ކުރީ ސަރުކާރުން ގެއްލުމުގެ ބަދަލުގައި ބައެއް ފަރާތްތަކަށް ބަދަލުދިން ގޮތުން, ކުރީގެ ރައީސް އިބްރާހީމް މުހައްމަދު ޞާލިހާއި، ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލްގެ އިތުރުން ރައީސް އޮފީހުގެ ކުރީގެ މިނިސްޓަރު އަލީ ޝިޔާމްގެ މައްސަލަ ބަލައި ތަހުގީގެއް ހިންގައި، ދައުވާ ކުރަން ޖެހިއްޖެ ހާލަތެއްގައި ދައުވާކުރުމަށް, ޕްރޮސެކިއުޓާ ޖެނެރަލް (ޕީޖީ) އޮފީހަށް އެންގުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ނިންމައިފިއެވެ.
މިދިޔަ ސަރުކާރުން އެކި ކުންފުނިތަކަށް ގެއްލުމުގެ ބަދަލުގެ ގޮތުގައި 1.6 ބިލިއަނަށް ވުރެ ގިނަ ރުފިޔާ ދޫކޮށްފައިވާކަން ފިނޭންސް މިނިސްޓްރީގެ ތަފާސްހިސާބުތަކުން ދައްކައެވެ.
މިއަދު ބޭއްވި މާލިއްޔަތު ކޮމިޓީގައި ވަނީ ކުރީ ސަރުކާރުން ގެއްލުމުގެ ބަދަލު ނަގައިދިނުމަށް އުފެއްދި ސެޓްލްމަންޓް ކޮމިޓީން ބަދަލުގެ ގޮތުގައި ދީފައިވާ ފައިސާގެ ތަފްސީލާ ގުޅުންހުރި މަސައްކަތްތައް ކޮށްފައެވެ.
އެގޮތުން އެ ކޮމިޓީގައި މިއަދު ނިންމީ ރައީސް ޞާލިހާއި، ޝިޔާމް އަދި ފައްޔާޒުގެ މައްޗަށް ޖިނާއީ ތަހުގީގެއް ހިންގުމަށް ޕީޖީއަށް ހުށަހެޅުމަށެވެ.
މިއަދު ބޭއްވި މަޖިލީހުގެ މާލިއްޔަތު ކޮމިޓީގެ ބައްދަލުވުން -- ފޮޓޯ/ މަޖިލިސް
އެ ހުށަހެޅުން ހުށަހެޅުއްވީ ފުނަދޫ ދާއިރާގެ މެންބަރު މުހައްމަދު މަމްދޫހެވެ. އެ ހުށަހެޅުމަށް ތާއިދުކުރެއްވީ ކެލާ ދާއިރާގެ މެންބަރު އަބްދުﷲ ޝަރީފެވެ. އެ ހުށަހެޅުން ފާސްކުރީ ހަ މެންބަރުންގެ ވޯޓާއެކުއެވެ.
ކޮމިޓީން އެގޮތަށް ނިންމީ، ދައުލަތުގެ އިސް މަގާމެއްގައި ހުރެ، ދައުލަތުގެ މުދަލާއި ފައިސާއަށް ޚިޔާނާތްތެރިވެ، އޭގެ ހައްގުވެރިން ފިޔަވައި އެހެން މީހުންނަށް އޭގެ ނަފާ ހޯދައިދިން ކަމަށް ތުހުމަތުކުރެވޭތީއެވެ. އަދި ދައުލަތަށް ލިބެން އޮތް ފައިދާއަކަށް އުނިކަން ލިބޭ ފަދަ ގޮތަކަށް އަމަލުކޮށްފަ އޮތުމުން ކަމަށް ތުހުމަތުކުރެވޭތީއެވެ.
ކޮމިޓީ ބައްދަލުވުމުގައި އެމްޑީޕީއަށް ނިސްބަތްވާ ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު ވަނީ އެ ނިންމުމާ ދެކޮޅަށް ވާހަކަދައްކަވާފައެވެ. އޭނާ ތުހުމަތުކުރެއްވި ގޮތުގައި އެއީ ސިޔާސީ ބޭނުމަށް ނިންމާ ނިންމުމެކެވެ. އެހެން ނޫންނަމަ ގިނަ ބޭފުޅުން ތިއްބަވާ ކޮމިޓީއެއްގައި އެންމެ ތިން ބޭފުޅުންގެ މައްޗަށް ދައުވާ ކުރަނީ ކީއްވެތޯ އޭނާ ސުވާލުއުފެއްދެވިއެވެ.
މީގެ އިތުރުން އެ ކޮމިޓީން މިއަދު ވަނީ 2019 އިން ފެށިގެން 2023 ވަނަ އަހަރާ ހަމައަށް ސޮއިކޮށްފައިވާ އެއްބަސްވުންތަކަކީ އުފެދުމުގައި ވެސް ބާތިލު އެއްބަސްވުންތަކެއް ކަމަށް ކޮމިޓީއަށް ފެންނަ ކަމަށް ނިންމާފައެވެ. އަދި އެ އެއްބަސްވުންތަކަށް ބަދަލު ދީފައިވާނަމަ އެ އަނބުރާ ދައުލަތަށް ނަގަން ބަންޑާރަ ނައިބަށް އަންގަން ކޮމިޓީން ފާސްކުރިއެވެ. ހަމައެއާއެކު މާލިއްޔަތު ގާނޫނާ ޚިލާފަށް އެއްވެސް ބަޔަކަށް ބަދަލު ދީފައިވާނަމަ އެވެސް އަނބުރާ ދައުލަތަށް ނަގަން ބަންޑާރަ ނައިބަށް އަންގަން ކޮމިޓީން ފާސްކުރިއެވެ.
އަމިއްލަ ފަރާތަކާއި ސަރުކާރާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ހައްލުކޮށް، ގެއްލުމުގެ ބަދަލުދިނުމަށް އުފެއްދި ސެޓްލްމެންޓް ކޮމިޓީ ރައީސް ޑރ. މުހައްމަދު މުއިއްޒު އުވައިލެއްވީ މިދިޔަ އަހަރުގެ ނޮވެމްބަރު 21ގައެވެ.
އަދި އެ ކޮމިޓީ މި ސަރުކާރުން އުވާލައި، އެ ކޮމިޓީން ބެލި މައްސަލަތައް ބަންޑާރަނައިބުގެ ލަފައާއެކު މުރާޖައާ ކުރުމުގެ މަސައްކަތް ކުރަމުންދާކަމަށް މީގެ ކުރިން ސަރުކާރުން ވަނީ ބުނެފައެވެ.