ގަވާއިދާ ޚިލާފަށް މާލޭގެ ބާރުބޮޑު ބައެއް މަގުތަކުގައި ޕާކު ކޮށްފައި ހުރި އުޅަނދުތައް ޓޯ ކުރުމުގެ މަސައްކަތް ފުލުހުން މިއަދު ފަށައިފިއެވެ.
ފުލުހުން ބުނީ، އުޅަނދު ޓޯ ކުރުމުގެ މަސައްކަތް ކުރަމުން ދަނީ މާލޭގެ ކާރުބާރު ބޮޑު ބައެއް މަގުތައް ކަމަށްވާ ބޮޑުތަކުރުފާނު މަގާއި އަމީނީ މަގާއި މަޖީދީ މަގާއި އޯކިޑް މަގާއި އަމީރު އަހުމަދު މަގުގެ އިތުރުން ސޯސަން މަގުގައި ނުގަވައިދުން ހުރި އުޅަނދުތައް ކަމަށެވެ.
ނުގަވައިދުން ބަހައްޓާފައި ހުރި އުޅަނދުތަކުގެ ގޮތުގައި ފުލުހުން ބަލަނީ، އެ މަގުތަކުގައި އާންމު ދަތުރުފަތުރަށާއި ޕަބްލިކް ޓްރާސްޕޯޓަށް ދަތިވާހެން ޕާކުކޮށްފައި ހުންނަ އުޅަނދުތަކެވެ.
އޭގެއިތުރުން، މާލޭގެ މަގުތަކުގެ ސަލާމަތާއި ރައްކާތެރިކަން ކަށަވަރުކުރުމަށާއި މަގުތައް ތަރުތީބު ކުރުމަށް އެ ޚިދުމަތުން ކުރަމުން އަންނަ މަސައްކަތަށް ރައްޔިތުން ދޭ އެއްބާރުލުމަށް ފުލުހުން ވަނީ ޝުކުރުއަދާކޮށްފައެވެ.
މިދިޔަ ސެޕްޓެމްބަރު މަހުގެ ތެރޭގައި ވެސް ފުލުހުން ވަނީ މާލޭގެ މަގުތަކުގައި ގަވާއިދާ ޚިލާފަށް ހުރި ބާ އުޅަނދުތައް ނަގާފައެވެ.
އޭގެކުރިން ސިޓީ ކައުންސިލުން ވެސް ބާ އުޅަނދު ނެގުމުގެ މަސައްކަތް ފަށައި، މާލޭގެ މަގުތަކަށް ހަލާކުވުމުން ދޫކޮށްލާފައި ހުރި 224 ސައިކަލެއް އެއް ދުވަސް ތެރޭ ނެގި ކަމަށް އެ ކައުންސިލުން ކުރިން ވަނީ ބުނެފައެވެ.
ސިޓީ ކައުންސިލުން މައުލޫމާތުދީފައިވާ ގޮތުގައި، އެ ކައުންސިލުން މި ހަރަކާތް ކުރިޔަށް އޮތް ތަނުގައި ވެސް ކުރިޔަށް ގެންދާނެއެވެ. އެއީ މާލޭގެ މަގުތަކުގައި ބާވެ، ކުންޏަށްވެފައިވާ އުޅަނދުތައް ހުރުމުގެ ސަބަބުންނެވެ.
ވެރިރަށް މާލޭގެ މަގުތަކުގެ 65 ޕަސެންޓު އަބަދު ވެސް ހިފައިފައި އޮންނަނީ ޕާކުކޮށްފައި އޮންނަ އުޅަނދުތަކުން ކަމަށާއި، މި ކަމުގެ ސަބަބުން މަގުމަތީގެ އެކްސިޑެންޓުތައް އިންތިހާއަށް އިތުރުވަމުންދާ ކަމަށް ޓްރާންސްޕޯޓު މިނިސްޓްރީން މީގެ ކުރިން ވަނީ ބުނެފައެވެ.