ވެސް މިހާރު ސިޒޭޝަން ކްލިނިކްގެ ޚިދުމަތް ލިބޭނެހެން ވަނީ ގާއިމްކޮށްފައެެވެ. އެހީ ހޯދުމަށް ކުއިޓްލައިން 1676 އަށް ވެސް ގުޅޭނެއެވެ.
ރައީސް މަހިބަދޫއަށް ވަޑައިގަތުން ---- ފޮޓޯ/ ރައީސް އޮފީސް
މިހާރަށް ވުރެ ރަނގަޅު ނިޒާމެއް ގާއިމުކޮށް ޑްރަގުން ޒުވާނުން ސަލާމަތް ކުރުމަށް ނިންމީ ގައުމަށް ހެޔޮ އެދިގެން ކަމަށާއި ކުރިއަށް އޮތް ޖީލުތަކަށް ހެޔޮ ގޮތުގައި ގައުމު ފޯރުކޮށްދިނުމަށް ކަމަށް ރައީސް މުއިއްޒު ވިދާޅުވިއެވެ.
ދިވެހީންގެ މުޖުތަމައު ނުރަނގަޅު އާދަތަކުން ސަލާމަތްވެފައި އޮތް ތަނަކަށް ހަދަން ޖެހޭ ކަމަށާއި ސިއްހީ ގޮތުން ރައްޔިތުން ސަލާމަތުން ތިބެގެން ނޫނީ ގައުމަށް ކަމެއް ނުކޮށްދެވޭނެ ކަމަށް ރައީސް މުއިއްޒު ވަނީ ވިދާޅުވެފައެވެ.