މިދިޔަ ބުރާސްފަތި ދުވަހު ތިން މިނިސްޓްރީއެއް ހިންގަމުންދިޔަ އިމާރާތް އަނދައި ހުލުވި ހާދިސާގައި، އަލިފާންގަނޑުގެ ތެރެއިން މާލެ ސިޓީ ކައުންސިލްގެ ލޭންޑް ޑިޕާޓްމަންޓުގެ 90 އިންސައްތަ ލިޔެކިޔުން ސަލާމަތް ކުރެވުނު ކަމަށް އެ ކައުންސިލުން މިއަދު ބުނެފިއެވެ.
އަލިފާނުގެ ހާދިސާ ހިނގީ ހައުސިން މިނިސްޓްރީ، އިންފްރާންސްޓްރަކްޗާ މިނިސްޓްރީ އަދި އެންވަޔަރަމަންޓް މިނިސްޓްރީގެ އިތުރުން މާލޭ ސިޓީ ކައުންސިލުގެ މަސައްކަތްތައް ވެސް ކުރަމުން އައި ދެ އިމާރާތެއްގައެވެ. މި ހާދިސާގައި އެ އިމާރާތް ބޭނުން ނުކުރެވޭ ވަރަށް އަނދައި ހުލިވިއެވެ.
މި ހާދިސާގައި، އެ ގޯތިރޭގައި ހުރި މާލެ ސިޓީގެ ދެ ސެކްޝަން ހިނގަމުންދިޔަ ޢިމާރާތަށް ގެއްލުން ލިބިފައިވާތީ، އެ ކަމާ ބެހޭގޮތުން އަމަލުކުރަންވީ ގޮތާ ބެހޭ ގޮތުން މާލެސިޓީ ކައުންސިލުންވަނީ ކުއްލި ބައްދަލުވުމެއް ބާއްވައިފައެވެ.
އަލިފާނުގެ ހާދިސާއާ ގުޅިގެން މާލެ ސިޓީ ކައުންސިލުން ބޭއްވި ކުއްލި ބައްދަލުވުން -- ފޮޓޯ/ މާލެ ސިޓީ ކައުންސިލް
މި ޖަލްސާގައި ކައުންސިލަރު، މުހައްމަދު އަރީޝް ވިދާޅުވި ގޮތުގައި އަލިފާންގަނޑުގެ ތެރެއިން ސިޓީ ކައުންސިލްގެ ލޭންޑް ޑިޕާޓްމަންޓްގެ ދޮރު ވައްޓާލުމަށް ފަހު އެ ތަނަށް ވަދެ، އެ ތަނުގައި ހުރި 90 އިންސައްތަ ޑޮކިއުމަންޓު ވަނީ ނެރެވިފައެވެ. އޭނާ ވިދާޅުވި ގޮތުގައި އަލިފާންގަނޑުގެ ތެރެއިން ނެރެވުނު ޑޮކިއުމަންޓުތައް ބަހައްޓައި، ކައުންސިލްގެ ޚިދުމަތް ފަށައިގަތުމަށް 2،000 އަކަފޫޓުގެ ތަނެއް ބޭނުންވެއެވެ.
އަލިފާނުގެ ހާދިސާއާ ގުޅިގެން އެ ތަނުގައި ހިންގި ތިން މިނިސްޓްރީގެ މަސައްކަތްތައް ވަނީ ވަގުތީ ގޮތުން ދަރުބާރުގެއަށް ބަދަލު ކުރުމުގެ މަސައްކަތް ފަށައިފައެވެ. އެ ގޮތުން ސަރުކާރުގައި ދަންނަވައިގެން ސިޓީ ކައުންސިލަށް ވެސް ޖާގައެއް ލިބޭތޯ މަސައްކަތް ކުރުމަށް އެ ބައްދަލުވުމުގައިވަނީ ހުށަހަޅައިފައެވެ.
މި ޖަލްސާގައި ވާހަކަފުޅު ދައްކަވަމުން މާލެ ސިޓީގެ މޭޔަރު އާދަމް އާޒިމް ވިދާޅުވީ، ސަރުކާރުގެ ކަމާބެހޭ ހުރިހާ ފަރާތްތަކަށް އެހީތެރިކަމަށް އެދި ސިޓީ ފޮނުވާފައިވާނެ ކަމަށެވެ. މޭޔަރުގެ ވާހަކަފުޅުގައި ސަލާމަތް ކުރެވުނު ލިޔުންތައް، ގަލޮޅު މަދަރުސާއަށް ގެންދިއުމަށް ހުށަހެޅުއްވުމުން އެ ގޮތަށް އެ ކައުންސިލުން ވަނީ ނިންމައިފައެވެ. އަދި ޑެޕިއުޓީ މޭޔަރު އަހުމަދު ނަރީޝްގެ މަޝްވަރާގެ މަތިން މަސައްކަތް ކުރިޔަށްގެންދިއުމަށް މޭޔަރު ވިދާޅުވިއެވެ. މި ޖަލްސާގައި ވެސް މޭޔަރު ޢާޒިމް ވަނީ، ކުއްލިއަކަށް މި ކަހަލަ ކަމެއް ދިމާވި ނަމަވެސް، މާލެ ސީޓީ ކައުންސިލަކީ އެންމެ ރަނގަޅަށް ހިނގާ ކައުންސިލަށް ހައްދާވާނެ ކަމަށް ތަކުރާރުކޮށް ވިދާޅުވެފައެވެ.
މި ޖަލްސާގައި އަލިފާނުގެ ޙާދިސާއާ ގުޅިގެން ކުރަންޖެހޭ ޚަރަދުތައް ހަމަޖެއްސުމަށް، 4.5 މިލިޔަން ރުފިޔާގެ ބަޖެޓެއް ވަނީ ފާސްކޮށްފައެވެ.
އަލިފާނުގެ ހާދިސާއާ ގުޅިގެން މާލޭ ރަށްވެހިންގެ ޒާތީ މައުލޫމާތުތައް ގެއްލިދާނެ ކަމުގެ ބިރު ވެސް އުފެދުނުއިރު، މި ހާދިސާ ހިނގީ، ސިޓީ ކައުންސިލްގެ ލިޔެކިޔުންތައް ޑިޖިޓަލް ކުރުމުގެ މަސައްކަތް ފަށާފައި އޮއްވައެވެ.