ސަރުކާރުން ޓެކްސީގެ ޚިދުމަތް ދިނުމަށް ތައްޔާރުވަމުންދާތީ އެ ކަމާ ދެކޮޅަށް ޓެކްސީ ޑްރައިވަރުން ހުޅުމާލޭގައި ކުރަމުން ދިޔަ ސުލްހަވެރި މުޒާހަރާގެ ތެރެއިން ތިން ޑްރައިވަރަކު ހައްޔަރުކޮށް، 21 ޓެކްސީއެއް 30 ދުވަހުގެ މުއްދަތަށް ހިފެހެއްޓުމަކީ 21 އާއިލާގެ އާމްދަނީ ހުއްޓުވާލުން ކަމަށް އެމްޑީޕީން މިއަދު ބުނެފިއެވެ.
މި މުޒާހަރާ ހުއްޓުވުމަށްޓަކައި ހައްޔަރުކުރި ޑްރައިވަރުންގެ ބަންދާ މެދު ގޮތެއް ނިންމަން ކޯޓަށް ގެންދިއުމުން ހުޅުމާލޭ މެޖިސްޓްރޭޓް ކޯޓުން ވަނީ ދެ ޑްރައިވަރަކު ފަސް ދުވަހުގެ މުއްދަތަށް ބަންދުގައި ބޭތިއްބުމަށް ނިންމާފައެވެ. ފުލުހުން ބުނި ގޮތުގައި މި ޑްރައިވަރުންނަކީ ރާވައިގެން މުޒާހަރާކޮށްފައިވާ ބަޔަކަށްވާތީ، އެ މީހުންނަކީ މުޖުތަމައުގެ ސަލާމަތަށް ނުރައްކާތެރި ބައެކެވެ.
މި މަހުގެ 11 ވަނަ ދުވަހުގެ ހަވީރުން ފެށިގެން ބާއްވަމުން ގެންދިޔަ މުޒާހަރާ ފެށުނުއިރު ވެސް ފުލުހުން ވަނީ އެ މުޒާހަރާއަށް ހުރަސްއެޅުމަށް މަސައްކަތްކޮށްފައެވެ.
އެއްގަމު ދަތުރުފަތުރުގެ ގާނޫނުގެ 63 ވަނަ މާއްދާގައި ބުނާގޮތުން ނުރައްކާތެރިކޮށް އެއްގަމު އުޅަނދު ދުއްވައިގެން 30 ދުވަހަށް އުޅަނދު ހިފެހެއްޓުމަކީ އެ މާއްދާގައި ބުނެފައިވާ އަދަބުތަކުގެ އިތުރުން ފުލުހުންނަށް އޮންނަ އިހުތިޔާރީ ކަމެކެވެ.
އެ މާއްދާގައި ބަޔާންކޮށްފައިވާ ގޮތުން ފުރަތަމަ ފަހަރުނަމަ އަދަބަކީ 2000 ރުފިޔާއިން ޖޫރިމަނާކުރުމެވެ. ނަމަވެސް، ލުއި އަދަބެއް ކަނޑައެޅިފައި އޮއްވައި، އެންމެ ހަރުކަށި އަދަބު އިހުތިޔާރުކޮށްފައިވަނީ ޓެކްސީ ޑްރައިވަރުން ކުރަމުންދާ ސުލްހަވެރި އިހުތިޖާޖު ހުއްޓުވާލައި، އެ އާއިލާތަކަށް ގެއްލުން ދިނުމުގެ ނިޔަތުގައި ކަމަށް އެމްޑީޕީން ވަނީ ބުނެފައެވެ.
އެ ޕާޓީން ބުނީ، އެ މީހަކު އިހުތިޔާރުކުރާ ވަޒީފާއެއް އަދާކުރުމާއި، މަސައްކަތްކޮށްގެން އާމްދަނީ ހޯދުމުގެ ހައްގަކީ ކޮންމެ މީހަކަށް ގާނޫނުއަސާސީން ކަށަވަރުކޮށްދީފައިވާ އަސާސީ ހައްގެއް ކަމަށްވާއިރު، އާމްދަނީ ހޯދުމަށްޓަކައި ބޭނުންކުރާ ވަސީލަތްތައް ހިފެހެއްޓުމަކީ މި މާއްދާގެ ދަށުން ލިބިދޭ އަސާސީ ހައްގަކަށް ހުރަސް އެޅުމުގެ އަމަލެއް ކަމަށެވެ.
ސުލްހަވެރި އިހުތިޖާޖުގައި ބައިވެރިވެގެން ހައްޔަރުކުރި ތިން ޓެކްސީ ޑްރައިވަރުންނަށް އެ ޕާޓީގެ ފަރާތުން ގާނޫނީ ވަކީލުންގެ އެހީތެރިކަން ފޯރުކޮށްދެމުންދާ ކަމަށާއި، ޓެކްސީ ޑްރައިވަރުންގެ އުޅަނދުތައް އަނބުރާ ހޯދުމަށް ކުރަންޖެހޭ ގާނޫނީ މަސައްކަތް ވެސް އެ ޕާޓީގެ ގާނޫނީ ވަކީލުންގެ ޓީމުން ކުރަމުންގެންދާނެ ކަމަށް ބަޔާނުގައި ބުނެފައިވެއެވެ.
ރައްޔިތުންގެ ހައްގުތަކާ ގުޅިފައިވާ މިފަދަ ކޮންމެ ކަމެއްގައި އެމްޑީޕީން އަބަދު ވެސް ދެމިއޮންނާނެ ކަމަށާއި ރައްޔިތުންގެ ފަރާތުން ވަކާލާތުކޮށް ރައްޔިތުންނަށް ބޭނުންވާ އެހީތެރިކަން ފޯރުކޮށްދޭނެ ކަމަށް ވެސް ބަޔާނުގައި ބުނެފައިވެއެވެ.
ޓެކްސީކުރުމުގެ ވިޔަފާރީގެ ތެރެއަށް ސަރުކާރުން ވަނުމަކީ އެ ޕާޓީން ކުށްވެރިކުރާ ކަމެއް ކަމަށާއި ޓެކްސީ ޑްރައިވަރުން ކުރާ އިހުތިޖާޖު ހުއްޓުވުމަށްޓަކައި ޓެކްސީ ޑްރައިވަރުން ހައްޔަރުކުރުމާއި މުދާ ހިފެހެއްޓުމަކީ މި ސަރުކާރުން ހިންގާފާއިވާ ނާތަހުޒީބު ނޭއްގާނީ އަމަލެއްކަމަށް ވެސް އެމްޑީޕީން ވަނީ ބުނެފައެވެ.
އެމްޑީޕީން ވަނީ ހައްޔަރުކޮށްފައިވާ ޓެކްސީ ޑްރައިވަރުން މިނިވަންކޮށް، ހިފަހައްޓާފައިވާ އުޅަނދުތައް ވަގުތުން ދޫކޮށްލަން ސަރުކާރަށް ގޮވާލައިފައެވެ.