ޑައިމޯފިން ޓްރެފިކް ކުރަން އުޅުން އަންހެނަކު ބާރަ އަހަރަށް ޖަލަށްލައި، 50،000 ރުފިޔާއިން ޖޫރިމަނާކޮށްފިއެވެ.
ކްރިމިނަލް ކޯޓަށް ހުށަހެޅުނު މި މައްސަލައިގައި ދައުވާކޮށްފައިވަނީ ގދ. މަޑަވެލީ އުދަރެސްގޭ ސަހާ ވަހީދުގެ މައްޗަށެވެ.
ދައުލަތުން ހުށަހެޅި ދައުވާގައިވާ ގޮތުން، މި އަހަރުގެ އޮގަސްޓު ހަތްވަނަ ދުވަހުގެރޭ ސ. ގަމަށް ދިއުމަށް އޭނާ ވެލާނާ އިންޓަނޭޝަނަލް އެއާޕޯޓު (ވީއައިއޭ) ޑޮމެސްޓިކް ޓާމިނަލުގެ ސެކިއުރިޓީ ޗެކިންއަށް ދިއުމުން، ލައިގެންހުރި ޖިންސުގެ ތެރެއިން ދެ ރަބަރު ޕެކެޓު ފެނުނެވެ. އޭގައި ޖުމްލަ 202.2 ގްރާމުގެ ޑައިމޯފިން ހުރި ކަމަށް ތަހުލީލު ރިޕޯޓުން ދައްކާ ކަމަށް ދައުވާ ފޯމުގައި ދައުލަތުން ވަނީ ބުނެފައެވެ.
މި މައްސަލައިގައި ސަހާވަނީ ޝަރީއަތުގައި ދައުވާއަށް އިއުތިރާފުވެފައެވެ. އެ ގޮތުން ޕްރޮސެކިއުޓާ ޖެނެރަލް (ޕީޖީ)އާ ދެމެދު ވެވުނު އެއްބަސްވުމުގެ ދަށުން އޭނާގެ މައްޗަށް ކަނޑައެޅޭ އަބަދަކީ 12 އަހަރާ ހަ މަސްދުވަހުގެ މުއްދަތަށް ޖަލަށްލުމާއެކު، 50،000 ރުފިޔާއިން ޖޫރިމަނާ ކުރުމެވެ.
މަސްތުވާތަކެތީގެ މި މައްސަލައިގައި ސަހާވަނީ ހަތަރުމަހާއި ތިންދުވަސް ބަންދުގައި ހުރެފައެވެ. ޕީޖީއާއެކު ހެދި އެއްބަސްވުމުގެ ދަށުން، އޭނާ ބަންދުގައި ހުރި މުއްދަތު ޖަލު އަދަބުން އުނިކޮށްދޭން ވަނީ އެދިފައެވެ.
އެހެން ނަމަވެސް މި މައްސަލައިގައި ކޯޓުން ހުކުމްކުރީ ސަހާއާ އެކު ޕީޖީން ހަދާފައިވާ އެއްބަސްވުމުގައި ކަނޑައަޅާފައިވާ މުއްދަތަށް އޭނާ ޖަލަށްލުމަށެވެ. އެއީ 12 އަހަރާ ހަ މަސްދުވަހެވެ. އަދި 50،000 ރުފިޔާއިން ޖޫރިމަނާކޮށް، 12 މަސްދުވަހުގެ ތެރޭގައި މޯލްޑިވްސް އިންލަންޑް ރެވެނިއު އޮތޯރިޓީ (މީރާ)އަށް އެ ފައިސާ ދައްކަން ހުކުމުގައިވެއެވެ.
މަސްތުވާތަކެއްޗާބެހޭ ގާނޫނުގެ 103ވަނަ މާއްދާގެ ދަށުން، ޑައިމޯފިން ޓްރެފިކްކުރަން އުޅުމަކީ، ނުވަތަ ޓްރެފިކްކުރަން އެހީތެރިވެދިނުމަކީ، ނުވަތަ ޓްރެފިކް ކުރުމުގައި އެއްވެސް ސިފައެއްގައި ބައިވެރިވުމަކީ ވެސް ކުށެކެވެ.
މި ފަދަ ކުށެއް ކޮށްފި މީހެއްގެ އަދަބަކީ، 18 އަހަރު ދުވަހުގެ މުއްދަތަށް ޖަލަށްލުމާއެކު 75,000 ރުފިޔާއިން ފެށިގެން 7,500,000 ރުފިޔާއާ ދެމެދުގެ އަދަދަކުން ޖޫރިމަނާކުރުމެވެ.
ޑައިމޯފިން ޓްރެފިކް ކޮށްފިނަމަ، އަދަބަކީ، އުމުރަށް ޖަލަށްލުމާއެކު 100,000 ރުފިޔާއިން ފެށިގެން 10,000,000 ރުފިޔާއާ ދެމެދުގެ އަދަދަކުން ޖޫރިމަނާކުރުމެވެ.