ކުރީ ސަރުކާރުން ގެއްލުމުގެ ބަދަލުގައި ބައެއް ފަރާތްތަކަށް ބަދަލުދިން ގޮތުން, ކުރީގެ ރައީސް އިބްރާހީމް މުހައްމަދު ޞާލިހާއި، ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލްގެ އިތުރުން ރައީސް އޮފީހުގެ ކުރީގެ މިނިސްޓަރު އަލީ ޝިޔާމްގެ މައްސަލަ ބަލައި ތަހުގީގެއް ހިންގައި، ދައުވާ ކުރަން ޖެހިއްޖެ ހާލަތެއްގައި ދައުވާކުރުމަށް, ޕްރޮސެކިއުޓާ ޖެނެރަލް (ޕީޖީ) އޮފީހަށް އެންގުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ.
އެ މައްސަލަ ބެލުމަށް ޕީޖީއަށް އަންގަން ނިންމީ އިއްޔެ މާލިއްޔަތު ކޮމިޓީންނެވެ.
އަދި އެ ނިންމުން ފާސްކުރުމަށް މިއަދު މަޖިލީހުން ނެގި ވޯޓުގައި 55 މެންބަރުން ވަނީ ޕީޖީއަށް ތަހުގީގުކުރުމަށް އެންގުމާ އެއްކޮޅަށް ވޯޓު ދެއްވާފައެވެ. ދެކޮޅަށް ވޯޓު ދެއްވީ އެންމެ 11 މެންބަރުންނެވެ.
އެ މައްސަލައާ ގުޅިގެން ދެން ފާސްކުރީ 2019 އިން ފެށިގެން 2023 ވަނަ އަހަރާ ހަމައަށް ސޮއިކޮށްފައިވާ އެއްބަސްވުންތަކަކީ އުފެދުމުގައި ވެސް ބާތިލު އެއްބަސްވުންތަކެއް ކަމަށް ނިންމުމަށެވެ. އަދި އެ އެއްބަސްވުންތަކަށް ބަދަލު ދީފައިވާނަމަ އެ އަނބުރާ ދައުލަތަށް ނަގަން ބަންޑާރަ ނައިބަށް އެންގުމަށެވެ. ހަމައެއާއެކު މާލިއްޔަތު ގާނޫނާ ޚިލާފަށް އެއްވެސް ބަޔަކަށް ބަދަލު ދީފައިވާނަމަ އެވެސް އަނބުރާ ދައުލަތަށް ނަގަން ބަންޑާރަ ނައިބަށް އަންގަން ވެސް ފާސްކުރިއެވެ.
މިދިޔަ ސަރުކާރުން އެކި ކުންފުނިތަކަށް ގެއްލުމުގެ ބަދަލުގެ ގޮތުގައި 1.6 ބިލިއަނަށް ވުރެ ގިނަ ރުފިޔާ ދޫކޮށްފައިވާކަން ފިނޭންސް މިނިސްޓްރީގެ ތަފާސްހިސާބުތަކުން ދައްކައެވެ.
އަމިއްލަ ފަރާތަކާއި ސަރުކާރާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ހައްލުކޮށް، ގެއްލުމުގެ ބަދަލުދިނުމަށް އުފެއްދި ސެޓްލްމެންޓް ކޮމިޓީ ރައީސް ޑރ. މުހައްމަދު މުއިއްޒު އުވައިލެއްވީ މިދިޔަ އަހަރުގެ ނޮވެމްބަރު 21ގައެވެ.
އަދި އެ ކޮމިޓީ މި ސަރުކާރުން އުވާލައި، އެ ކޮމިޓީން ބެލި މައްސަލަތައް ބަންޑާރަނައިބުގެ ލަފައާއެކު މުރާޖައާ ކުރުމުގެ މަސައްކަތް ކުރަމުންދާކަމަށް މީގެ ކުރިން ސަރުކާރުން ވަނީ ބުނެފައެވެ.