މާލޭގެ ތަފާތު ތިން ސަރަހައްދެއްގައި ރޭ މާރާމާރީތަކެއް ހިންގައިފިއެވެ.
ފުލުހުން ބުނީ އޭގެތެރެއިން އެއް މާރާމާރީއަކީ ސައިކަލެއްގައި ހެލްމެޓު އަޅައިގެން އައި ބަޔަކު، މޫނިޔާމަގު ޑި ޕަބްލިކް ކެފޭތެރެއަށް ވަދެ ހިންގި މާރާމާރީއެއް ކަމަށެވެ.
ދެވަނަ މާރާމާރީއަކީ، ޝަހީދުކުޑަނެވި ތުއްތު މަނިކު ހިނގުމުގައި ހުންނަ ކިންޒާ ކެފޭ ކުރިމަތީ ހިންގި މާރާމާރީއެކެވެ. މިއީ ހަ މީހަކު ސައިކަލުގައި އައިސް ހިންގި މާރާމާރީއެއް ކަމަށާއި ތޫނު ހަތިޔާރު ބޭނުންކޮށްގެން ހިންގާފައިވާ މާރާމާރީއެއް ކަމަށް ފުލުހުން ވަނީ ބުނެފައެވެ.
އޭގެއިތުރުން، ފިލިގަސްމަގު، ނޫރު މިސްކިތް ކައިރީ ބަޔަކު މާރާމާރީ ހިންގި ކަމަށް ފުލުހުން ބުނެފައިވެއެވެ.
ނަމަވެސް، މި މައްސަލަތަކުގައި މީހަކު ހައްޔަރުކޮށްފައިވާކަން ހާމަކޮށްފައި ނުވާއިރު، މި މައްސަލަތައް ފުލުހުން އަންނަނީ ތަހުގީގު ކުރަމުންނެވެ.
މިދިޔަ ބުރާސްފަތި ދުވަހު ވަނީ ލެޓްސް ގޯ ކެފޭއަށް ބަޔަކު ވަދެ، ގެއްލުން ދިން މައްސަލައެއް ވެސް ފެންމަތިވިއެވެ. މި ހާދިސާ ހިނގާފައި ވަނީ އެ ދުވަހު 12:40 ހާއިރު ކަމަށް މައުލޫމާތު ލިބިފައިވެއެވެ.
މާލޭއާއި ރާއްޖޭގެ އެކި ހިސާބުތަކުގައި މާރާމާރީގެ މައްސަލަތައް ދޭތެރެއަކުން އިތުރުވެއެވެ. އެއާއެކު ފުލުހުން އެ މައްސަލަތައް ބަލާ، މާރާމާރީ މަދުކުރަން މަސައްކަތް ކުރެއެވެ.