ޑިޕްލޮމެޓިކް، ސްޕެޝަލް ސާވިސް އަދި އޮފިޝަލް ޕާސްޕޯޓް ހޯލްޑަރުންނަށް ވިސާއާ ނުލައި އޮމާނަށް ދެވޭގޮތަށް ރާއްޖެއާ އޮމާނާ ދެމެދު އެއްބަސްވުމެއްގައި މިއަދު ސޮއިކޮށްފިއެވެ.
މި އެއްބަސްވުން ގާއިމްކުރީ ފޮރިން މިނިސްޓަރު ޑރ. އަބްދުﷲ ޚަލީލް އޮމާނަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން، އެ ގައުމުގެ ފޮރިން މިނިސްޓަރު ސައްޔިދު ބަދުރު ބިން ހަމަދު ބިން ހަމޫދު އަލްބުސައިދީއާ އެކު މިއަދު ބޭއްވި ބައްދަލުވުމަށް ފަހުގައެވެ.
މި ބައްދަލު ކުރެއްވުމަށްފަހު ރާއްޖެއާއި އޮމާންއާ ދެމެދު މުހިންމު ދެ އެއްބަސްވުމެއްގައި ސޮއިކުރެވުނެވެ. އެއީ މެމޮރަންޑަމް އޮފް އަންޑަސްޓޭންޑިން އޮން ޕޮލިޓިކަލް ކޮންސަލްޓޭޝަނާއި، ޑިޕްލޮމެޓިކް، ސްޕެޝަލް ސާވިސް އަދި އޮފިޝަލް ޕާސްޕޯޓް ހޯލްޑަރުންނަށް މިއުޗުއަލް ވިސާ އެގްޒެމްޝަންއާ ބެހޭ އެއްބަސްވުމެކެވެ.
ޑިޕްލޮމެޓިކްއާއި ސްޕެޝަލް ސާވިސް އަދި އޮފިޝަލް ޕާސްޕޯޓް ހޯލްޑަރުންނަށް މިއުޗުއަލް ވިސާ އެގްޒެމްޝަން އެގްރިމަންޓްގެ އިތުރުން އޯޑިނަރީ ޕާސްޕޯޓަށް ވެސް ވިސާ އިސްތިސްނާކުރުމުގެ މަސައްކަތްތައް ކުރިއަށްދާކަމުގެ ޔަޤީންކަން، މިނިސްޓަރު މި ބައްދަލްވުމުގައި ދެއްވިއެވެ.
މި އެއްބަސްވުންވަނީ އޮމާން ސަރުކާރަށް ހުށަހަޅުއްވައިފައެވެ. މިހާރު ދިވެހި ރައްޔިތުންނަށް ވިސާއާ ނުލާ އޮމާނަށް ދަތުރުކުރެވެނީ ޚާއްސަ ޝަރުތުތަކެއް ފުރިހަމަވެގެންނެވެ. މި ޝަރުތުތަކުގެ ތެރޭގައި ވަކި ގައުމުތަކެއްގެ ވިސާ އޮތުން ހިމެނެއެވެ.
ދެ ގައުމުގެ ފޮރިން މިނިސްޓަރުންގެ ބައްދަލުވުން -- ފޮޓޯ/ ފޮރިން މިނިސްޓްރީ
ދެ ގައުމުގެ ފޮރިން މިނިސްޓަރުންގެ ބައްދަލުވުމުގައި:
- ވިޔަފާރިއާއި ފަތުރުވެރިކަމާއި ތަޢުލީމުގެ ދާއިރާއިން ގުޅުން ބަދަހިކުރުމާއި އިންވެސްޓްމަންޓް އިތުރުކުރުމަށް މަޝްވަރާ ކުރެއްވި
- ބައިނަލްއަޤްވާމީ މަސްލަހަތު ހިމެނޭ ކަންކަމުގައި ދެ ޤައުމުން ގުޅިގެން މަސައްކަތް ކުރުމަށް މަޝްވަރާ ކުރެއްވި
- ރާއްޖެއާއި އޮމާންއާ ދެމެދު ސިޔާސީ މަޝްވަރާތަކުގެ ފުރަތަމަ ބައްދަލުވުން އަވަސް ފުރުޞަތެއްގައި ބޭއްވުމަށް ވެސް މަޝްވަރާ ކުރެއްވި
ޑިޕްލޮމެޓިކް އަދި އޮފިޝަލް ޕާސްޕޯޓު އޮންނަ ދިވެހިންނަށް ވިސާ ނެތި އޮމާނަށް ދެވޭގޮތަށް އެއްބަވުމެއް މިއަދު ހެދިއިރު، މިދިޔަ މަހު 15ގައިވަނީ ޑިޕްލޮމެޓިކް އަދި އޮފިޝަލް ޕާސްޕޯޓު އޮންނަ ދިވެހިންނަށް ވިސާ ނެތި އަޒަރުބައިޖާނަށް ދަތުރުކުރެވޭ ގޮތަށް ވެސް އެއްބަސްވުމެއް ހަދައިފައެވެ. އެއީ ހުރިހާ ދިވެހިންނަށް ވިސާއަކާ ނުލައި ދަތުރުކުރެވޭނެ ގޮތް މަގުފަހިކޮށްދިނުމަށް ޓަކައި ކުރެވޭ މަސައްކަތުގައި އެޅުނު މުހިންމު ފިޔަވަޅެއް ކަމަށް ފޮރިން މިނިސްޓްރީން މީގެ ކުރިން ބުންޏެވެ.
މިނިސްޓަރު ޚަލީލް ރަސްމީ ދަތުރުފުޅެއްގައި އޮމާނަށް ވަޑައިގަތީ، އެ ގައުމުގެ ފޮރިން މިނިސްޓަރު ދެއްވި ދައުވަތަކަށެވެ. މި ދަތުރުފުޅުގައި އެ މިނިސްޓްރީގެ އިސް ވަފުދެއް މިނިސްޓަރާއެކު ބައިވެރިވެ ވަޑައިގަންނަވައެވެ.