އަސްކަރީ ގާނޫނު އިއުލާނުކުރެއްވުމާ ގުޅިގެން ދެކުނު ކޮރެއާގެ ރައީސް ޔޫން ސުކް ޔޮލް މަގާމުން ދުރުކުރުމަށް އެ ގައުމުގެ ގާނޫނު ހަދާ މަޖިލީހުން ފާސްކޮށްފިއެވެ.
މިއަދު ނެގި ވޯޓުގައި ޔޫންގެ އިތުބާރުނެތްކަމަށް ގާނޫނު ހަދާ މަޖިލީހުގެ 204 މެމްބަރުން ވޯޓު ދިނެވެ. ދެކުނު ކޮރެއާގެ ޓީވީން ބުނި ގޮތުގައި އެ ހުށަހެޅުމާ ދެކޮޅަށް 85 މެމްބަރުން ވޯޓު ދިންއިރު، ތިން ވޯޓު ކަރުދާސް ހަލާކުވެ އަށް ވޯޓު ކަރުދާސް ބާތިލް ކަމަށް ކަނޑައަޅާފައިވެއެވެ.
ޔޫން މަގާމުން ދުރުކުރުމަށް ގޮވައިލައި ގާނޫނު ހަދާ މަޖިލީހުގެ ބޭރުގައި ގާތްގަޑަކަށް 200،000 އެއްހާ މީހުން ވަނީ މުޒާހަރާވެސްކޮށްފައެވެ.
މިއަދު ނެގި ވޯޓަކީ ޔޫން މަގާމުން ދުރުކުރުމަށް ދެވަނަ ފަހަރަށް ނެގި ވޯޓެވެ.
އިދިކޮޅު ޕާޓީގެ މެމްބަރުންނާ އެއްކޮޅަށް ވޯޓު ދިނުމަށް ޔޫންގެ ޕީޕަލް ޕަވާ ޕާޓީ (ޕީޕީޕީ)ގެ މަދުވެގެން އަށް މެމްބަރުން ވޯޓު ބޭނުންވެއެވެ. ޕީޕީޕީއަށް ގާނޫނުހަދާ މަޖިލީހުގެ 300 ގޮނޑީގެ ތެރެއިން 192 ގޮނޑި ލިބިފައިވާއިރު، ވޯޓު ނެގުމަށް މަދުވެގެން 200 މެމްބަރުންގެ ވޯޓު ބޭނުންވެއެވެ.
އެ ވޯޓާއެކު ރައީސްގެ ބާރުތަކާއި ޒިންމާތައް ވަނީ އަތުލައިފައެވެ. އެ ޒިންމާތަކާ ހަވާލުވެވަޑައިގަންނަވާނީ ބޮޑުވަޒީރު ހާން ޑަކް ސޫ އެވެ.
ރައީސްގެ އިތުބާރު ނެތް ކަމުގެ މައްސަލަ ދެން ފޮނުވާނީ ގައުމުގެ ދުސްތޫރީ ކޯޓަށެވެ. އެ ކޯޓަށް ޔޫން މަގާމުން ދުރުކުރުމާ ގުޅޭ ގޮތުން ގޮތް ނިންމަން 180 ދުވަސް ލިބޭނެއެވެ. އަދި ރައީސް މަގާމުން ދުރުކުރަން ކޯޓުން ވެސް ނިމްމައިފި ނަމަ، ޔޫން ވާނީ ދެކުނު ކޮރެއާގެ ތާރީޚުގައި އިތުބާރު ނެތް ކަމުގެ ވޯޓަކުން މަގާމުން ދުރުކުރި ދެވަނަ ރައީސަށެވެ.
ދެކުނު ކޮރެއާގެ ގާނޫނު ހަދާ މަޖިލީހުން ޔޫން މަގާމުން ދުރުކުރުމަށް ނެގި އިތުބާރު ނެތްކަމުގެ މައްސަަލަ ފާސްވުމުން އެ ގައުުމުގެ ބަޔަކު އުފާ ފާޅުކުރަނީ -- ފޮޓޯ/ރޮއިޓާސް
ރިޔާސީ އޮފީހުން ނެރުނު ބަޔާނެއްގައި ޔޫން ވިދާޅުވީ އަދި މިހާ ހިސާބުން ނިންމާނުލައްވާނެ ކަމަށެވެ.
"އަޅުގަނޑަށް ލިބޭ ހުރިހާ ހިތްވަރަކާއި ތާއީދަކަށް ވިސްނައިގެން، އެންމެ ފަހު ވަގުތާ ހަމައަށް ގައުމަށްޓަކައި ކުރެވެން އޮތް ހުރިހާ މަސައްކަތެއް ކުރާނަން." އެމަނިކުފާނު އިތުރަށް ވިދާޅުވިއެވެ.
އެ ވޯޓާ ގުޅުވައި، ބޮޑުވަޒީރު ހާން ޑަކް ސޫ ނޫސްވެރިންނާ ވާހަކަ ދައްކަވަމުން ވިދާޅުވީ ދައުލަތުގެ ހުރިހާ ކަމެއް ފުރިހަމައަށް ހިންގުމަށް ކުރެއްވެން ހުރި ހުރިހާ މަސައްކަތެއް ކުރައްވާނެ ކަމަށެވެ.
މި މަހުގެ ތިން ވަނަ ދުވަހު ޔޫން އަސްކަރީ ގާނޫނު އިއުލާނުކުރެއްވީ އިދިކޮޅުން ބަޣާވާތެއް ކުރަން އުޅޭ ކަމަށާއި އުތުރު ކޮރެއާއާ ގުޅިގެން މަސައްކަތް ކުރާ ކަމަށް ތުހުމަތު ކުރައްވައެވެ. ނަމަވެސް ގާނޫނު ހަދާ މަޖިލީހުން ފާސްނުވުމުން އަސްކަރީ ގާނޫނު ދެތިން ގަޑިއިރުތެރޭގައި ވަނީ އަނބުރާ ގެންދަވާފައެވެ.
އޭގެފަހުން ޔޫން ވަނީ އަސްކަރީ ގާނޫނު އިއުލާނުކުރެއްވުމުގެ މަސައްކަތާ ގުޅިގެން މައާފަށް އެދިވަޑައިގެންފައެވެ.
މީގެކުރިން އެގޮތަށް މަގާމުން ދުރުކުރީ ގައުމުގެ ފުރަތަމަ އަންހެން ރައީސާ ކަމަށްވާ، ޕާކް ގުންހޭ އެވެ. އެކަމަނާގެ މައްޗަށް ކޮރަޕްޝަނުގެ ދައުވާތަކެއްކޮށް، ސާބިތުވުމުން ޖަލު ހުކުމެއް ވެސް ތަންފީޒުކުރެއްވިއެވެ. ނަމަވެސް އެކަމަނާގެ ފަހުން ވެރިކަމަށް ވަޑައިގެންނެވި ރައީސް މޫން ޖޭއިން އެކަމަނާއަށް މައާފު ދެއްވިއެވެ.