ހައުސިން މިނިސްޓްރީއާއި އިންފްރަސްޓްރަކްޗާ މިނިސްޓްރީ ހިންގި އިމާރާތުގައި މިއަދު ހިނގި އަލިފާނުގެ ހާދިސާއާ ގުޅިގެން އެ އިމާރާތުގައި ހުރި މާލޭ ސިޓީ ކައުންސިލްގެ އޮފީހަށް ވެސް އަލިފާނުގެ އަސަރުކޮށް، އެ ތަނުން ދެމުންއައި ޚިދުމަތްތައް ވަގުތީ ގޮތުން ހުޅުމާލެއަށް ބަދަލުކޮށްފިއެވެ.
އަލިފާނުގެ ހާދިސާއާ ގުޅިގެން މީޑިއާތަކަަށް މައުލޫމާތު ދެއްވަމުން މާލޭގެ ޑެޕިއުޓީ މޭޔަރު އަހްމަދު ނަރީޝް ވިދާޅުވީ، މި ހާދިސާއާ ގުޅިގެން ސިޓީ ކައުންސިލުން ރަށްވެހިކަމުގެ ޚިދުމަތްދޭ އިމާރާތަށް ބޮޑެތި ގެއްލުންތަކެއް ލިބިފައިވާ ކަމަށެވެ.
މި ވަގުތު އިމަޖެންސީކޮށް ޚިދުމަތް ބޭނުންވާ ފަރާތްތަކުން ސިޓީ ކައުންސިލްގެ ހުޅުމާލޭ ސެކްޝަނުން ޚިދުމަތް ލިބޭނެގޮތް ހަމަޖެހިފައިވާ ކަމަށް ނަރީޝް ވިދާޅުވިއެވެ.
މި ވަގުތު އިމަޖެންސީކޮށް ވިހައިގެން ޚިދުމަތެއް ހޯދަން ބޭނުންވާ ބައެއް ވެއްޖެކަމަށް ވާނަމަ އަޅުގަނޑުމެންގެ ހުޅުމާލޭ ސެކްޝަން އަމީންއެވެނިއު ބިލްޑިންގެ ފަސްޓް ފްލޯގައި އިންނާނެ އަޅުގަނޑުމެންގެ ހުޅުމާލޭ އޮފީސް. އޮފީހަށް ވަޑައިގަތީމަ އެ ޚިދުމަތް ލިބޭނެ، މާލެ ސިޓީގެ ޑެޕިއުޓީ މޭޔަރު އަހްމަދު ނަރީޝް
ނަރީޝް ވިދާޅުވީ، ހުޅުމާލޭ އޮފީހުން ރަށްވެހިކަމާ ބެހޭ ޚިދުމަތް ލިބޭނެ އިންތިޒާމު މިހާރު ހަމަޖެހިފައިވާ ކަމަށެވެ. އެހެންކަމުން، އެއްވެސް ރައްޔިތަކަށް ދަތިނުވާނޭ ގޮތަކަށް އެ ޚިދުމަތް ދެވޭނެ އިންތިޒާމު މިހާރު ހަމަޖެހިފައިވާ ކަމަށް އޭނާ ވިދާޅުވިއެވެ.
އޭނާ ވިދާޅުވީ، މާލޭގައި ވަގުތީ ސެޓަޕެއް ޖެހުމުގެ މަސައްކަތް މިހާރު ކުރިއަށްދާ ކަމަށެވެ. ލި
ލިބިފައިވާ ގެއްލުން މި ވަގުތަށް ދަންނަވަން ނޭނގޭތީ މިހެން ދަންނަވަން މި ޖެހުނީ އެއީ އެއްވެސް ރައްޔިތަކަށް ހާއްސަކޮށް ވިހައިގެން އަންނަ ކުއްޖަކަށް ޚިދުމަތެއް ދޭން ބަލާއިރު، އިމަޖެންސީކޮށް ފުރަން ޖެހުނު ކަމުގައި ވިޔަސް އެ ޚިދުމަތް އަޅުގަނޑުމެން ހޯމްލޭންޑް މިނިސްޓްރީގައި ވެސް ވާހަކަދައްކާފައި އާސަންދައިގައި ވެސް ވާހަކަދައްކާފައިވާނީ އެ ޚިދުމަތް ނުގެއްލޭނެ ގޮތަކަށް ލިބެން، މާލެ ސިޓީގެ ޑެޕިއުޓީ މޭޔަރު އަހްމަދު ނަރީޝް
މީޑިއާއަށް މައުލޫމާތު ހިއްސާކުރައްވަމުން ކައުންސިލް މެންބަރު މުޙައްމަދު ސައިފް ފާތިހު ވިދާޅުވީ، އެ އިމާރާތަކީ ވަރަށް ގިނަ ރިކޯޑްތަކެއް ހުރި އިމާރާތެއް ކަމަށެވެ. އަލިފާން ރޯވުމުގެ ސަބަބުން ތަނުގެ ހާލަތު ހުރީ އެއްވެސް ރިކޯޑަކަށް އެކްސެސްވެވޭ ގޮތަކަށް ނޫނެވެ.
އެންމެ ކުރި 1950 އިން ފެށިގެން މާލޭގައި ހުރި ބާ ރިކޯޑްސްއާއި އިމާރާތްކުރުމުގެ ހުއްދަތަކަކީ އެ ތަނުގައި ވާއެއްޗެހިކަން ފާހަގަކޮށް ސައިފް ވަނީ ބައެއް އެއްޗެހި ރައްކާތެރިކަމާ އެކު ސަލާމަތްކުރެވިފައިވާ ކަމަށް ވިދާޅުވެފައެވެ. ނަމަވެސް، ކުރިއަށް އޮތް ދެތިން ދުވަހުގެ ތެރޭގައި ޚިދުމަތް ދެވޭ ވަރަށް އަދި އެސެސްނުކުރެވޭކަން އޭނާ ވަނީ ފާހަގަކުރައްވާފައެވެ.
ހެނދުނު ހިނގި އަލިފާނުގެ ހާދިސާގެ ސަބަބުން ހައުސިން މިނިސްޓްރީއާއި އިންފްރާސްޓަރަކްޗާ މިނިސްޓްރީގެ އިތުރުން އެންވަޔަރަމަންޓް މިނިސްޓްރީއަށް ވެސް ބޮޑެތި ގެއްލުންތަކެއް ލިބި, އެ ތިން މިނިސްޓްރީގެ މަސައްކަތްތައް މިހާރު ވަނީ ވަގުތީ ގޮތުން ހުއްޓުމަކަށް އައިސްފައެވެ.
އެ ސަރަހައްދުގައި ހިނގި އަލިފާންގަނޑު މިހާރު ވަނީ ކޮންޓްރޯލްކުރެވިފައެވެ. އެކަމަކު، އެ އިމާރާތް ވަނީ ބޭނުންނުކުރެވޭ ވަރަށް ހަލާކުވެފައެވެ.